ອີງຕາມ ໜັງສືເຊີນຂອງກົມສຸຂານາໄມພືດ ແລະ ສັດຕະວະແພດ ກະຊວງກະສິກຳ ແຫ່ງ ສ ຣັດເຊຍ ສະບັບລົງວັນທີ 5 ກັນຍາ 2025. ສະນັ້ນ, ໃນລະຫວ່າງວັນທີ 20-26 ກັນຍາ 2025 ຄະນະນຳຂອງກົມປູກຝັງ ຊຶ່ງນຳໂດຍ ທ່ານ ບຸນຈັນ ກົມບຸນຍະສິດ ຫົວໜ້າກົມປູກຝັງ ກະຊວງກະສິກຳ ແລະ ສິ່ງແວດລ້ອມ ໄດ້ເດີນທາງໄປເຄື່ອນໄຫວແລກປ່ຽນບົດຮຽນດ້ານສຸຂານາໄມພືດ ຢູ່ ສ ຣັດເຊຍ ໂດຍໄດ້ຮັບການຕ້ອນຮັບ ແລະ ເຮັດວຽກຮ່ວມກັບ ທ່ານ Alexander Vladimirovich Matviychuk ຮອງຫົວໜ້າກົມສຸຂານາໄມພືດ ແລະ ສັດຕະວະແພດ, ກະຊວງກະສິກຳ ແຫ່ງ ສ ຣັດເຊຍ ພ້ອມດ້ວຍ ຄະນະ.

ຈຸດປະສົງຂອງການລົງເຄື່ອນໄຫວວຽກງານໃນຄັ້ງນີ້ ແມ່ນເພື່ອປຶກສາຫາລື ແລະ ແລກປ່ຽນບົດຮຽນ ກ່ຽວກັບການຈັດຕັ້ງປະຕິບັດວຽກງານການກວດກາດ້ານສຸຂານາໄມພືດ, ການເຂົ້າເຖິງຕະຫຼາດສິນຄ້າກະສິກຳ ຂອງ ສ ຣັດເຊຍ ແລະ ປຶກສາຫາລື ເພື່ອຊອກຫາທ່າແຮງໃນການຮ່ວມມືດ້ານສຸຂານາໄມພືດຮ່ວມກັນ ໃນຕໍ່ໜ້າ. ສໍາລັບການເຄື່ອນໄຫວຄັ້ງນີ້ ທີມງານໄດ້ໄປຢ້ຽມຢາມເຮັດວຽກຢູ່ 3 ສະຖານທີ່ສຳຄັນ ຄື: 1. ທ່າກຳປັ່ນ Vysotsk ຊຶ່ງເປັນທ່າກໍາປັ່ນ ສໍາລັບການສົ່ງອອກສິນຄ້າກະສິກໍາປະເພດເມັດທັນຍາຫານ ເຊັ່ນ: ເຂົ້າບາເລ, ເຂົ້າວີດ ແລະ ສາລີ ພ້ອມທັງ, ຢ້ຽມຢາມຫ້ອງວິໄຈສະເພາະແຕ່ລະປະເພດ ທີ່ຕິດພັນກັບການກວດກາສຸຂານາໄມພືດ, ຄຸນນະພາບ ແລະ ຄວາມປອດໄພ ຂອງສິນຄ້າ ກ່ອນການສົ່ງອອກ; 2. ສູນວິໄຈກັກກັນພືດ FSBI “VNIIKR” ໄດ້ຢ້ຽມຢາມບັນດາຫ້ອງວິໄຈສະເພາະດ້ານ ເພື່ອແນໃສ່ຊອກຫາການຕິດແປດຂອງສັດຕູພືດກັກກັນ ແລະ ສັດຕູພືດບໍ່ກັກກັນ (ແມງໄມ້, ພະຍາດ, ຂີ້ກະເດືອນຝອຍ, ວັດສະພືດ) ຕໍ່ກັບສິນຄ້າກະສິກຳ ພ້ອມທັງ ການວິໄຈຫາສານຕົກຄ້າງ ເປັນຕົ້ນ ແມ່ນຢາປາບສັດຕູພືດ ໃນຜະລິດຕະພັນກະສິກຳ ແລະ 3. ສູນວິໄຈຄຸນນະພາບຜະລິດຕະພັນກະສິກຳ ຂັ້ນເມືອງ ແລະ ຂັ້ນແຂວງ FSI (FSI Center for Agriproducts Quality Assurance) ທີ່ຕິດພັນກັບການກວດກາດ້ານສຸຂານາໄມພືດ ຊຶ່ງປະຕິບັດໜ້າທີ່ໃນດ້ານການວິໄຈສານເຄມີຕົກຄ້າງ ເປັນຕົ້ນແມ່ນຢາປາບສັດຕູພືດ ໃນຜະ ລິດຕະພັນກະສິກຳ, ວິໄຈຫາອົງປະກອບຂອງຢາປາບສັດຕູພືດ, ຝຸ່ນ, ຄຸນນະພາບເມັດພັນພືດ, ທັນຍາພືດ, ຄຸນນະພາບການປຸງແຕ່ງທັນຍາພືດ ແລະ ການຕັດແຕ່ງພັນທຸກຳ.

ໂອກາດນີ້ 2 ຝ່າຍ ໄດ້ມີການປະຊຸມ ປຶກສາຫາລືວຽກງານຮ່ວມກັນ ກ່ຽວກັບ ທ່າແຮງໃນການຮ່ວມມືດ້ານສຸຂານາໄມພືດ ແລະ ການຄ້າຂາຍສິນຄ້າກະສິກຳ ແລະ ການນຳເຂົ້າຝຸ່ນຈາກ ຣັດເຊຍ ພ້ອມທັງ ເຊື້ອເຊີນໃຫ້ຝ່າຍ ສ ຣັດເຊຍ ໄປເຄື່ອນໄຫວ ແລະ ຢ້ຽມຢາມ ຢູ່ ສປປ ລາວ ໃນຕໍ່ໜ້າ.

(ຂ່າວ: ສອນເພັດ ສຸລິພອນ; ພາບ: ກົມປູກຝັງ)

ສະແດງຄຳຄິດເຫັນ