ການປູກພືດຜັກປອດສານພິດ ແມ່ນຄວາມຕ້ອງການຂອງຜູ້ບໍລິໂພກກໍ່ຄືຕະຫລາດ. ຂະນະທີ່ການປູກພືດປອດສານພິດຍັງເປັນການຫລຸດຜ່ອນຜົນກະທົບຕໍ່ສຸຂະພາບຜູ້ຜະລິດ, ຜູ້ບໍລິໂພກລວມທັງສິ່ງແວດລ້ອມຕື່ມອີກ. ຄໍລຳ “ພັດທະນາອາຊີບໜັງສືພິມປະເທດລາວ” ສະບັບມື້ນີ້ ຂໍພາທ່ານຜູ້ອ່ານໄປຮູ້ກັບບໍລິສັດໜຶ່ງ

 

ຢູ່ແຂວງຫລວງນ້ຳທາທີ່ເຫັນໄດ້ຄວາມຕ້ອງການຂອງສັງຄົມໃນການບໍລິໂພກພືດຜັດປອດສານພິດ ທັງເປັນການຜະລິດພືດຮັບໃຊ້ພາຍໃນ ເພື່ອບໍລິໂພກພາຍໃນ ແລະ ຫລຸດຜ່ອນການນຳເຂົ້າຈາກພາຍນອກຕາມແນວທາງທີ່ລັດໄດ້ວາງອອກ. ໜຶ່ງໃນນັ້ນ ບໍລິສັດ ສີມອນພັດທະນາກະສິກໍາ ແລະ ບໍລິການຂາເຂ້ົາ- ຂາອອກ ຈໍາກັດ ທີ່ໄດ້ລົງທຶນປະມານ 2 ຕື້ກີບ ເຂົ້າໃນການປູກພືດປອດສານພິດເພື່ອຕອບສະໜອງແກ່ສັງຄົມ.

 

ຕາມການໃຫ້ຮູ້ຂອງ ທ່ານ ນາງ ສີມອນ ແກ້ວວົງເພັດ ຫົວໜ້າບໍລິສັດ ສີມອນ ພັດທະນາກະສິກຳ ແລະ ບໍລິການຂາເຂົ້າ-ຂາອອກ ຈຳກັດ ເມື່ອມໍ່ໆນີ້ວ່າ: ການປູກພືດຜັກປອດສານພິດ ແມ່ນອາຊີບທີ່ທາງບໍລິສັດໃຫ້ຄວາມສົນໃຈຢາກທົດລອງ ແລະ ຖືເປັນອາຊີບ ເພື່ອເປັນການສ້າງວຽກເຮັດງານທຳໃຫ້ປະຊາຊົນໄດ້ມີລາຍຮັບ, ເຊິ່ງບໍລິສັດໄດ້ລົງທຶນທົດລອງປູກຜັກປອດສານພິດໃນເບື້ອງຕົ້ນແຕ່ເດືອນຕຸລາ 2024 ໃນເນື້ອທີ່ 14 ເຮັກຕາ ຢູ່ສູນບ້ານຫລວງ ແລະ ສູນຄົ້ນຄວ້າກະສິກຳບ້ານໃໝ່ເມືອງຫລວງນໍ້າທາ ໂດຍ ໃຊ້ທຶນ 2 ຕື້ກີບ. ໃນນັ້ນ, ສຸມໃສ່ປູກ ພືດຜັກ 7 ຊະນິດຄື: ຫອມປ້ອມ, ຜັກກາດຂາວ, ຜັກກາດກວາງຕຸງ, ຜັກກາດຕິນໝີ, ກາລົດ, ຜັກເປິກ ແລະ ໝາກເລັ່ນ. ສຳລັບການປູກຜັກປອດສານພິດ ໃນໄລຍະຜ່ານມາເຮັດໃຫ້ໄດ້ຮູ້ເຖິງຜົນຜະລິດທີ່ໄດ້ຮັບ, ຊະນິດພືດທີ່ນໍາມາປູກ, ໄລຍະເວລາ, ພູມມີປະເທດ, ອາກາດ ແລະ ຊະນິດຂອງດິນທີ່ເໝາະສົມກັບຜັກຊະນິດນັ້ນໆຖືວ່າໄດ້ຮັບຜົນເປັນຢ່າງດີ.

ສຳລັບແຜນການໃນຕໍ່ໜ້າ ນອກຈາກປູກຜັກຈໍາໜ່າຍພາຍໃນແຂວງ ແລ້ວບໍລິສັດຈະໄດ້ມີການພັດທະນາຜັກປອດສານພິດ ໃຫ້ກາຍເປັນສິນຄ້າສົ່ງອອກຕ່າງເມືອງ, ແຂວງ ແລະ ຕ່າງປະເທດຕື່ມອີກ. ໄປພ້ອມໆກັບການສົ່ງເສີມໃຫ້ປະຊາຊົນເຂົ້າມາມີສ່ວນຮ່ວມໃນການປູກພືດຜັກປອດສານພິດຂາຍເປັນສິນຄ້າໃຫ້ຫລາຍຂ້ຶນ ເພ່ືອສ້າງລາຍໄດ້ໃຫ້ປະຊາຊົນບ້ານໃກ້ຄຽງຕິດພັນກັບການທ່ອງທ່ຽວ, ຈັດກິດຈະກໍາການປຸງແຕ່ງອາຫານຜັກສົດປອດສານພິດເພື່ອສຸຂະພາບ, ອາຫານແບບທ້ອງຖິ່ນ ແລະ ກິດຈະກໍາອື່ນໆທັງຕອບສະໜອງພືດຜັກໄວ້ໃຫ້ບໍລິການແຂກທີ່ເຂົ້າມາທ່ຽວຊົມຢ່າງພຽງພໍ.

ທີ່ມາ: KPL

ສະແດງຄຳຄິດເຫັນ