ໃນວັນທີ 26 ຕຸລານີ້ ທີ່ທ່ານ້ຳບ້ານເກິນກາງ ຫາດຊາຍທຽມ ເມືອງທຸລະຄົມ ແຂວງວຽງຈັນ ໄດ້ຈັດການແຂ່ງຂັນຊ່ວງເຮືອປະເພນີ ປະຈໍາປີ 2025 ຂຶ້ນໂດຍການເຂົ້າຮ່ວມຂອງທ່ານ ພູວົງ ບຸນຊູ ຮອງເຈົ້າແຂວງວຽງຈັນ, ມີທ່ານ ນາງ ວົງເດືອນ ວັດຕະໂສ ເລຂາເມືອງ ທຸລະຄົມ ພ້ອມດ້ວຍ ປະຊາຊົນເປັນຈຳນວນຫຼວງຫຼາຍເຂົ້າຮ່ວມຊົມ.

ທ່ານ ບຸນເລີດ ສີຫາປັນຍາ ປະທານຄະນະກຳມະການປົກຄອງເມືອງທຸລະຄົມໄດ້ລາຍງານວ່າ: ງານບຸນຊ່ວງເຮືອປີນີ້, ໄດ້ກໍານົດຄົບງັນ 7 ວັນ. ໃນນັ້ນ, ວັນທີ 25 ຕຸລາ 2025 ແຂ່ງຂັນກິລາເຮືອຊ່ວງປະເພດ 12 ສີພາຍ, ສໍາລັບມື້ນີ້ກົງກັບວັນທີ 26 ຕຸລາ 2025 ເປັນມື້ເປີດງານບຸນ ແລະ ແຂ່ງຂັນຊ່ວງເຮືອຍາວປະເພນີ ປະເພດ 55 ສີພາຍ, ຊຶ່ງລ້ວນແລ້ວແຕ່ແມ່ນເຮືອເຂດບ້ານລ້ອງງື່ມ, ກິດຈະກໍາພາຍໃນງານປະກອບມີຕະຫຼາດນັດວາງສະແດງຂາຍສິນຄ້າປະເພດອຸປະໂພກ ແລະ ບໍລິໂພກ, ສິນຄ້າໂອດ໋ອບ, ສິນຄ້າກະສິກໍາ, ຫັດຖະກໍາ, ຮ້ານວາງສະແດງສິນຄ້າຂອງບັນດາທະນາຄານ, ລັດວິສາຫະກິດ, ເຄື່ອງຫຼິ້ນເດັກ ແລະ ອື່ນໆ ຄືກັບປີຜ່ານມາ, ພິເສດມີການເສບຄົບງັນດ້ວຍວົງດົນຕີຊື່ດັງຈາກລາວແດນໃຕ້ ວົງເທບພອນໄຊ ມາສ້າງບັນຍາກາດໃຫ້ແກ່ງານອີກດ້ວຍ.

ທ່ານ ນາງ ວົງເດືອນ ວັດຕະໂສ ໄດ້ຂຶ້ນກ່າວເປີດການແຂ່ງຂັນຊ່ວງເຮືອປະເພນີ ປະຈຳປີ2025 ຢ່າງເປັນທາງການ ພ້ອມນີ້ ທ່ານ ພູວົງ ບຸນຊູ ໄດ້ໃຫ້ກຽດລັ່ນຄ້ອງ 9 ບາດເພື່ອເປັນສິຣິມຸງຄຸນໃນບຸນຊ່ວງເຮືອປະເພນີປະຈຳປີ 2025 ຢ່າງເປັນຂະບວນຟົດຟື້ນ.

(ແຫຼ່ງຂ່າວ: ແຂວງວຽງຈັນ)

ສະແດງຄຳຄິດເຫັນ