ເທຣນຕ໌ ອະເລັກຊານເດີ-ອາໂນລ໌ດ ນັກເຕະດາວເດັ່ນຂອງ ລິເວີພູລ ທີມດັງໃນສຶກພຣີເມຍລີກ ອັງກິດ ທີ່ສວມບົດຊູເປີຊັບລົງມາຍິງປະຕູຊັຍໃຫ້ທີມບຸກເອົາຊະນະ ເລສເຕີ ຊິຕີ້ 1-0 ທີ່ສະໜາມ ຄິງ ເພົາເວີ ເມື່ອຄືນວັນອາທິດທີ 20 ເມສາ ທີ່ຜ່ານມາ

ໂດຍຈາກໄຊຊະນະດັ່ງກ່າວເຮັດໃຫ້ “ຫົງສ໌ແດງ” ຂະຍັບເຂົ້າໃກ້ຕຳແໜ່ງແຊມລີກສະໄໝທີ 20 ຫຼາຍຂຶ້ນທັນທີ ຫຼັງມີແຕ້ມນຳຫ່າງ ອາເຊນອນ ອອກໄປເປັນ 13 ຄະແນນ ແລະ ເຫຼືອໂປຣແກຣມການແຂ່ງຂັນອີກພຽງແຄ່ 5 ນັດເທົ່ານັ້ນ

ຫຼັງຈົບເກມ ແບັກຂວາຕົວເກັ່ງໄດ້ເປີດໃຈວ່າ “ຂ້ອຍຕື່ນເຕັ້ນຫຼາຍທີ່ໄດ້ກັບມາ ຂ້ອຍເຮັດວຽກໜັກຫຼາຍໃນຊ່ວງຫຼາຍອາທິດທີ່ຜ່ານມາເພື່ອໃຫ້ກັບມາຟິດອີກຄັ້ງ ຂ້ອຍກະຫາຍທີ່ຈະລົງຫຼິ້ນ ແລະ ຂ້ອຍມີຄວາມສຸກທີ່ເຮັດປະຕູໄດ້ ມັນເປັນປະຕູສຳຄັນຫຼາຍ”

“ຕອນນີ້ພວກເຮົາໃກ້ທີ່ຈະຄວ້າແຊມແລ້ວ ຂ້ອຍຄິດວ່າຕອນນີ້ເຫຼືອອີກພຽງແຄ່ການຄວ້າໄຊອີກພຽງແຄ່ນັດດຽວ ພວກເຮົາໃກ້ຫຼາຍແລ້ວ ການເຮັດເລື່ອງແບບນີ້ໄດ້ໂດຍສະເພາະຢ່າງຍິ່ງເມື່ອມີແຟນໆ ຢູ່ທີ່ນີ້ ຖືເປັນຊ່ວງເວລາທີ່ພິເສດຫຼາຍ”

ພ້ອມກັນນີ້, ດາວເຕະໄວ 26 ປີ ຖືເປັນໜຶ່ງໃນນັກເຕະພຽງລາຍດຽວທີ່ກຳລັງຈະໝົດສັນຍາຫຼັງຈົບລະດູການນີ້ ແລະ ອະນາຄົດຂອງເຈົ້າຕົວຍັງຄົງບໍ່ແນ່ນອນຫຼັງມີຂ່າວວ່າກຽມອຳລາທີມຍ້າຍໄປຮ່ວມທີມ ເຣອັລ ມາດຣິດ ໃນລາ ລີກາ ສະເປນໃນຊີຊັນໜ້າ

“ຂ້ອຍເວົ້າມາຕະຫຼອດທັງລະດູການແລ້ວວ່າຂ້ອຍຈະບໍ່ເວົ້າເຖິງສະຖານະການຂອງຕົວເອງ ຂ້ອຍຈະບໍ່ລົງລາຍລະອຽດ”

“ແຕ່ວັນນີ້ຄືວັນພິເສດ ເຮັດປະຕູໄດ້ ໄດ້ລົງຫຼິ້ນ ຊະນະເກມ ຂະຍັບເຂົ້າໃກ້ການຄວ້າແຊມ ມັນເປັນຊ່ວງເວລາພິເສດທີ່ຈະຢູ່ໃນຄວາມຊົງຈຳຂອງຂ້ອຍຕະຫຼອດໄປ ແລະ ຂ້ອຍດີໃຈທີ່ໄດ້ເປັນສ່ວນໜຶ່ງຂອງຊ່ວງເວລາເຫຼົ່ານັ້ນ” ເທຣນຕ໌ ອະເລັກຊານເດີ-ອາໂນລ໌ດ ໃຫ້ສຳພາດ

ສະແດງຄຳຄິດເຫັນ