ຮ້ານຈຳໜ່າຍເຄື່ອງກິລາຊື່ດັງໃນ ສປປ ລາວ ໄອສະປອດ (Ai-Sport) ຜະລິດຕະພັນເຄື່ອງກິລາພິມລາຍ ໃຫ້ການສະໜັບສະໜູນເຄື່ອງຝຶກຊ້ອມກິລາເຕະບານຍິງ ຈຳນວນ 30 ຊຸດ ລວມມູນຄ່າ 6 ລ້ານກວ່າກີບ ໃຫ້ແກ່ທີມນັກກິລາເຕະບານຍິງ ນະຄອນຫຼວງວຽງຈັນ ຫຼື ນວ ເພື່ອກຽມຄວາມພ້ອມປ້ອງກັນແຊັມຫຼຽນຄຳ ສະໄໝທີ 7 ໃນງານມະຫະກຳກິລາແຫ່ງຊາດ ຄັ້ງທີ XII ທີ່ນະຄອນຫຼວງວຽງຈັນ ຮັບກຽດເປັນເຈົ້າພາບ ລະຫວ່າງວັນທີ 15-25 ພະຈິກນີ້.

ພິທີມອບ-ຮັບການສະໜັບສະໜູນ ໄດ້ຈັດຂຶ້ນ ໃນວັນທີ 22 ຕຸລາ ຜ່ານມາ ທີ່ສະ ໜາມກິລາເຕະບານຫຍ້າທຽມ ລ້ານຊ້າງ ເຂດບ້ານໜອງໄຮ ເມືອງຫາດຊາຍຟອງ ນະຄອນຫຼວງວຽງຈັນ. ກ່າວມອບໂດຍທ່ານ ໄພລະຄອນ ບຸນວິຊຽນ ເຈົ້າຂອງຮ້ານ ເຄື່ອງກິລາພິມລາຍ ໄອສະປອດ (Ai-Sport) ແລະ ຕາງໜ້າກ່າວຮັບໂດຍທ່ານ ບຸນມີ ໄຊຍະວົງ ຄະນະບໍລິຫານງານສະຫະພັນບານເຕະນະຄອນຫຼວງວຽງຈັນ ທັງເປັນຜູ້ຈັດການທີມເຕະບານຍິງ ນວ ມີຄະນະຄູຝຶກ, ນັກກິລາ ແລະ ສື່ມວນຊົນຈຳນວນໜຶ່ງເຂົ້າຮ່ວມ.

ໃນການມອບເຄື່ອງກິລາໃນຄັ້ງນີ້ ແມ່ນມີຈຸດປະສົງສະໜັບສະໜູນເພື່ອໃຫ້ກຳລັງໃຈທີມເຕະບານຍິງ ນວ ເຂົ້າໃນການຝຶກຊ້ອມ ເພື່ອກຽມຄວາມພ້ອມປ້ອງກັນແຊັມຫຼຽນຄຳ ສະໄໝທີ 7 ໃນງານມະຫະກຳກິລາແຫ່ງຊາດ ຄັ້ງທີ XII.

ຂ່າວ: ສົງການ

ສະແດງຄຳຄິດເຫັນ