ທ່ານ ຮທ ອາຊື ຊອງແມະ ຮອງຫົວໜ້າໜ່ວຍງານຄະດີອາຍາ ປກສ ເມືອງລອງ ແຂວງຫຼວງນໍ້າທາ ໃຫ້ຮູ້ວ່າ: ເວລາປະມານ 9 ໂມງເຊົ້າຂອງວັນທີ 15 ມິຖຸນາ 2023 ໄດ້ຮັບແຈ້ງຄວາມຈາກພົນລະເມືອງດີກໍລະນີ ມີເຫດຄົນເສຍຊິວິດ ຢູ່ເຂດບ້ານຫ້ວຍໝໍ້ ເມືອງລອງ ເເຂວງຫຼວງນໍ້າທາ ຈຶ່ງໄດ້ລົງພື້ນທີ່ກວດກາສະຖານທີ່ເກີດເຫດພົບຜູ້ເສຍຊີວິດ 1 ຄົນ ຊື່ທ້າວ ຈໍໂຕ ອາຍຸ 48 ປີ ປະຊາຊົນບ້ານ ຫ້ວຍໝໍ້. ເບື້ອງຕົ້ນ ພົບເຫັນຮ່ອງຮອຍລູກປືນແກັບຍິງເຂົ້າ ບໍລິເວນໜ້າເອິກ ຊອດອອກສັນຫຼັງ 1 ຮູ, ນອນເສຍຊິວິດຢູ່ພາຍໃນເຮືອນຂອງຜູ້ກ່ຽວ ນອກນັ້ນຍັງພົບເຫັນປືນແກັບ 1 ກະບອກຍາວປະມານ 1,40 ຊັງຕີແມັດ.

ຜ່ານການເກັບກໍາຂໍ້ມູນ ແລະ ເອົາຄໍາໃຫ້ການຈາກຍາດຕິພີ່ນ້ອງຂອງ ທ້າວ ຈໍໂຕ ພົບວ່າຜູ້ກ່ຽວເກີດມີແນວຄິດຊຶມເສົ້າ ຍ້ອນຄວາມທຸກຍາກ, ເມຍກໍ່ໜີປະຍ້ອນວ່າ ໄລຍະທີ່ຜ່ານມາຜູ້ກ່ຽວເສບຢາບ້າ ແລະ ຖືກເຈົ້າໜ້າທີ່ກັກຕົວໄປດັດສ້າງ ແລ້ວ 2 ຄັ້ງ ເຊິ່ງທັງໝົດນີ້ ເຈົ້າໜ້າທີ່ຈຶ່ງສັນນິຖານວ່າ: ຜູ້ກ່ຽວໄດ້ລົງມືປິດຊີບຂອງຕົນເອງບໍ່ແມ່ນການຄາດຕະກຳ.

ປັດຈຸບັນ ຊາກສົບຜູ້ກ່ຽວໄດ້ມອບໃຫ້ຍາດຕິພີ່ນ້ອງນໍາໄປ ສົ່ງສະການຕາມຮີດຄອງປະເພນີ, ສ່ວນອາວຸດປະເພດປືນແກັບທີ່ຜູ້ກ່ຽວໃຊ້ກໍ່ເຫດແມ່ນໄດ້ເກັບມາ ຮັກສາໄວ້ທີ່ກອງບັນຊາການ ປກສ ເມືອງລອງ ເພື່ອທໍາລາຍຖິ້ມ.

ທີ່ມາ ຂ່າວ ປກສ ແຂວງຫລວງນ້ຳທາ

ສະແດງຄຳຄິດເຫັນ