ກົມຕຳຫຼວດຄຸມຂັງ – ດັດສ້າງ ກະຊວງປ້ອງກັນຄວາມສະຫງົບ ຈັດພິທີເປີດການນໍາໃຊ້ໂຄງການຢ້ຽມຢາມນັກໂທດແບບທັນສະໄໝ ຂຶ້ນໃນວັນທີ 26 ມັງກອນ 2024 ທີ່ກົມຕຳຫຼວດຄຸມຂັງ – ດັດສ້າງ ໂດຍການເຂົ້າຮ່ວມຂອງ ທ່ານ ພົນໂທ ກົງທອງ ພົງວິຈິດ ຮອງລັດຖະມົນຕີກະຊວງ ປກສ, ທ່ານ ພົນຕີ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີກະຊວງ ປກສ, ທ່ານ ພອນປະເສີດ ອິນທະສອນ ປະທານ ກຸ່ມບໍລິສັດ ສາມເອັສ ພັດທະນາ, ມີຫົວໜ້າກົມໃຫຍ່ພະລາທິການ, ຕາງໜ້າກົມກອງອ້ອມຂ້າງກະຊວງ, ຕາງໜ້າຄ້າຍຄຸມຂັງປະຈຳພາກ, ຄ້າຍກັກຂັງຊົ່ວຄາວ, ສູນບໍາບັດປິ່ນປົວຜູ້ຕິດຢາເສບຕິດ ເຂົ້າຮ່ວມ.

ທ່ານ ພອນປະເສີດ ອິນທະສອນ ໄດ້ກ່າວວ່າ: ໂຄງການຢ້ຽມຢາມນັກໂທດແບບທັນສະໄໝ ( smart prison visitor ) ເພື່ອຮ່ວມມືພັດທະນາລະບົບຢ້ຽມຢາມນັກໂທດແບບທັນສະໄໝຢູ່ກົມຕຳຫຼວດຄຸມຂັງ – ດັດສ້າງ ແລະ ບັນດາຄ້າຍຄຸມຂັງ – ດັດສ້າງແຕ່ລະທ້ອງຖິ່ນໃນຂອບເຂດທົ່ວປະເທດ, ບໍລິສັດ ເປັນຜູ້ລົງທຶນ 100% ເຊິ່ງໂຄງການດັ່ງກ່າວເຫັນວ່າມີຄວາມສໍາຄັນຫຼາຍ ເພື່ອແນໃສ່ພັດທະນາການສື່ສານ ລະຫວ່າງ ນັກໂທດ ກັບ ຍາດພີ່ນ້ອງ ໄດ້ຕິດຕໍ່ພົວພັນກັນແບບສະດວກສະບາຍ, ປະຢັດເວລາໃນການ ໄປ – ມາ, ຫຼຸດຜ່ອນຄ່າໃຊ້ຈ່າຍຂອງຍາດ, ພ້ອມທັງຮັບປະກັນທາງດ້ານວິຊາສະເພາະຂອງກໍາລັງປ້ອງກັນຄວາມສະຫງົບ, ສ້າງໄດ້ຜົນປະໂຫຍດທັງສອງຝ່າຍ. ຮູບແບບການພັດທະນາລະບົບ ໂດຍພັດທະນາລະບົບຊ໊ອຟແວຣ໌, ດ້ວຍການສື່ສານຜ່ານອອນລາຍ ຮູບແບບວິດີໂອທີ່ມີລະບົບປ້ອງກັນຄວາມປອດໄພສູງ ເຊັ່ນ: ຜ່ານຄອມພິວເຕີ, ສະມາດໂຟນ ເປັນຕົ້ນ ໂດຍເສຍຄ່າທໍານຽມຜ່ານ BCEL ONE, LDB Trust, ຜູ້ທີ່ຕ້ອງການຢ້ຽມຢາມແມ່ນລົງທະບຽນຂໍ້ມູນສ່ວນບຸກຄົນຜ່ານລະບົບທີ່ຖືກອອກແບບໄວ້ແລ້ວ ເຊິ່ງມີເຈົ້າໜ້າທີ່ຄວບຄຸມລະບົບເປັນຜູ້ກວດສອບ ແລະ ອະນຸມັດ ພ້ອມບັນທຶກໄວ້ເປັນຂໍ້ມູນ.

 

ທ່ານກ່າວອີກວ່າ: ມາຮອດປັດຈຸບັນ ບໍລິສັດພວກເຮົາແມ່ນໄດ້ຈັດຕັ້ງປະຕິບັດໂຄງການສໍາເລັດຕາມສັນຍາແລ້ວ 8 ຄ້າຍຄຸມຂັງ ແລະ 1 ສູນບັນຊາຢູ່ກົມ ຄື: ຄ້າຍຄຸມຂັງໂພນຕ້ອງ ນະຄອນຫຼວງວຽງຈັນ, ຄ້າຍຄຸມຂັງນາຄ່າ ນະຄອນຫຼວງວຽງຈັນ, ຄ້າຍຄຸມຂັງຕານປ່ຽວ ແຂວງ ວຽງຈັນ, ຄ້າຍຄຸມຂັງບຸນເໜືອ ແຂວງຜົ້ງສາລີ, ຄ້າຍຄຸມຂັງຄັງໄຂ ແຂວງຊຽງຊວາງ, ຄ້າຍຄຸມຂັງລອງເລີກ ແຂວງຫຼວງພະບາງ, ຄ້າຍຄຸມຂັງແກ້ງຄັນ ແຂວງ ສະຫວັນນະເຂດ, ຄ້າຍຄຸມຂັງບັງລຽງ ແຂວງຈຳປາສັກ ແລະ 1 ສູນບັນຊາອະນຸມັດກົມຕຳຫຼວດຄຸມຂັງ – ດັດສ້າງ. ສ່ວນຄ້າຍຄຸມຂັງຊົ່ວຄາວ ຢູ່ແຕ່ລະແຂວງທົ່ວປະເທດແມ່ນຈະໄດ້ສືບຕໍ່ຂະຫຍາຍຈັດຕັ້ງປະຕິບັດໃຫ້ສຳເລັດຕາມເປົ້າໝາຍ.
ໃນຕອນທ້າຍພິທີ ບັນດາຜູ້ເຂົ້າຮ່ວມກໍໄດ້ຮ່ວມກັນຕັດແຖບຜ້າເພື່ອມອບ – ຮັບຢ່າງເປັນທາງການ.

ທີ່ມາ ເສດຖະກິດການຄ້າ

ສະແດງຄຳຄິດເຫັນ