ເກີດເຫດການຝູງຊົນຍູ້ດັນກັນຈົນເສຍຊີວິດ ແລະ ບາດເຈັບ ໃນຂະນະທີ່ພະຍາຍາມຍາດກັນຂຶ້ນລົດໄຟຜູ້ໂດຍສານທີ່ສະຖານີລົດໄຟໃນນະຄອນນິວເດລີຂອງອິນເດຍໃນຄືນວັນເສົາຕາມເວລາທ້ອງຖິ່ນ.

ສະຖານີໂທລະທັດ NDTV ລາຍງານອ້າງອີງຈາກພະນັກງານທ້ອງຖິ່ນວ່າ, ເຫດການເກີດຂຶ້ນເມື່ອເວລາ 20.00 ນ. ວັນເສົາຕາມເວລາທ້ອງຖິ່ນ, ຊື່ງຕົງກັບເວລາ 21.30 ນ. ວັນເສົາຕາມເວລາປະເທດລາວ. ມີຜູ້ເສຍຊີວິດຢ່າງໜ້ອຍ 15 ຄົນ, ໃນນັ້ນມີຜູ້ຍິງ 10 ຄົນ ແລະ ເດັກນ້ອຍ 3 ຄົນ, ແລະ ຍັງມີຜູ້ບາດເຈັບ 15 ຄົນ.

ເຫດການສຸດເສຍໃຈດັ່ງກ່າວເກີດຂຶ້ນທີ່ຊານຊາລາ 2 ຂອງສະຖານີລົດໄຟໃນນະຄອນນິວເດລີ, ໃນຂະນະທີ່ຜູ້ໂດຍສານຈຳນວນຫຼວງຫຼາຍຍາດກັນຂຶ້ນລົດໄຟ 2 ຂະບວນທີ່ມາຮອດຊ້າ, ເພື່ອໄປຮ່ວມງານບຸນມະຫາກຸມເພລາ, ເຊິ່ງເປັນພິທີອາບນ້ຳສັກສິດຂອງຊາວຮິນດູທີ່ເມືອງປະຍາຄຣາຊ, ລັດອຸດຕະປຣະເທດ, ທີ່ເລີ່ມຕັ້ງແຕ່ວັນທີ 13 ມັງກອນ ຈົນເຖິງວັນທີ 26 ກຸມພາ.

ກ່ອນໜ້ານີ້ໃນວັນທີ 29 ມັງກອນ, ຊຶ່ງເປັນວັນສັກສິດທີ່ສຸດຂອງງານບຸນ, ເກີດເຫດຜູ້ສະແຫວງບຸນຊຸກດັນກັນຈົນເສຍຊີວິດຢ່າງໜ້ອຍ 30 ຄົນ.

ສະແດງຄຳຄິດເຫັນ