
ເນື່ອງໃນໂອກາດງານວາງສະແດງຜະລິດຕະພັນລາວ 2025 (Made In Lao 2025) ທີ່ເປີດຂຶ້ນຢ່າງເປັນທາງການໃນວັນທີ 3 ຕຸລາຜ່ານມາ ທີ່ສູນການຄ້າລາວ-ໄອເຕັກ. ທ່ານ ລັງກອນ ໄຊຍະວົງ ປະທານບໍລິສັດ ທັງເປັນຜູ້ສ້າງຕັ້ງໂຮງງານອຸດສາຫະກໍາໂຕໂຢລາວ ຈໍາກັດ ຜູ້ດຽວ ໄດ້ໃຫ້ສໍາພາດຕໍ່ສື່ມວນຊົນວ່າ: ຕົນເອງມີຄວາມຮູ້ສຶກເປັນກຽດ, ດີໃຈ ແລະ ພາກພູມໃຈທີ່ສະພາການຄ້າ ແລະ ອຸດສາຫະກໍາແຫ່ງຊາດລາວ (ສຄອຊ) ໄດ້ໃຫ້ໂອກາດຜູ້ປະກອບການພາຍໃນໄດ້ນໍາສິນຄ້າຕ່າງໆ ຂອງຕົນເຂົ້າຮ່ວມວາງສະແດງ-ຂາຍຢ່າງຄັບຄາໜາແໜ້ນ ໂດຍສະເພາະໂຮງງານອຸດສາຫະກໍາໂຕໂຢລາວ ຈໍາກັດ ຜູ້ດຽວ ກໍໄດ້ນໍາເອົາຜະລິດທໍ່ໂຕໂຢມາວາງສະແດງ-ຂາຍໃນຄັ້ງນີ້ ຊຶ່ງຜະລິດທໍ່ໂຕໂຢ ເປັນໜຶ່ງຜະລິດຕະພັນຂອງລາວທີ່ມີຊື່ສຽງ, ມີຄຸນນະພາບລະດັບສາກົນເພື່ອຕອບສະໜອງຄວາມຕ້ອງການຕະຫຼາດພາຍໃນ.
 
					
					
				
ທ່ານ ລັງກອນ ໄຊຍະວົງ ກ່າວວ່າ: ໂຮງງານອຸດສາຫະກໍາທໍ່ໂຕໂຢລາວ ເປັນໜຶ່ງໂຮງງານອຸດສາຫະກໍາ ທີ່ເປັນສະມາຊິກຂອງ ສຄອຊ ທີ່ສ້າງຜະລິດຕະພັນລາວເລີ່ມແຕ່ປີ 2016 ຊຶ່ງຜະລິດຕະພັນຫຼັກແມ່ນຮັບໃຊ້ພື້ນ ຖານໂຄງລ່າງກ່ຽວກັບລະບົບນໍ້າ, ເລີ່ມຈາກລະບົບນໍ້າປະປາໃນຕົວເມືອງຈົນຮອດລະບົບນໍ້າປະປາຊົນນະບົດ. ພ້ອມນັ້ນ, ຍັງມີລະບົບນໍ້າໃນການກໍ່ສ້າງເຄຫາສະຖານ, ບ້ານເຮືອນ, ໂຮງແຮມ, ໂຮງງານອຸດສາຫະກໍາ, ເຂດເສດຖະກິດພິເສດ, ລະບົບຊົນລະປະທານ, ລະບົບການກະເສດ ການປູກຝັງ-ລ້ຽງສັດ ລວມທັງລະບົບນໍ້າທີ່ໃຊ້ໃນຂະແໜງການພະລັງງານ-ບໍ່ແຮ່ ແລະ ການບໍາບັດນໍ້າເປື້ອນ, ລະບາຍນໍ້າຂັງໃນຕົວເມືອງ. ປັດຈຸບັນຍັງມີທໍ່ຫຸ້ມຜະ ລິດຕະພັນໃໝ່ໃນປີ 2025 ຄື: ທໍ່ຫຸ້ມສາຍໄຟ, ທໍ່ຫຸ້ມສາຍສົ່ງສັນຍານລະບົບໂທລະຄົມ ເພື່ອແກ້ໄຂບັນຫາສາຍໄຟທີ່ບໍ່ເໝາະສົມ ທີ່ບົດບັງທັດສະນີຍະພາບທີ່ສວຍງາມຂອງຕົວເມືອງ. ພ້ອມນັ້ນ, ຍັງໄດ້ຄົ້ນຄວ້າກັບຂະແໜງການກ່ຽວຂ້ອງໃນການນໍາເອົາສາຍໄຟຟ້າລົງດິນໃນອະນາຄົດອັນໃກ້ນີ້. ສໍາລັບການມາວາງສະແດງໃນຄັ້ງນີ້, ພວກເຮົາມີຄວາມຄາດຫວັງສູງ ຊຶ່ງປີນີ້ພວກເຮົາມີຜະລິດຕະພັນຫຼາກຫຼາຍທີ່ເອົາມາວາງສະແດງໃຫ້ປະຊາຊົນລາວໄດ້ຮັບຮູ້ ໂດຍມີແຄັມເປນມານໍາສະເໜີຄື: ທໍ່ອຸດສາຫະກໍາ, ທໍ່ຂະໜາດໃຫຍ່ທີ່ໃຊ້ໃນໂຄງການບໍ່ແຮ່. ແຕ່ປີນີ້, ແມ່ນເອົາທໍ່ນໍ້າທີ່ໃຊ້ໃນໂຄງການຄົວເຮືອນ ແລະ ພາກທຸລະກິດບໍລິການ ແລະ ພາກທຸລະກິດດ້ານກະສິກໍາ. ພິເສດໄປກວ່ານັ້ນໄດ້ນໍາໃຊ້ເທັກໂນໂລຊີປະຢັດນໍ້າຈາກອິດສະລາເອວ, ຈາກບັນດາປະເທດຕາເວັນອອກກາງມາວາງສະແດງ ແລະ ຈັດຈໍາໜ່າຍຢູ່ປະເທດລາວ. ປັດຈຸບັນຢູ່ໂຮງງານອຸດສາຫະກໍາທໍ່ນໍ້າໂຕໂຢລາວມີທໍ່ລະບົບນໍ້າຢອດ, ນໍ້າພຸ້ງອີກດ້ວຍ.
 
ທ່ານ ລັງກອນ ໄຊຍະວົງ ກ່າວຕື່ມວ່າ: ໃນຂະແໜງການທີ່ພວກເຮົາໄດ້ພັດທະນາມີ 8 ຂະແໜງການ ໂດຍມີກຸ່ມລູກຄ້າທີ່ຕ້ອງການສິນຄ້າມາດຕະຖານສາກົນ ກວມ 80%, ກຸ່ມຄົວເຮືອນ, ກຸ່ມຮ້ານຂາຍເຄື່ອງວັດສະດຸກໍ່ສ້າງທີ່ຕ້ອງການເຄື່ອງຄຸນນະພາບລະດັບກາງຫາລ່າງ ກວມຢູ່ລະດັບ 40-50%. ປະເທດລາວມີໂຮງງານທີ່ໄດ້ມາດຕະຖານຫຼາຍແຫ່ງ ແຕ່ພວກເຮົາກໍໄດ້ພັດທະນາສິນຄ້າຂອງຕົນໂດຍເນັ້ນໃສ່ຄຸນນະພາບມາດຕະຖານສາກົນ ລາຄາບໍ່ແພງຄົນລາວສາມາດຈັບຕ້ອງ ແລະ ຊື້ໃຊ້ໄດ້. ສະນັ້ນ, ຖ້າຫາກທ່ານໄດ້ມາທ່ຽວງານວາງສະແດງຜະ ລິດຕະພັນລາວທີ່ຈັດຂຶ້ນໃນວັນທີ 1-8 ຕຸລາ 2025 ນີ້ ກໍສາມາດມາແວ່ເບິ່ງ ແລະ ຊ່ວຍກັນສົ່ງເສີມຜະລິດຕະພັນລາວ ໂດຍສະເພາະຜະລິດຕະພັນທໍ່ໂຕໂຢລາວ ຊຶ່ງເປັນຜະລິດຕະພັນລາວມີຄຸນນະພາບລະດັບສາກົນ ເພື່ອເປັນການຮັກສາທຶນ, ຮັກສາແຫຼ່ງເງິນໄວ້ໃນປະເທດລາວ ດັ່ງຄໍາເວົ້າທີ່ວ່າ: ລາວເຮັດ ລາວໃຊ້ ລາວໄດ້ ລາວຈະເລີນ.
 
ໂດຍ: ວັນເພັງ
ສະແດງຄຳຄິດເຫັນ
ອັດຕາແລກປ່ຽນ
| ສະກຸນເງິນ | ຊື້ | ຂາຍ | 
|---|---|---|
|  USD | 21,527 | 21,804 | 
|  THB | 664.10 | 675.39 | 
|  EUR | 23,974 | 24,454 | 
|  CNY | 2,942 | 3,000 | 
ລາຄານ້ຳມັນ
| ຊະນິດນ້ຳມັນ | ລາຄາ | 
|---|---|
|  | 28,780 | 
|  | 23,700 | 
|  | 19,620 | 
ລາຄາຄຳ
| ປະເພດ | ລາຄາຊື້ | ລາຄາຂາຍ | 
|---|---|---|
|  | 42,920,000 | 43,450,000 | 
|  | 42,426,000 | 43,559,000 | 
 
								 
								 
															 
								








