ໃນວັນທີ 23 ກັນຍານີ້ ຢູ່ທີ່ຫ້ອງຮັບຮອງຫ້ອງວ່າການແຂວງວຽງຈັນ ໄດ້ມີຫຼາຍພາກສ່ວນນຳເງິນມາມອບໃຫ້ແຂວງວຽງຈັນ ເພື່ອຊຸກຍູ້ກອງປະຊຸມໃຫຍ່ຜູ້ແທນອົງຄະນະພັກແຂວງວຽງຈັນ ຄັ້ງທີ VII ຊຶ່ງປະກອບມີ ບໍລິສັດ ຈະເລີນເຊກອງພະລັງງານ ຈຳກັດ ແລະ ທະນາຄານພັດທະນາລາວ ຈຳກັດມອບ 500 ລ້ານກີບ, ບໍລິສັດ ດວງປະເສີດກໍ່ສ້າງຂົວ-ທາງ ແລະ ຊົນລະປະທານ ຈຳກັດ 50 ລ້ານກີບ, ບໍລິສັດ ພັດນາສາມຫລ່ຽມເສດຖະກິດຄົບວົງຈອນ ຈຳກັດ 500 ລ້ານກີບ, ບໍລິສັດ ທອງສະຫວັນກໍ່ສ້າງ ຈຳກັດຜູ້ດຽວ 200 ລ້ານກີບ ແລະ ຮັບຮັບໂດຍ ທ່ານ ຄຳພັນ ສິດທິດຳພາ ເຈົ້າແຂວງວຽງຈັນ.

ໂອກາດນີ້, ທ່ານເຈົ້າແຂວງວຽງຈັນ ໄດ້ຕາງໜ້າໃຫ້ອົງການປົກຄອງແຂວງ ກ່າວສະແດງຄວາມຂອບໃຈ ແລະ ຮູ້ບຸນຄຸນຕໍ່ກັບບັນດາບໍລິສັດດັ່ງກ່າວ ທີ່ໄດ້ຊ່ວຍເຫຼືອງົບປະມານເຂົ້າໃນການຮັບໃຊ້ກອງປະຊຸມໃຫຍ່ຜູ້ແທນອົງຄະນະພັກແຂວງວຽງຈັນ ຄັ້ງທີ VII ທີ່ຈະໄດ້ໄຂຂຶ້ນໃນຕໍ່ໜ້ານີ້ ຊຶ່ງຈະນຳໃຊ້ເງິນຈຳນວນດັ່ງກ່າວຮັບໃຊ້ກອງປະຊຸມຄັ້ງນີ້ ໃຫ້ເກີດປະໂຫຍດສູງສຸດ; ພ້ອມນີ້ ທ່ານເຈົ້າແຂວງວຽງຈັນ ຍັງໄດ້ມອບໃບກຽດຕິຄຸນໃຫ້ກັບບັນດາບໍລິສັດດັ່ງກ່າວ.

(ແຫຼ່ງຂ່າວ: ແຂວງວຽງຈັນ)

ສະແດງຄຳຄິດເຫັນ