ອົງການສຸພານິມິດສາກົນ (World Vision US) ປະຈໍາ ສປປ ລາວ ມອບຢາຂ້າແມ່ທ້ອງ (Albendazone) ຈຳນວນ 800,000 ເມັດ ລວມມູນຄ່າ 2,000 ໂດລາສະຫະລັດ ໃຫ້ສູນໂພຊະນາການ, ກົມອະນາໄມ ແລະ ສົ່ງເສີມສຸຂະພາບ, ກະຊວງສາທາລະນະສຸກ, ຊຶ່ງຢາຈຳນວນດັ່ງກ່າວ ຈະໄດ້ນໍາໄປແຈກຢາຍ-ສົ່ງເຖີງພະແນກສາທາລະນະສຸກແຂວງ, ສາທາເມືອງ ແລະ ສຸກສາລາ ໃນ 3 ພາກຂອງປະເທດລາວ ເພື່ອການປັບປຸງວຽກງານດ້ານໂພຊະນາການຂອງເດັກຕໍ່າກວ່າ 5 ປີ ແລະ ແມ່ຍິງຖືພາໃຫ້ມີສຸຂະພາບດີ.

ພິທີມອບ-ຮັບ ຢາຂ້າແມ່ທ້ອງ ໃນຄັ້ງນີ້ ໄດ້ຈັດຂຶ້ນເມື່ອບໍ່ດົນມານີ້ ທີ່ນະຄອນຫຼວງວຽງຈັນ ຊຶ່ງຕາງໜ້າເຊັນມອບໂດຍ ທ່ານ ນາງ ເອເດວ ໄວສ ຜູ້ອຳນວຍການອົງການສຸພານິມິດສາກົນ ປະຈໍາ ສປປ ລາວ ແລະ ຕາງໜ້າເຊັນຮັບໂດຍ ທ່ານ ດຣ ນາງ ພອນສະຫວັນ ແກ້ວນະຄອນ ຫົວໜ້າສູນໂພຊະນາການ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ອົງການສຸພານິມິດສາກົນ ປະຈໍາ ສປປ ລາວ ແມ່ນອົງການຈັດຕັ້ງສາກົນ ໜຶ່ງ ທີ່ຍຸດທະສາດໃນການຊ່ວຍເຫຼືອເດັກນ້ອຍ ແລະ ມີສ່ວນຮ່ວມສະໜັບສະໜູນການພັດທະນາຊິວິດການເປັນຢູ່ຂອງເດັກນ້ອຍທີ່ມີຄວາມບອບບາງ ໃຫ້ມີຊິວິດດີຂື້ນເພື່ອສ້າງອະນາຄົດທີ່ສົດໃສ ໃຫ້ແກ່ເດັກນ້ອຍໃນຊຸມຊົນ ແລະ ເຂດຫ່າງໄກສອກຫຼີກໃຫ້ທົ່ວເຖີງ.

ຂໍ້ມູນ: ສູນຂ່າວສານການແພດສຸຂະສຶກສາ

ທີ່ມາ VientianeTimes

ສະແດງຄຳຄິດເຫັນ