ວັນທີ 11 ຕຸລາຜ່ານມານີ້, ພະແນກການຕ່າງປະເທດ ແຂວງຄໍາມ່ວນ ໄດ້ຈັດພິທີ “ຍ່າງເພື່ອສຸຂະພາບ” ເນື່ອງໃນໂອກາດສະເຫຼີມສະຫຼອງ ວັນການທູດລາວ ຄົບຮອບ 80 ປີ ທີ່ຈະໝູນວຽນມາ ບັນຈົບຄົບຮອບອີກວາລະໜຶ່ງ (ວັນທີ 12 ຕຸລາ 1945-12 ຕຸລາ 2025) ໂດຍການໃຫ້ກຽດເຂົ້າຮ່ວມຂອງ ທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງໆຄໍາມ່ວນ, ມີບັນດາຄະນະນຳຂັ້ນແຂວງ, ເມືອງທ່າແຂກ ແລະ ອົງການຈັດຕັ້ງສັງຄົມ ທັງພາກລັດ ແລະ ເອກະຊົນ ອ້ອມຂ້າງແຂວງເຂົ້າຮ່ວມຢ່າງຫຼວງຫຼາຍ.

ທ່ານ ແກ້ວອຸດອນ ບຸດສິງຂອນ ໄດ້ຍົກໃຫ້ເຫັນໂດຍສັງເຂບກ່ຽວກັບວັນການທູດລາວ ຊຶ່ງກົງກັບວັນທີ 12 ຕຸລາ ຂອງທຸກໆປີ ເປັນວັນທີ່ມີຄວາມໝາຍສໍາຄັນທາງ ປະຫວັດສາດຂອງວຽກງານການທູດລາວ ຊຶ່ງຕິດພັນຢ່າງສະໜິດແໜ້ນກັບຂະບວນການປະຕິວັດ ປົດປ່ອຍຊາດ, ເປັນການລະນຶກເຖິງຄຸນງາມຄວາມດີ ແລະ ຜົນງານອັນລໍ້າຄ່າຂອງປະຊາຊົນລາວ ວິລະຊົນຜູ້ໄຝ່ຫາຄວາມເປັນເອກະລາດແຫ່ງຊາດ ແລະ ຮັກຫອມສັນຕິພາບໄດ້ປະກາດເອກະລາດ ແລະ ແນວທາງນະໂຍບາຍການຕ່າງປະເທດຂອງຕົນໃຫ້ປະຊາຄົມໂລກໄດ້ຮັບຮູ້. ທັງໄດ້ຫວນຄືນໃຫ້ເຫັນຜົນງານການເຄື່ອນໄຫວຕະຫຼອດໄລຍະ 8 ທົດສະວັດທີ່ຜ່ານມາ ຂອງວຽກງານການທູດ, ການຕ່າງປະເທດ ຢູ່ ສປປ ລາວ ເພື່ອໃຫ້ທຸກພາກສ່ວນທີ່ເຂົ້າຮ່ວມ ໄດ້ຮັບຮູ້ ແລະ ເຂົ້າໃຈ ຢ່າງຖືກຕ້ອງຕໍ່ແນວທາງນະໂຍບາຍຂອງພັກ-ລັດ ໃນການພັດທະນາວຽກງານດັ່ງກ່າວ ແຕ່ລະໄລຍະ. ທັງຖືໂອກາດນີ້ສະແດງຄວາມຮູ້ບຸນຄຸນ ແລະ ຂອບໃຈຢ່າງຈິງໃຈ ມາຍັງບັນດາທ່ານການນໍາພັກ-ລັດ ແລະ ບັນດາຕາງໜ້າຂະແໜງການທຸກພາກສ່ວນ ທີ່ໄດ້ເສຍສະຫຼະເວລາເຂົ້າຮ່ວມໃນກິດຈະກຳ ຍ່າງເພື່ອສຸຂະພາບໃນຄັ້ງນີ້. ເປັນການສ່ອງແສງເຖິງຄວາມປາດຖະໜາທີ່ຢາກມີສຸຂະພາບແຂງແຮງ, ມີກໍາລັງວັງຊາ ເພື່ອສືບຕໍ່ປະຕິບັດພາລະກິດ ແລະ ໜ້າທີ່ວຽກງານອັນມີກຽດສະຫງ່າຂອງຕົນ ໃຫ້ສໍາເລັດຕາມຈຸດປະສົງເປົ້າໝາຍ.

ໃນການຍ່າງຄັ້ງນີ້ແມ່ນ ໂດຍເລີ່ມຕົ້ນຈາກ ສໍານັກງານຫ້ອງວ່າການເມືອງທ່າແຂກ ໄປຫາສີ່ແຍກໂຮງແຮມໄຊລືດີ ແລ້ວສືບຕໍ່ຍ່າງໄປຫາສີ່ແຍກ ປກສ ແຂວງ ລ້ຽວຂວາໄປຜ່ານສີ່ແຍກໄຟແດງສຶກສາ ມຸ່ງໜ້າສູ່ຫໍຈາລຶກ ວິລະກຳ 21 ມີນາ ແລ້ວຍ່າງລ້ຽວຂວາໄປສູ່ຈຸດໝາຍເດີມທີ່ຈຸດເລີ່ມຕົ້ນທີ່ສໍານັກງານຫ້ອງວ່າການເມືອງທ່າແຂກ ລວມໄລຍະທາງ ປະມານ 4 km.

(ແຫຼ໋ງຂ່າວ: ແຂວງຄໍາມ່ວນ)

ສະແດງຄຳຄິດເຫັນ