ເກີດເຫດລົດໃຫຍ່ 10 ລໍ້ປິ້ນ ຢູ່ເສັ້ນທາງໂຮ່ຈີ່ມິນ ໂຄ້ງພູຫ້ວຍພໍ່ ບ້ານນາລົງໃໝ່ ເມືອງນອງ ແຂວງສະຫວັນນະເຂດ ເຮັດໃຫ້ມີຜູ້ເສຍຊີວິດຄາທີ່ 1 ຄົນ.ທ່ານ ຮ້ອຍເອກ ລຳພອນ ສຸດລະຄົມ ຮອງພະແນກຕຳຫລວດ ຊີ້ນຳວຽກງານ ຈາລະຈອນແຂວງ ສະຫວັນນະເຂດ ໃຫ້ຮູ້ວ່າ: ວັນທີ 5 ກໍລະກົດ 2023 ເວລາ 6: 30 ໂມງ, ໄດ້ຮັບແຈ້ງການຈາກພົນລະເມືອງດີ ພົບເຫັນມີລົດກາມັດ 10 ລໍ້ , ບັນທຸກເຄື່ອງ ໝາຍເລກທະບຽນ (ບກ 0638 ສະຫວັນນະເຂດ) ເກີດບັດຕິເຫດທີ່ເສັ້ນທາງໂຮຈີມິນ, ໂຄ້ງພູຫ້ວຍພໍ່ ລົງຄ້ອຍ ບ້ານນາລົງໃໝ່ ເມືອງນອງ ແຂວງສະຫວັນະເຂດ.

ຜູ້ກ່ຽວບັນທຸກເຄື່ອງຈະເດີນທາງໄປເມືອງນອງ ພໍມາຮອດຈຸດດັ່ງກ່າວ ເປັນທາງໂຄ້ງຍາວ ແລະຄ້ອຍຊັນ ບໍ່ສາມາດຄວບຄຸມລົດໄດ້ ຈຶ່ງພາໃຫ້ລົດແລ່ນອອກຈາກທາງປີ້ນລົງໂຄ້ງຂ້າງທາງ ຢູ່ໃນລົດບັນທຸກມີຜູ້ຂັບ 1 ຄົນ, ເຊິ່ງ ເສຍຊີວິດຄາທີ່. ຈາກການຄົ້ນພົບ ບັດປະຈຳຕົວ ແລະ ສຳເນົາຕ່າງໆຈຶ່ງຮູ້ວ່າຜູ້ຂັບຂີ່ ຊື່ ທ້າວ ເຕິນວັນກວາງ, ອາຍຸ 46 ປີ, ກຳມະກອນ ຊາວຫວຽດນາມ, ສ່ວນສົບຂອງຜູ້ກ່ຽວທາງເຈົ້າໜ້າທີ່ໄດ້ປະສານຫາຍາດຕິພີ່ນ້ອງ ເພື່ອນຳໄປທຳພິທີກຳທາງສາສະໜາ. ສຳລັບລົດ ທາງພາກສ່ວນວິຊາສະເພາະໄດ້ເຮັດບົດບັນທຶກກັກໄວ້ ເພື່ອດຳເນີນຄະດີຕາມລະບຽບກົດໝາຍ.

ຂໍ້ມູນ: ຖວທ ເມືອງນອງ.

ສະແດງຄຳຄິດເຫັນ