ບໍລິສັດ ລັດວິສາຫະກິດ ນ້ຳມັນເຊື້ອໄຟລາວ (ລນລ) ໄດ້ມີການຄົ້ນຄວ້າ ສຳຫຼວດ ຈັດຫາແຫຼ່ງພະລັງງານທີ່ມີຄຸນນະພາບ ເປັນຕົ້ນແມ່ນ ນ້ຳມັນເຊື້ອໄຟ ເພື່ອຮອງຮັບ ຄວາມຕ້ອງການຂອງ ປະຊາຊົນ, ເສດຖະກິດ ແລະ ອຸດສາຫະກຳຂອງປະເທດ.

ໃນປັດຈຸບັນ, ລນລ ໄດ້ນຳເຂົ້ານ້ຳມັນ ກາຊວນ ມາດຕະຖານ ຄຸນນະພາບ ຢູໂຣ 5 (EURO 5) ຜ່ານການຂົນສົ່ງທາງເຮືອກຳປັ່ນ ຈຳນວນ 2,600 ກວ່າໂຕນ ຫຼື 3,2 ລ້ານລິດ ມາຂຶ້ນທີ່ຈຸດ ທ່າເຮືອ ຫງິເຊີນ (Nghi Son) ແລ້ວບັນຈຸໄວ້ ສາງນ້ຳມັນແອັງຟາດ (Anh Phat Port) ແຂວງ ແທັງຮ໋ວາ (Thanh Hoa) ສສ ຫວຽດນາມ ຫຼັງຈາກນັ້ນ ກໍ່ຂົນສົ່ງຜ່ານດ່ານສາກົນ ນ້ຳກັ່ນ ແຂວງຊຽງຂວາງ ແລະ ດ່ານສາກົນ ນ້ຳໂສຍ ແຂງຫົວພັນ ເພື່ອຈຳໜ່າຍສູ່ພື້ນທີ່ພາກເໜືອຂອງ ສປປ ລາວ.

ການດຳເນີນງານຄັ້ງນີ້ ບໍ່ພຽງແຕ່ຊ່ວຍສ້າງ ຄວາມໝັ້ນຄົງດ້ານພະລັງງານ ເທົ່ານັ້ນ ແຕ່ຍັງເປັນການ ຍົກລະດັບມາດຕະຖານ ສິ່ງແວດລ້ອມ, ຕອບສະໜອງຕໍ່ການພັດທະນາທີ່ຍືນຍົງຂອງສັງຄົມ ແລະ ເສດຖະກິດໃນພູມສັນຖານຂອງ ປະເທດ.

ລນລ ພ້ອມທີ່ຈະກ້າວສູ່ການເດີນໜ້າພັດທະນາລະບົບ ການບໍລິການ ແລະ ການຂົນສົ່ງ ຢ່າງຕໍ່ເນື່ອງ ເພື່ອໃຫ້ ປະຊາຊົນໝັ້ນໃຈໄດ້ວ່າ ນ້ຳມັນເຊື້ອໄຟທີ່ໄດ້ຊົມໃຊ້ ມີຄຸນນະພາບ, ຄວາມປອດໄພ, ເປັນມິດຕໍ່ສິ່ງແວດລ້ອມ ແລະ ພາກອຸດສາຫະກຳ ກໍ່ສາມາດສະໜອງໄດ້ຢ່າງພຽງພໍຕາມຄວາມຕ້ອງການ.

ທີ່ມາ:LAO STATE FUEL COMPANY (LSFC) ລັດວິສາຫະກິດ ນໍ້າມັນເຊຶ້ອໄຟລາວ (ລນລ)

ສະແດງຄຳຄິດເຫັນ