
ງານປະກວດເຮືອໄຟງາມ ໃນບຸນອອກພັນສາປະວໍລະນາ ຢູ່ນະຄອນ ຫຼວງພະບາງ ເມືອງມໍລະດົກໂລກ ປີນີ້ ຈັດຂຶ້ນໃນຕອນຄໍ່າ ຂອງວັນທີ 8 ຕຸລານີ້ ມີການຂອງແຂວງຫຼວງພະບາງ, ຄະນະກຳມະການ, ແຂກຮັບເຊີນ ຕະຫຼອດຮອດມວນຊົນ, ແຂກທັງພາຍໃນ ແລະ ຕ່າງປະເທດ ເຂົ້າຮ່ວມຢ່າງຫຼວງຫຼາຍ.
 
					
					
				
ໃນງານປະກວດ ເລີ້ມຕົ້ນຈາກການທຳພິທີທາງສາສະໜາ, ສະຫຼອງເຮືອໄຟ ຢູ່ວັດປ່າຮວກ ໜ້າຫໍພິພິທະພັນແຫ່ງຊາດຫຼວງພະບາງ. ຈາກນັ້ນ, ທ່ານ ສໍານານ ສົນທະນີ ປະທານຈັດງານປະກວດເຮືອໄຟງາມ ປະຈຳປີ ພສ 2568, ຄສ 2025 ໄດ້ກ່າວເປີດງານວ່າ: ພໍເຖິງຄ່ຳຄືນຂອງມື້ແຮມ 1 ຄໍ່າ ເດືອນ 11 ລາວຂອງທຸກໆປີ ປະຊາຊົນບັນດາເຜົ່າຊາວຫຼວງພະບາງທຸກຖ້ວນໜ້າ ໄດ້ພ້ອມກັນຈັດພິທີເທດສະຫຼອງເຮືອໄຟ ຢູ່ທີ່ວັດປ່າຮວກ ແລະ ປະກວດເຮືອໄຟງາມຂຶ້ນ ເພື່ອສະແດງເຖິງວັດທະນະທໍາອັນຍອດຍິ່ງ ຂອງຊາວຫຼວງພະບາງ ຊຶ່ງຈະໄດ້ແຫ່ຂະບວນໄປຕາມຖະໜົນສີສະຫວ່າງວົງ ຈົນເຖິງທ່ານ້ຳວັດຊຽງທອງ ແລ້ວໄຫຼລົງສູ່ແມ່ນ້ຳຂອງ ເພື່ອບູຊາຄຸນຂອງພະແມ່ຄົງຄາ, ນ້ອມລະນຶກເຖິງຄຸນຂອງພະພຸດ ພະທຳ-ພະສົງ ແລະ ຂໍພອນໃຫ້ມີຄວາມຈະເລີນຮຸ່ງເຮືອງ, ຄວາມຢູ່ເຢັນເປັນສຸກ-ສີວິໄລ ເໝືອນດັ່ງແສງທຽນ-ແສງໄຟທີ່ໄຕ້ບູຊາສະຫວ່າງສະໄຫວ ຊຶ່ງເປັນປະເພນີ ສຶບທອດກັນມາແຕ່ບູຮານນະການຈົນເຖິງປັດຈຸບັນ. ບຸນໄຫຼເຮືອໄຟປີນີ້ ມີເຮືອໄຟເຂົ້າຮ່ວມປະກວດທັງໝົດ 17 ລໍາ ມາຈາກບັນດາບ້ານ ພາຍໃນເທສະບານນະຄອນ, ສະຖາບັນການສຶກສາ, ໂຮງຮຽນ, ຫົວໜ່ວຍທຸລະກິດ ແລະ ມີເຮືອໄຟປະກອບສ່ວນ ສະເຫຼີມສະຫຼອງຫຼວງພະບາງ ເຂົ້າມໍລະດົກໂລກ ຈໍານວນ 1 ລໍາ.
 
ພາຍຫຼັງເປີດພິທີຢ່າງເປັນທາງການ ເຮືອໄຟແຕ່ລະຂະບວນ ໄດ້ເຄື່ອນໄປຕາມເສັ້ນທາງສີສະຫວ່າງວົງ ຫາທ່ານ້ຳຂອງວັດຊຽງທອງ ແລ້ວນຳເອົາເຮືອໄຟໄຫຼລົງແມ່ນ້ຳຂອງ ຊຶ່ງຄະນະກຳມະການ ໄດ້ກຳນົດ 6 ມາດຖານຂອງການປະກວດຄື: ມາທັນເວລາ ແລະ ຕັ້ງຂະບວນເປັນລະບຽບ, ໂຄງສ້າງ ແລະ ສິລະປະການຕົບແຕ່ງ ເຮັດດ້ວຍວັດສະດຸທຳມະຊາດ ແລະ ມີຄວາມສວຍງາມ, ຮູບຮ່າງ ແລະ ແນວຄິດສ້າງສັນ, ຂະບວນແຫ່ມີຄວາມເປັນລະບຽບ ແລະ ນຸ່ງຖືສຸພາບ, ແສງໄຟ ໃຫ້ຄວາມສະຫວ່າງໃນເວລາແຫ່, ແສງໄຟໃຫ້ຄວາມສະຫວ່າງ ໃນເວລາລົງນ້ຳບໍ່ມອດ ແລະ ເຮືອໄຟບໍ່ຈົມ.
 
(ແຫຼ່ງຂ່າວ: ແຂວງຫຼວງພະບາງ)
ສະແດງຄຳຄິດເຫັນ
ອັດຕາແລກປ່ຽນ
| ສະກຸນເງິນ | ຊື້ | ຂາຍ | 
|---|---|---|
|  USD | 21,527 | 21,804 | 
|  THB | 664.10 | 675.39 | 
|  EUR | 23,974 | 24,454 | 
|  CNY | 2,942 | 3,000 | 
ລາຄານ້ຳມັນ
| ຊະນິດນ້ຳມັນ | ລາຄາ | 
|---|---|
|  | 28,780 | 
|  | 23,700 | 
|  | 19,620 | 
ລາຄາຄຳ
| ປະເພດ | ລາຄາຊື້ | ລາຄາຂາຍ | 
|---|---|---|
|  | 42,920,000 | 43,450,000 | 
|  | 42,426,000 | 43,559,000 | 
 
								 
								 
															 
								








