ວໍຊິງຕັນ 26 ເມສາ – ປະທານາທິບໍດີໂດນາລດ໌ ທຣຳຂອງສະຫະລັດກ່າວວ່າ ການເຈລະຈາເລື່ອງພາສີອາກອນກັບຫຼາຍປະເທດຈະຈົບລົງພາຍໃນ 3-4 ອາທິດ ພ້ອມກັບອ້າງວ່າໄດ້ເຮັດຂໍ້ຕົກລົງແລ້ວປະມານ 200 ສະບັບ

 

ເວັບໄຊທ໌ສຳນັກຂ່າວຢອນຮັບ ຂອງທາງການເກົາຫຼີໃຕ້ລາຍງານອ້າງບົດສຳພາດປະທານາທິບໍດີທຣຳທີ່ນິຕະຍະສານໄທມສ໌ເຜີຍແຜ່ໃນເວັບໄຊທ໌ເມື່ອວັນສຸກ ຫນຶ່ງມື້ຫຼັງຈາກເກົາຫຼີໃຕ້ ແລະ ສະຫະລັດເປີດການເຈລະຈາລະດັບສູງເລື່ອງການຄ້າ.

 

ຜູ້ນຳສະຫະລັດກ່າວວ່າ ທຸກຢ່າງຈະຈົບໃນອີກ 3-4 ອາທິດ.

 

ໃນໄລຍະນີ້ບາງປະເທດອາດກັບມາຂໍໃຫ້ສະຫະລັດປັບແກ້ໄຂບາງຢ່າງ, ເຂົາພ້ອມພິຈາລະນາແຕ່ໃນພາບລວມໄດ້ຕັດສິນໃຈແລ້ວ ພ້ອມກັບອ້າງວ່າ ໄດ້ເຮັດຂໍ້ຕົກລົງກັບປະເທດຕ່າງໆ ຢ່າງສຳເລັດສົມບູນແລ້ວປະມານ 200 ສະບັບ ແຕ່ບໍ່ເປີດເຜີຍໃນລາຍລະອຽດ.

 

ຢອນຮັບຕັ້ງຂໍ້ສັງເກດວ່າ ຄຳກ່າວຂອງທ່ານທຣຳສົ່ງສັນຍານວ່າ ສະຫະລັດອາດສະຫຼຸບການເຈລະຈາເລື່ອງພາສີອາກອນກັບປະເທດຄູ່ຄ້າໄດ້ກ່ອນວັນທີ 8 ກໍລະກົດ ຊຶ່ງເປັນວັນທີ່ການຊະລໍການບັງຄັບໃຊ້ພາສີອາກອນກັບປະເທດຕ່າງໆ ໃນອັດຕາແຕກຕ່າງກັນອອກໄປເປັນເວລາ 90 ວັນຈະສິ້ນສຸດລົງ ຫຼັງຈາກບັງຄັບໃຊ້ໄດ້ບໍ່ເຖິງ 24 ຊົ່ວໂມງ ເມື່ອວັນທີ 9 ເມສາ.

 

ໃນບົດສຳພາດດັ່ງກ່າວ, ທ່ານທຣຳໄດ້ກ່າວເຖິງເລື່ອງທີ່ສະຫະລັດຈ່າຍເງິນຈຳນວນຫຼາຍເພື່ອຊ່ວຍປົກປ້ອງເກົາຫຼີໃຕ້ ແລະ ປະເທດພັນທະມິດອື່ນໆ ວ່າ ລັດຖະບານຂອງເຂົາຈະຈັດການເລື່ອງນີ້ແຍກຈາກການເຈລະຈາເລື່ອງການຄ້າ.

 

ຜູ້ນຳສະຫະລັດຍົກເລື່ອງນີ້ຂຶ້ນມາເວົ້າໃນລະຫວ່າງແຈກແຈງເຖິງປັດໄຈຫຼາຍປະການທີ່ຈະນຳມາພິຈາລະນາໃນການກຳນົດພາສີສຸອາກອນທີ່ເຂົາລະບຸວ່າ ເປັນພາສີທີ່ເປັນທຳສຳລັບປະເທດທີ່ແຕກຕ່າງກັນ.

ສະແດງຄຳຄິດເຫັນ