ວັນທີ 6 ສິງຫາ 2023, ຄະນະກໍາມະການຄຸ້ມຄອງໄພພິບັດຂັ້ນສູງກາງ ຕາງໜ້າໂດຍ ທ່ານ ນາງ ໃບຄໍາ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ຮອງປະທານຜູ້ປະຈໍາການຄະນະກຳມະການຄຸ້ມຄອງໄພພິບັດຂັ້ນສູນກາງ ພ້ອມ ຄະນະ ໄດ້ຈັດສົ່ງເຄື່ອງອຸປະໂພກ-ບໍລິໂພກ ປະ ເພດເຂົ້າສານ,ເຄື່ອງໃຊ້ຄົວເຮືອນ, ເຄື່ອງສຸຂະອານາໄມ,ມຸ້ງ, ສາດຢາງ ມູນຄ່າຫລາຍກວ່າ 573 ລ້ານກີບ. ເພື່ອນໍາສົ່ງຊ່ວຍເຫລືອປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມຢູ່ 3 ແຂວງຄື: ບໍລິຄໍາໄຊ, ຄໍາມ່ວນ ແລະ ສະຫວັນນະເຂດ, ໂດຍໄດ້ຮັບການສະໜັບສະໜູນທາງດ້ານກໍາລັງ ແລະ ພາຫະນະຂົນສົ່ງຈາກກະຊວງປ້ອງກັນປະເທດ.

ສຳລັບເຄື່ອງອຸປະໂພກ-ບໍລິໂພກ ທີ່ນຳໄປຊ່ວຍເຫລືອຄັ້ງນີ້ ມອບໃຫ້ ແຂວງບໍລິຄຳໄຊ: ເຂົ້າກິນ 8 ໂຕນ; ເຄື່ອງໃຊ້ຄົວເຮືອນ 10 ແກັດ, ເຄື່ອງສຸຂະອານາໄມ 9 ແກັດ, ມຸ້ງ 20 ດາງ, ສາດຢາງ 30 ຜືນ ມູນຄ່າ 141ລ້ານກວ່າກີບ; ແຂວງ ຄໍາມ່ວນ: ເຂົ້າກິນ 10 ໂຕນ, ເຄື່ອງໃຊ້ຄົວເຮືອນ 20 ແກັດ, ເຄື່ອງສຸຂະອານາໄມ 10 ແກັດ, ມຸ້ງ 30 ດາງ, ສາດຢາງ 30 ຜືນ ມູນຄ່າ 173ລ້ານກວ່າກີບ ແລະ ແຂວງ ສະຫວັນນະເຂດ: ເຂົ້າກິນ 15 ໂຕນ; ເຄື່ອງໃຊ້ຄົວເຮືອນ 30 ແກັດ, ເຄື່ອງສຸຂະອານາໄມ 10 ແກັດ, ມຸ້ງ 50 ດາງ, ສາດຢາງ 50 ຜືນ ມູນຄ່າເກືອບ 259 ລ້ານກີບ.

ສະແດງຄຳຄິດເຫັນ