ທ່ານ ທະນົງໄຊ ຄຸດໄພທູນ ຫົວໜ້າຄະນະຄຸ້ມຄອງເຂດເສດຖະກິດພິເສດ ນະ ຄອນຫຼວງວຽງຈັນ ໃຫ້ຮູ້ໃນໂອກາດທີ່ຄະນະຜູ້ແທນຄະນະໂຄສະນາອົບຮົມສູນກາງພັກຢ້ຽມຢາມເຂດພັດທະນາກວມລວມໄຊເສດຖາ, ນະ ຄອນຫລວງວຽງຈັນ ເມື່ອບໍ່ດົນມານີ້ ວ່າ: ນັບແຕ່ສ້າງຕັ້ງຈົນເຖິງປັດຈຸບັນສາມາດດຶງດູດການລົງທຶນຈາກພາຍ ໃນ ແລະ ຕ່າງ ປະເທດ ໄດ້ທັງໝົດ 155 ບໍລິສັດ (ຕ່າງປະເທດ 128 ບໍລິສັດ, ພາຍໃນ 19 ບໍລິສັດ ແລະ ພາຍໃນຮ່ວມກັບຕ່າງປະ ເທດ 8 ບໍລິສັດ), ມີທຶນທັງໝົດ 2.8 ຕື້ກວ່າໂດລາ, ມີທຶນຈົດທະບຽນ 595 ລ້ານກວ່າໂດລາ ແລະ ມີການລົງທຶນຕົວຈິງໄປແລ້ວ 2.3 ຕື້ກວ່າໂດລາ, ສາມາດປະຕິບັດພັນທະເຂົ້າງົບປະມານຂອງລັດໄດ້ 262 ຕື້ກວ່າກີບ, ການນຳເຂົ້າສິນຄ້າມີມູນຄ່າ 4.2 ຕື້ກວ່າໂດລາ ແລະ ສົ່ງອອກສິນຄ້າມີມູນຄ່າ 599 ລ້ານກວ່າໂດລາ.

ສະເພາະປີ 2024 ມີບໍລິສັດສ້າງຕັ້ງໃໝ່ 25 ບໍລິສັດ, ໃນນັ້ນຕ່າງປະເທດ 18 ບໍລິ ສັດ, ພາຍໃນ 5 ບໍລິສັດ ແລະ ພາຍໃນ-ຕ່າງປະເທດ 2 ບໍລິສັດ, ມີທຶນທັງໝົດ 309 ລ້ານກວ່າໂດລາ ແລະ ທຶນຈົດທະບຽນ 152 ລ້ານກວ່າໂດລາ, ມີມູນຄ່າການລົງທຶນຕົວຈິງ 72 ລ້ານກວ່າໂດລາ; ປະຕິບັດພັນທະອາກອນເຂົ້າງົບປະມານລັດໄດ້ 58 ຕື້ກວ່າກີບ; ນໍາເຂົ້າສິນຄ້າມູນຄ່າ 402 ລ້ານກວ່າໂດລາ ແລະ ສົ່ງອອກສິນຄ້າມູນຄ່າ 245 ລ້ານກວ່າໂດລາ, ມີແຮງງານທັງໝົດ 7,520 ຄົນ ໃນນັ້ນຄົນລາວ 4,721 ຄົນ ແລະ ຄົນຕ່າງປະເທດ 2,827 ຄົນ.

ສໍາລັບເຂດພັດທະນາກວມລວມໄຊເຊດຖາສ້າງຂື້ນໃນປີ 2010 ຈຸດປະສົງເພື່ອພັດທະນາແບບກວມລວມຄົບວົງຈອນ ທີ່ປະກອບດ້ວຍເຂດອຸດສາຫະກຳທັນສະໄໝ, ເຂດການຄ້າ-ການບໍລິການ ແລະ ການຂົນສົ່ງ LOGISTIC.
ການພັດທະນາເຂດດັ່ງກ່າວ ມີ 3 ໄລຍະຄື: ໄລຍະທີ 1 ສຳເລັດການກໍ່ສ້າງໂຄງລ່າງພື້ນຖານໄຟຟ້າ, ນ້ຳປະປາ, ເສັ້ນທາງພາຍໃນເຂດ ແລະ ເຕັກນິກການສື່ສານ. ໄລຍະທີ 2 ສຸມໃສ່ການພັດທະນາການຄ້າ, ການທ່ອງທ່ຽວ ແລະ ເຂດຕົວເມືອງໃໝ່ ໃນນັ້ນ, ສຳເລັດວຽກງານວິສະວະກຳທີ່ພັກອາໄສ (ໂຄງການຮ່ວມມືໃຕ້ໃຕ້) ໄລຍະທີ 2 ແມ່ນສຳເລັດແລ້ວ 98% ແລະ ໂຄງການສວນສາທາລະນະໜອງນ້ຳໃຕ້ສຳເລັດແລ້ວ 68%.

ທີ່ມາ Lao National Radio

ສະແດງຄຳຄິດເຫັນ