ມອບຊີ້ນໝູສົດທີ່ຍຶດໄດ້ໃຫ້ໂຮງຮຽນ ມ.ສ ສາມັນກີນນອນຊົນເຜົ່າແຂວງບໍ່ແກ້ວ
ພະເເນກອຸດສາຫະກຳ ແລະ ການຄ້າ ມອບຊີ້ນໝູສົດ ທີ່ຖືກຍຶດໄດ້ ໃຫ້ແກ່ໂຮງຮຽນ ມ.ສ ສາມັນກີນນອນຊົນເຜົ່າ ບ້ານອຸດົມ ເມືອງຫ້ວຍຊາຍ ແຂວງບໍ່ແກ້ວ.
ວັນທີ 26 ກັນຍາ 2023 ເຈົ້າໜ້າທີ່ກວດກາການຄ້າ ໄດ້ເຄື່ອນໄຫວລາດຕະເວນຕາມຈຸດແຫຼ່ງຂ່າວ ຢູ່ພາຍໃນເມືອງຫ້ວຍຊາຍ ສາມາດກວດກາພົບເຫັນມີການນໍາເຂົ້າສິນຄ້າປະເພດຊີ້ນໝູສົດ ຈໍານວນ 40 ກິໂລ, ເຊິ່ງເຫັນວ່າເປັນການລັກລອບນໍາເຂົ້າສິນຄ້າບໍ່ຖືກດ່ານ ແລະ ເປັນການລົບຫຼີກການເສຍພັນທະ ໂດຍບໍ່ຖືກຕ້ອງຕາມລະບຽບກົດໝາຍ ສະນັ້ນ ຈຶ່ງໄດ້ຍຶດສິນຄ້າດັ່ງກ່າວໄວ້.
ໂດຍປະຕິບັດຕາມທິດຊີ້ນໍາຂອງຄະນະພະແນກອຸດສາຫະກໍາ ແລະ ການຄ້າ, ໃນຕອນບ່າຍ ຂອງວັນທີ 27ກັນຍາ 2023 ພາຍໃຕ້ການນໍາພາຂອງທ່ານ ນາງ ພວງພັນ ພູມສະຫວັນ ກໍາມະການພັກແຂວງ, ຫົວໜ້າພະແນກອຸດສາຫະກໍາ ແລະ ການຄ້າ ພ້ອມດ້ວຍພະນັກງານພາຍໃນພະແນກ ໄດ້ມອບຊີ້ນໝູສົດ ຈໍານວນ 40 ກິໂລ, ເປັນມູນຄ່າ 3,200,000 ກີບ ທີ່ຍຶດໄດ້ນັ້ນ ໃຫ້ແກ່ ໂຮງຮຽນ ມ.ສ ສາມັນກິນນອນຊົນເຜົ່າ ບ້ານອຸດົມ ເມືອງຫ້ວຍຊາຍ ແຂວງບໍ່ແກ້ວ.
