ນັກກິລາເຕະບານເຍົາວະຊົນລາວ ຮຸ່ນອາຍຸບໍ່ເກີນ 9 ປີ ຈາກສະໂມສອນ ມັດສະດາ ລາວ ຈີບີ ເອັຟຊີ (Mazda Lao GB FC) ສືບຕໍ່ສ້າງຜົນງານເດັ່ນຕໍ່ເນື່ອງເໝືອນກັບລຸ້ນອ້າຍຊຸດຜ່ານໆມາ ຫລ້າສຸດສາມາດຄອງແຊ້ມການແຂ່ງຂັນເຕະບານ 7 ຄົນ (ເຕະ 6 ຮັບ 1) ຮຸ່ນອາຍຸເກີນ 10 ປີ (U-10) ລາຍການ ໜອງຫານ ອາຣີນາ ຄັບ 2023 ທີ່ແຂວງອຸດອນທານີ ຣາຊະອານາຈັກໄທໃນວັນທີ 30 ກໍລະກົດ 2023 ຊຶ່ງລາຍການດັ່ງກ່າວ ເປັນການທົດສອບຄວາມພ້ອມຂອງຂອງບັນດາຫຼານນ້ອຍ ມັດສະດາ ລາວ ຈີບີ ເອັຟຊີ ກຽມຮ່ວມປ້ອງກັນແຊ້ມ ລາຍການແຊ້ມຊົນແຊ້ມ ທີ່ຈະຈັດຂຶ້ນໃນກາງເດືອນສິງຫານີ້ ຢູ່ປະເທດໄທ.

ສຳລັບ ລາຍການ ໜອງຫານ ອາຣີນາ ຄັບ 2023 ມີຊີງໄຊທັງໝົດ 2 ຮຸ່ນອາຍຸຄື: ຮຸ່ນອາຍຸ 8 ປີ ມີ 6 ສະໂມສອນເຂົ້າຮ່ວມ ແລະ ຮຸ່ນອາຍຸ 10 ປີ ມີ 12 ສະໂມສອນເຂົ້າຮ່ວມ ໂດຍສະໂມສອນ ມັດສະດາ ລາວ ຈີບີ ເອັຟຊີ ສົ່ງເຂົ້າຮ່ວມແຂ່ງຂັນ 1 ທີມ ໃນຮຸ່ນອາຍຸ 10 ປີ ສ່ວນອີກ 11 ສະໂມສອນ ແມ່ນມາຈາກບັນດາແຂວງໃກ້ຄຽງກັບແຂວງອຸດອນທານີ ການແຂ່ງຂັນແບ່ງອອກເປັນ 4 ກຸ່ມ ແຕ່ລະກຸ່ມ 3 ທີມ ແຂ່ງແບບພົບກັນໝົດໃນກຸ່ມ ແລ້ວຄັດເອົາທີ 1-2 ຜ່ານເຂົ້າໄປຫຼິ້ນໃນຮອບ 8 ທີມສຸດທ້າຍ.

U-9 ປີ ມັດສະດາ ລາວ ຈີບີ ເອັຟຊີ ຖືກຈັດຢູ່ກຸ່ມ C ຮ່ວມກັບ ເອັມເອັດ ສະປອດ ອາຣີນ້າ ແລະ ຈີຈີ ພູລ ເຊີວິດ ຊຶ່ງຜົນງານຂອງ ມັດສະດາ ລາວ ຈີບີ ເອັຟຊີ ນັດທຳອິດ ຊະນະຟາວ ຈີຈີ ພູ ເຊີວິດ 3-0 ແລະ ໄປເສຍໃຫ້ ເອັມເອັດ ສະປອດ ອາຣີນ້າ 0-2 ໄດ້ອັນດັບທີ 2 ຂອງກຸ່ມ ຜ່ານເຂົ້າຮອບ 8 ທີມສຸດທ້າຍ ໄປຊະນະ ທີມສັດທາ ແບບຫວຸດຫວິດ 1-0, ເຂົ້າຮອບ 4 ທີມສຸດທ້າຍ ຖະຫຼົ່ມ ທີມຊ້າງເສິກ 6-0 ແລະ ໂຄຈອນໄປລ້າງຕາກັບ ເອັມເອັດ ສະປອດ ອາຣີນ້າ ແລະ ກາຍເປັນ ມັດສະດາ ລາວ ຈີບີ ເອັຟຊີ ເອົາຊະນະໄດ້ຄືນແບບຫວຸດວິດ 2-1 ຄວ້າແຊ້ມລາຍການນີ້ມາຄອງ.

ຂ່າວ:ຂ່າວກິລາ Lao National TV

ສະແດງຄຳຄິດເຫັນ