ແຫລ່ງຂ່າວຈາກ ແຂວງຫລວງພະບາງ ໃຫ້ຮູ້ວ່າ: ຂະແໜງປິ່ນປົວຕາ ໂຮງໝໍແຂວງຫລວງພະບາງ ໄດ້ເປີດພິທີການຜ່າຕັດແກ່ນຕາຂຸ້ນ ໂດຍບໍເສຍຄ່າ ໃຫ້ປະຊາຊົນແຂວງຫລວງພະບາງ ໃນວັນທີ 26 ຕຸລາ 2025 ໂດຍມີ ທ່ານ ບຸນເລື່ອມ ມະນີວົງ ເລຂາຄະນະບໍລິຫານງານພັກ ແຂວງຫລວງພະບາງ ພ້ອມດ້ວຍຜູ້ອຳນວຍການສູນປິ່ນປົວ ແລະ ຮັກສາສຸຂະພາບຕາທົ່ງປົງ, ຫົວໜ້າພະແນກສາທາລະນະສຸກແຂວງ ແລະ ປະຊາຊົນ ທີ່ເປັນພະຍາດແກ່ນຕາຂຸ້ນ ເຂົ້າຮ່ວມ.

ທ່ານ ພູວະນາ ອານຸລັກຄຳ ອຳນວຍການໂຮງໝໍແຂວງຫລວງພະບາງ ໄດ້ກ່າວວ່າ: ໃນລະຫວ່າງວັນທີ 21-23 ຕຸລາ 2025 ໄດ້ມີການກວດວັດສາຍຕາ ແລະ ແຈກແວ່ນຕາ ໃຫ້ປະຊາຊົນແຂວງຫລວງພະບາງ 3.000 ອັນ ພ້ອມທັງໄດ້ກວດພົບປະຊາຊົນເປັນພະຍາດແກ່ນຕາຂຸ້ນ 116 ຄົນ. ພ້ອມນີ້, ໄດ້ມີທີມງານແພດໝໍຜ່າຕັດແກ່ນຕາຂຸ້ນ ຈາກສູນປິ່ນປົວຕາແຫ່ງຊາດ ປະເທດສິງຫະໂປ ໄດ້ລົງມາກວດ ແລະ ສ້ອມແປງເຄື່ອງຜ່າຕັດແກ່ນຕາ ຢູ່ໂຮງໝໍແຂວງຫລວງພະບາງ ພ້ອມທັງໄດ້ສອນວິທີການສ້ອມແປງອຸປະກອນປິ່ນປົວ ໃຫ້ໂຮງໝໍແຂວງຫລວງພະບາງ. ສ່ວນວັນທີ 24-25 ໄດ້ກວດກຸ່ມເປົ້າໝາຍທີ່ເປັນພະຍາດແກ່ນຕາຂຸ້ນຄືນ ເພື່ອລົງທະບຽນ ເຂົ້າຮັບການຜ່າຕັດ ຊຶ່ງມີ 140 ຄົນ. ໃນວັນທີ 26 ຕຸລາ 2025 ທີມງານແພດໝໍ ຜ່າຕັດແກ່ນຕາຂຸ້ນ ຈາກສູນປິ່ນປົວຕາແຫ່ງຊາດ ປະເທດສິງຫະໂປ ໄດ້ເລີ່ມການຜ່າແກ່ນຕາຂຸ້ນໃຫ້ປະຊາຊົນ, ຊຶ່ງການຜ່າຕັດຈະດຳເນີນໄປຈົນຮອດວັນທີ 30 ຕຸລາ2025 ພ້ອມທັງກວດເຊັກ ສາຍຕາໃຫ້ປະຊາຊົນຄືນຕື່ມອີກ.

ຈຸດປະສົງ ກໍເພື່ອໃຫ້ປະຊາຊົນສາມາດເຂົ້າເຖິງລະບົບການຮັກສາສຸຂະພາບຕາ ທີ່ມີຄວາມສະເໝີພາບ ແລະ ຍືນຍົງ, ປັບປຸງຄຸນນະພາບ ການຮັກສາສຸຂະພາບຕາຂອງປະຊາຊົນ ໃນທົ່ວປະເທດລາວ ໂດຍສະເພາະ ການສຶກສາ, ປັບປຸງ ແລະ ພັດມທະນາພື້ນຖານໂຄງລ່າງ ຢູ່ທ້ອງຖິ່ນ ເພື່ອໃຫ້ການຮັກສາສຸຂະພາບຕາທີ່ດີສາມາດເຂົ້າເຖິງໄດ້ທຸກຄົນ.

ຂ່າວ-ພາບ: ດາວອນ ມະນີວັນ

ສະແດງຄຳຄິດເຫັນ