ວັນທີ 5 ມີນາ 2025 ອົດສະຕາລີກຽມປະເຊີນກັບພາຍຸໄຊໂຄລນອັລເຟຣດ (Alfred) ເຊິ່ງກຳລັງເຄື່ອນຕົວມາຍັງເມືອງບຣິສເບນທີ່ມີປະຊາກອນຫຼາຍເປັນອັນດັບ 3 ຂອງປະເທດ. ເຈົ້າໜ້າທີ່ລັດຖະບານອົດສະຕາລີໄດ້ຂໍຄວາມຮ່ວມມືຈາກປະຊາຊົນໃນເຂດຊານເມືອງທີ່ສ່ຽງຕໍ່ນ້ຳຖ້ວມໃຫ້ອົບພະຍົບໂດຍໄວທີ່ສຸດ.

ສຳນັກງານອຸຕຸນິຍົມວິທະຍາອົດສະຕາລີໄດ້ອອກປະກາດເຕືອນໄພພາຍຸຄອບຄຸມພື້ນທີ່ກວ່າ 500 ກິໂລແມັດ ຕາມແນວຝັ່ງໃນລັດຄວີນສແລນດ໌ ແລະ ນິວເຊົາເວວ, ເຊິ່ງສົ່ງຜົນກະທົບຕໍ່ປະຊາກອນຫຼາຍລ້ານຊີວິດ.

ສຳນັກງານອຸຕຸນິຍົມວິທະຍາລະບຸວ່າ ກະແສລົມແຮງທີ່ມີຄວາມໄວລົມສູງເຖິງ 155 ກິໂລແມັດຕໍ່ຊົ່ວໂມງ ອາດທະວີກຳລັງແຮງຂຶ້ນຕັ້ງແຕ່ຊ່ວງບ່າຍວັນພະຫັດ (6 ມີນາ) ແລະ ຄາດວ່າພາຍຸລູກນີ້ຈະທະວີຄວາມຮຸນແຮງຈົນກາຍເປັນພາຍຸໝູນທີ່ມີຄວາມຮຸນແຮງລະດັບທີ 2 ໃນຊ່ວງເຊົ້າວັນສຸກ (7 ມີນາ) ເມື່ອເຄື່ອນຕົວເຂົ້າໃກ້ເມືອງບຣິສເບນ, ເມືອງຫຼວງຂອງລັດຄວີນສແລນດ໌.

ສຳນັກອຸຕຸນິຍົມວິທະຍາຍັງລະບຸອີກວ່າ ປະລິມານນ້ຳຝົນໂດຍລວມຈາກພາຍຸອັລເຟຣດອາດສູງເຖິງ 800 ມິລິແມັດໃນບາງພູມີພາກ, ເຊິ່ງສູງກວ່າຄ່າສະເລ່ຍສຳລັບເດືອນມີນາ ແລະ ອາດກໍ່ໃຫ້ເກີດນ້ຳຖ້ວມຢ່າງກະທັນຫັນທີ່ອັນຕະລາຍເຖິງຊີວິດ.

ເດວິດ ຄຣິຊາຟຸລລີ ນາຍົກເທດສະມົນຕີລັດຖະມົນຕີຄວີນສແລນດ໌ກ່າວກັບນັກຂ່າວວ່າ “ນີ້ເປັນໄພພິບັດທີ່ບໍ່ຄ່ອຍເກີດຂຶ້ນ ສຳລັບດິນແດນທາງຕາເວັນອອກ-ໃຕ້ຂອງຄວີນສແລນດ໌, ເປັນເວລາຫຼາຍສິບປີແລ້ວທີ່ພື້ນທີ່ແຖບນີ້ເຄີຍປະສົບກັບພາຍຸໄຊໂຄລນ.”

ຂະນະນີ້ບັນດາຜູ້ອາໄສກຳລັງອົບພະຍົບອອກຈາກບ້ານເຮືອນຂອງຕົນເອງ ແລະ ເຈົ້າໜ້າທີ່ເລັ່ງເປີດສູນອົບພະຍົບ. ນອກຈາກນີ້, ຖົງຊາຍຍັງຂາດແຄນ ແລະ ຊັ້ນວາງຂອງໃນຊຸບເປີມາເກັດຫຼາຍແຫ່ງກໍຫວ່າງເປົ່າ, ເນື່ອງຈາກຜູ້ຄົນຕ່າງຮີບຊື້ຂອງໃຊ້ຈຳເປັນ.

ສະຖານສຶກສາຫຼາຍແຫ່ງທາງຕາເວັນອອກສຽງໃຕ້ຂອງຄວີນສແລນດ໌ຈະປິດທຳການ ແລະ ການຂົນສົ່ງສາທາລະນະຈະຢຸດໃຫ້ບໍລິການໃນວັນພະຫັດ ແລະ ວັນສຸກ.

ຄຣິສ ມິນສ໌ ນາຍົກເທດສະມົນຕີລັດນິວເຊົາເວວລະບຸວ່າ ໂຮງຮຽນ 122 ແຫ່ງທາງຕອນເໜືອຂອງລັດນິວເຊົາເວວຈະປິດທຳການໃນວັນພຸດ ແລະ ວັນພະຫັດ ແລະ ປະຊາຊົນກຸ່ມເປາະບາງຈະຖືກຂໍໃຫ້ອອກຈາກພື້ນທີ່ພາຍໃນເຊົ້າວັນພະຫັດ.

ຂະນະທີ່ສາຍການບິນແຄວນຕັສປະກາດຍົກເລີກຫຼາຍຖ້ຽວບິນຈາກທາງຕາເວັນອອກສຽງໃຕ້ຂອງຄວີນສແລນດ໌ ແລະ ຕອນເໜືອຂອງນິວເຊົາເວວ ແລະ ອາດມີການຍົກເລີກຖ້ຽວບິນອື່ນໆອີກໃນອີກບໍ່ເທົ່າໃດມື້ຂ້າງໜ້າ.

ນອກຈາກນີ້, ການແຂ່ງຂັນກອລ໌ຟຍິງຊິງແຊມຢູໂຣບ (Ladies European Tour) ຖືກຍົກເລີກ, ຂະນະທີ່ການແຂ່ງຂັນຟຸດບອນລີກສ໌ ອົດສະຕາລີ (Australian Football League) ເຊິ່ງຈະຈັດຂຶ້ນທາງຕອນໃຕ້ຂອງຄວີນສແລນດ໌ໄດ້ຖືກເລື່ອນອອກໄປເຊັ່ນກັນ.

ສະແດງຄຳຄິດເຫັນ