ການດຸໝັ່ນຂະຫຍັນພຽນທຳມາຫາກິນ ລ້ວນແລ້ວແຕ່ເຮັດໃຫ້ຊີວິດການເປັນຢູ່ ຂອງຄອບຄົວນັບມື້ດີຂື້ນ ແລະ ຮັ່ງມີໄດ້. ດັ່ງຄອບຄົວຂອງ ທ່ານ ຊາຍ ມາລາພອນ ຫຼື ຊາຍນ້ອຍ ຢູ່ບ້ານໂພນສະອາດ ເມືອງນໍ້າບາກ ແຂວງຫຼວງພະບາງ ທີ່ຢືດຖືອາຊີບການ ຊື້່-ຂາຍ ງົວ-ຄວາຍ ແລະ ລ້ຽງງົວເປັນອາຊີບຫຼັກ ເລີ່ມແຕ່ປີ 1995 ເປັນ ຕົ້ນມາ ຈົນມີຟາມງົວເປັນຂອງຕົນເອງ ແລະ ສາມາດສ້າງລາຍຮັບ ເຂົ້າຄອບຄົວໄດ້ຫຼາຍກວ່າ 900 ລ້ານກີບຕໍ່ປີ. ທ່ານ ຊາຍ ມາລາພອນ ໃຫ້ສຳພາດຕໍ່ສື່ມວນຊົນຂອງແຂວງ ໃນວັນທີ 25 ກັນຍານີ້ວ່າ: ຟາມງົວ ມີເນື້ອທີ່ທັງໝົດ 190 ກວ່າເຮັກຕ່າ. ໃນນັ້ນ, ໄດ້ບຸກເບີກເປັນສວນປູກຫຍ້າເພື່ອລ້ຽງງົວ 30 ກວ່າເຮັກຕ່າ, ມີແຮງງານທັງໝົດ 5 ຄົນ. ມາຮອດທ້າຍປີ 2024 ໄດ້ປຶກສາຫາລືນໍາອົງການປົກຄອງເມືອງ ແລະ ທະນາຄານສົ່ງກະສິກຳ ເພື່ອຂໍກູ້ຢືມເງິນ ຈຳນວນ 1 ຕື້ກີບ, ພາຍຫຼັງໄດ້ຮັບເງິນ ໄດ້ນຳມາບຸກເບີກຟາມງົວ ໂດຍຊື້ແມ່ພັນຈຳນວນ 80 ໂຕ, ພໍ່ພັນ 10 ໂຕ, ຂະຫຍາຍສວນຫຍ້າ, ຊື້ເຫຼັກໜາມອ້ອມຮົ້ວຟາມ ແລະ ແປງທາງຂອບເຂດຟາມງົວ ໃຫ້ມີຄວາມສະດວກສະບາຍ. ປັດຈຸບັນໃນຟາມຂອງລາວມີງົວທັງໝົດ 158 ໂຕ. ສ່ວນຕະຫຼາດຈໍາໜ່າຍແມ່ນຂາຍພາຍໃນແຂວງ, ຕ່າງແຂວງ ແລະປະເທດ (ສປ ຈີນ) ຈໍານວນໜຶ່ງ. ນອກຈາກຂາຍເປັນໂຕແລ້ວ ໄດ້ນຳເຂົ້າເຕົາຂ້າສັດ ເປັນຂອງຕົນເອງເພື່ອຂາຍຊິ້ນພາຍຕະຫຼາດເມືອງນໍ້າບາກ. ໃນປີ 2025 ນີ້, ໄດ້ຂາຍງົວອອກ 72 ໂຕ, ສາມາດສ້າງລາຍຮັບຈາກການຂາຍງົວ, ຂ້າສັດ-ຂາຍຊີ້ນ ແລະ ອື່ນໆ ທັງໝົດ 900 ລ້ານກວ່າກີບ. ຖ້າທຽບໃສ່ເມື່ອກ່ອນ ຖືວ່າຊີວິດການເປັນຢູ່ດີຂຶ້ນຫຼາຍ, ສາມາດສົ່ງລູກຮຽນຈົບວິຊາຊີບ, ມີວຽກເຮັດງານທຳທີ່ດີ ມີເຮືອນຖາວອນຢູ່, ມີລົດໃຫຍ່ຂີ່, ເຮັດໃຫ້ການໄປມາສະດວກສະບາຍຫຼາຍຂຶ້ນ.

ສຳລັບແຜນການຕໍ່ໜ້າ ຈະສືບຕໍ່ຂະຫຍາຍສວນຫຍ້າລ້ຽງງົວ, ຂະຫຍາຍພໍ່ພັນແມ່ພັນງົວ ແລະ ຊື້ງົວເຂົ້າຟາມເພີ່ມ ຕື່ມອີກ. ຖ້າທ່ານໃດຕ້ອງການບົດຮຽນໃນການລ້ຽງງົວ ຫຼື ສົນໃຈຊື້ງົວ ສາມາດເຂົ້າມາພົວພັນນຳ ຟາມຊາຍ ມາລາພອນ ໄດ້ ທີ່ບ້ານນໍ້າມອງ ເມືອງນໍ້າບາກ ແຂວງຫຼວງພະບາງ.

(ຂ່າວ: ດາວອນ ມະນີວັນ, ພາບ: ທະນູສີນ ອິດທິພົນ)

ສະແດງຄຳຄິດເຫັນ