ບໍ່ດົນມານີ້, ມີຄລິບຈາກຕ່າງປະເທດກາຍເປັນໄວຣັສໃນຈີນ ເປັນພາບຄົນຢືນຢູ່ໜ້າຕູ້ຈ່າຍເຈ້ຍຢ່າງທິດຊູໃນຫ້ອງນ້ຳສາທາລະນະ ສິ່ງທີ່ໜ້າສົນໃຈແມ່ນລາວບໍ່ໄດ້ຈ່າຍເງິນເພື່ອຊື້ເຈ້ຍຢ່າງທິດຊູ ແຕ່ສະແກນ QR Code ເພື່ອເບິ່ງໂຄສະນາ ຫຼັງຈາກນັ້ນທິດຊູກໍໄຫຼອອກມາໃຫ້ແບບອັດຕະໂນມັດ! ນີ້ຄືທີ່ມາຂອງໄວຣັສ ‘ເບິ່ງໂຄສະນາແລກເຈ້ຍຢ່າງທິດຊູ’

ຫຼັກການເຮັດວຽກຂອງເຄື່ອງນີ້ງ່າຍຫຼາຍ ທ່ານສາມາດຈ່າຍເງິນເພື່ອຊື້ທິດຊູໄດ້ເລີຍ ແຕ່ຖ້າຢາກໄດ້ຟຣີກໍມີທາງເລືອກໃຫ້ສະແກນ QR Code ເພື່ອເບິ່ງໂຄສະນາແລກເຈ້ຍຢ່າງທິດຊູແທນການຈ່າຍເງິນ ໄອເດຍນີ້ຖືວ່າສະຫຼາດທັນສະໄໝໃນມຸມມອງດ້ານການຕະຫຼາດ ທັງຍັງແປກໃໝ່ແລະມີປະໂຫຍດທັງສອງຝ່າຍ

ຄົນທີ່ໃຊ້ຫ້ອງນ້ຳ > ໄດ້ທິດຊູຟຣີ (ໃຜຈະບໍ່ຢາກໄດ້ຂອງຟຣີ) ຄົນທີ່ລົງໂຄສະນາ > ໂຄສະນາຈະມີຄົນເບິ່ງແນ່ນອນ ເພາະຄົນຕ້ອງການທິດຊູຟຣີ ແລະວິທີນີ້ດີກວ່າການໄປລົງໃນແພລັດຟອມອື່ນໆ ເຊັ່ນ YouTube ທີ່ຄົນມັກຈະຂ້າມໂຄສະນາ

ແນ່ນອນວ່າປະເດັນນີ້ກໍມີຄົນໂຕ້ວາທີກັນຫຼາຍວ່າ ການເຮັດແບບນີ້ໃນຫ້ອງນ້ຳສາທາລະນະມັນເໝາະສົມບໍ່ ເພາະບາງຄົນກໍມອງວ່າ ທິດຊູໃນຫ້ອງນ້ຳສາທາລະນະຄວນໃຫ້ຟຣີຢູ່ແລ້ວ ຫຼືນີ້ແມ່ນການເອົາປຽບ? ໃນຂະນະທີ່ອີກຝ່າຍກໍມອງວ່ານີ້ຄືການຕະຫຼາດທີ່ອັດສະລິຍະທີ່ສຸດ

ກ່ອນອື່ນເຮົາຕ້ອງເຂົ້າໃຈກ່ອນວ່າໃນປະເທດຈີນ ການທີ່ຄົນສ່ວນໃຫຍ່ຕ້ອງຖືເຈ້ຍຢ່າງທິດຊູເຂົ້າໄປໃຊ້ເອງຖືເປັນເລື່ອງປົກກະຕິຢູ່ແລ້ວ ດັ່ງນັ້ນ ການທີ່ມີຕູ້ຈ່າຍທິດຊູແບບນີ້ຈຶ່ງຖືເປັນກໍລະນີຫາຍາກ ແລະບໍ່ຄ່ອຍໄດ້ເຫັນເລື້ອຍໆ ໃນຫ້ອງນ້ຳສາທາລະນະທົ່ວໄປຂອງຈີນ

ກິມມິກນ້ອຍໆ ແບບນີ້ບໍ່ພຽງແຕ່ສ້າງຄວາມແປກໃໝ່ເທົ່ານັ້ນ ແຕ່ໃນແງ່ໜຶ່ງກໍສະທ້ອນໃຫ້ເຫັນເຖິງຄວາມເປັນ ‘ທຶນນິຍົມ’ ທີ່ສາມາດແຊກຊຶມເຂົ້າໄປຢູ່ໃນເກືອບຈະທຸກພື້ນທີ່ຂອງສັງຄົມໄດ້ເປັນຢ່າງດີ

ເພາະທິດຊູຄືຂໍ້ມູນຟຣີ: ເຂົ້າສູ່ຍຸກ ‘Unskippable Ads’ ແລະການ ຕະຫຼາດທີ່ຊຶມເລິກທຸກພື້ນທີ່

ຕູ້ຈ່າຍເຈ້ຍຢ່າງທິດຊູແລກກັບການເບິ່ງໂຄສະນາເປັນກໍລະນີສຶກສາທີ່ສະທ້ອນເຖິງຍຸກສະໄໝຂອງທຶນນິຍົມດິຈິຕອນທີ່ຝັງຮາກໃນທຸກພື້ນທີ່ ເທັກໂນໂລຊີໄດ້ເຂົ້າມາປ່ຽນຄວາມຈຳເປັນພື້ນຖານໃນຊີວິດປະຈຳວັນຄືທິດຊູໃນຫ້ອງນ້ຳສາທາລະນະໃຫ້ກາຍເປັນກົນໄກທາງການຕະຫຼາດ ແທນທີ່ຈະຈ່າຍດ້ວຍເງິນສົດ ຜູ້ບໍລິໂພກຖືກກະຕຸ້ນໃຫ້ຈ່າຍດ້ວຍ ‘ຄວາມສົນໃຈ’ ແລະ ‘ເວລາ’ ເພື່ອແລກກັບສິນຄ້າຫຼືບໍລິການຟຣີ

ກົນໄກແບບນີ້ສົ່ງຜົນໃຫ້ໂຄສະນາກາຍເປັນສິ່ງທີ່ບໍ່ສາມາດຫຼີກລ່ຽງໄດ້ ແລະມີປະສິດທິພາບສູງກວ່າແພລັດຟອມດິຈິຕອນທົ່ວໄປຫຼາຍ ການທີ່ລະບົບເສດຖະກິດສາມາດປ່ຽນທຸກພື້ນທີ່ແລະກິດຈະກຳໃນຊີວິດໃຫ້ກາຍເປັນ ‘ພື້ນທີ່ສື່ໂຄສະນາທີ່ສ້າງລາຍໄດ້’ ໄດ້ຢ່າງສົມບູນ ສະທ້ອນໃຫ້ເຫັນແນວໂນ້ມໃນໂລກອະນາຄົດວ່າ ບໍ່ມີຂອບເຂດໃດທີ່ຮອດພົ້ນຈາກກົນໄກຕະຫຼາດອີກຕໍ່ໄປ ດ້ວຍເຫດນີ້ ຂໍ້ມູນແລະຄວາມສົນໃຈຂອງຜູ້ໃຊ້ງານຈຶ່ງມີມູນຄ່າແລະອຳນາດເໜືອກວ່າເງິນສົດ ແມ່ນແຕ່ການເຂົ້າເຖິງບໍລິການຂັ້ນພື້ນຖານທີ່ສຸດ

ຈາກກໍລະນີນີ້ໂລກອະນາຄົດແບບໃນໜັງໄຊໄຟອາດຈະບໍ່ໄດ້ຢູ່ແຕ່ໃນຈໍອີກຕໍ່ໄປ ເພາະບໍ່ແນ່ທຸກວັນນີ້ເຮົາອາດກຳລັງຢູ່ໃນໂລກທີ່ກ້າວໜ້າຈົນເຮົາເອງບໍ່ທັນໄດ້ສັງເກດກໍໄດ້!

ທີ່ມາ: X

ສະແດງຄຳຄິດເຫັນ