ໃນວັນທີ 24 ສິງຫາ 2023 ນີ້, ທ່ານນາງ ມໍຣະກົດ ສີສະຫວັດ ເອກອັກຄະຣາຊະທູດ ແຫ່ງ ຣາຊະອານາຈັກໄທ ປະຈຳ ສປປ ລາວ ພ້ອມດ້ວຍຄະນະ ໄດ້ຕາງໜ້າໃຫ້ລັດຖະບານໄທ ນຳເອົາເຄື່ອງອຸປະໂພກ-ບໍລິໂພກ ທີ່ໄດ້ຮັບຈາກການປະກອບສ່ວນຂອງ ພາກສ່ວນຕ່າງໆ ກໍຄື ປະຊາ ຊົນໄທ ມາມອບໃຫ້ອົງການກາແດງລາວ ເພື່ອນຳໄປຊ່ວຍເຫລືອປະຊາຊົນ ທີ່ໄດ້ຮັບຜົນກະທົບຈາກໄພນ້ຳຖ້ວມຢູ່ ສປປ ລາວ ໃນປີ 2023 ຕາງໜ້າຮັບໂດຍທ່ານ ພູທອນ ເມືອງປາກ ປະທານອົງການກາແດງແຫ່ງຊາດລາວ.

ເຄື່ອງທີ່ນຳມາມອບໃນຄັ້ງນີ້, ປະກອບມີ: ເຄື່ອງນຸ່ງຫົ່ມ, ນໍ້າດື່ມ, ປາກະປ໋ອງ, ເຂົ້າສານ 2,25 ໂຕນ, ນົມຖົ່ວເຫລືອງ, ເຄື່ອງໃຊ້ ແລະ ຢາປະຈຳບ້ານຈຳນວນໜຶ່ງ.

ໂອກາດດັ່ງກ່າວ, ທ່ານ ພູທອນ ເມືອງປາກ ໄດ້ສະແດງຄວາມຂອບໃຈ ຕໍ່ທ່ານນາງ ມໍຣະກົດ ສີສະຫວັດ ທີ່ໄດ້ຕາງໜ້າໃຫ້ປະຊາຊົນໄທ ນຳເອົາເຄື່ອງຊ່ວຍເຫລືອມາມອບໃຫ້ ໃນຄັ້ງນີ້, ພ້ອມທັງຝາກຄວາມຂອບໃຈ ໄປຍັງປະຊາຊົນໄທ ຜູ້ທີ່ມີນ້ຳໃຈ ເຫັນໄດ້ຄວາມສຳຄັນ ນຳເອົາເຄື່ອງອຸປະໂພກ-ບໍລິໂພກ ມາປະກອບສ່ວນຊ່ວຍເຫລືອປະຊາຊົນລາວ ທີ່ໄດ້ຮັບຜົນກະທົບຈາກໄພນ້ຳຖ້ວມ ເຊິ່ງເປັນການປະກອບສ່ວນອັນສຳຄັນ ເຮັດໃຫ້ປະຊາຊົນລາວທີ່ໄດ້ຮັບຜົນກະທົບ ມີຊີວິດການເປັນຢູ່ທີ່ດີຂຶ້ນ, ທັງເປັນການປະກອບສ່ວນອັນສຳຄັນ ເຂົ້າໃນການຮັດແໜ້ນການພົວພັນຮ່ວມມື ລະຫວ່າງປະຊາຊົນ ຂອງສອງປະເທດ ລາວ-ໄທ ໃຫ້ແໜ້ນແຟ້ນຂຶ້ນໄປເລື້ອຍໆ. ພ້ອມທັງຢືນຍັນວ່າ ຈະນຳເອົາເຄື່ອງຊ່ວຍເຫລືອທີ່ໄດ້ຮັບໃນຄັ້ງນີ້, ໄປແຈກຢາຍໃຫ້ປະຊາຊົນ ທີ່ໄດ້ຮັບຜົນກະທົບຈາກໄພນ້ຳຖ້ວມ ຢູ່ບັນ ດາແຂວງ ໃນຂອບເຂດທົ່ວປະເທດ ຢ່າງທົ່ວເຖິງ.

ທີ່ມາ ປະເທດລາວ Pathedlao

ສະແດງຄຳຄິດເຫັນ