ວິກເຕີ ໂຢເຄເຣສ ດາວຍິງຟອມແຮງຂອງ ສະປອຕິ້ງ ລິສບອນ ຕອບຮັບຂໍ້ສະເໜີຍ້າຍທີມໃນຊ່ວງລະດູຮ້ອນນີ້ແລ້ວ, ຫຼັງຈາກໄດ້ຮັບຄວາມສົນໃຈຈາກທັງ ແມນເຊສເຕີ ຢູໄນເຕັດ ແລະ ອາຣ໌ເຊນອລ. ຫຼ້າສຸດ ສື່ໂປຕຸເກດເປີດເຜີຍວ່າ “ປືນໃຫຍ່” ເປັນຝ່າຍເອົາຊະນະ, ຄາດວ່າຄ່າຕົວຢູ່ທີ່ 50-60 ລ້ານປອນ, ຕໍ່າກວ່າຄ່າຍົກເລີກສັນຍາເຕັມຈໍານວນ.

ໂຢເຄເຣສ ອະດີດກອງໜ້າທີມ ໂຄເວັນທີ ຕົກເປັນຂ່າວອາດຍ້າຍກັບມາຫຼິ້ນໃນລີກເມືອງຜູ້ດີລະດູໜ້າ ເນື່ອງຈາກເຊື່ອກັນວ່າລາວຕົກເປັນເປົ້າໝາຍຂອງ ແມນຯ ຢູໄນເຕັດ ທີ່ມີ ຣູເບນ ອາໂມຣິມ ເຈົ້ານາຍເກົ່າຍ້າຍມາຄຸມທີມ, ລວມທັງ ອາຣ໌ເຊນອລ ທີ່ຊອກຫາຫົວໜ້າມາເສີມປະສິດທິພາບໃນການລ່າຕາໜ່າງ.

ຈາກສະຖານະການໃນໄລຍະຫຼັງ, ສື່ເປີດເຜີຍວ່າທີມ “ປືນໃຫຍ່” ມີໂອກາດສົມຫວັງຫຼາຍກວ່າ “ຜີແດງ” ຊຶ່ງມີຜົນງານທີ່ຕົກຕໍ່າຢ່າງໜັກໃນລະດູການນີ້, ເນື່ອງຈາກສະໂມສອນແຫ່ງກຸງລອນດອນຕັ້ງ ອັນເດຣຍ ແບຣຕ້າ ຜູ້ອໍານວຍການກິລາຄົນໃໝ່ໃຫ້ດໍາເນີນເລື່ອງການລ່າຕົວຫົວຫອກທີມຊາດ ສະວີເດັນ.

ມາຮອດຫຼ້າສຸດເມື່ອວັນທີ 5 ເມສາ Correio da Manha ລາຍງານວ່າ ດາວເຕະວັຍ 26 ປີຕອບຕົກລົງທີ່ຈະຍ້າຍໄປຮ່ວມທີມ ອາຣ໌ເຊນອລ ໃນລະດູການໜ້າແລ້ວ ຫຼັງຈາກໄດ້ຮັບການນໍາສະເໜີໂຄງການຈາກ ແບຣຕ້າ, ຊຶ່ງສົ່ງຜົນໃຫ້ “ເຣດ ເດວິລສ໌” ອົກຫັກຕາມລະບຽບ.

ເຖິງຢ່າງໃດກໍຕາມ, ຍັງບໍ່ມີການພູດຄຸຍກັນເຖິງເລື່ອງສັນຍາ, ແຕ່ເຊື່ອວ່າ ສະປອຕິ້ງ ຍິນດີຂາຍດາວດັງໃນລາຄາປະມານ 50-60 ລ້ານປອນ ຊຶ່ງຕໍ່າກວ່າຄ່າຍົກເລີກສັນຍາ 83.6 ລ້ານປອນ (ປະມານ 3,678 ລ້ານບາດ).

ສໍາລັບ ໂຢເຄເຣສ ໄດ້ສະແດງຟອມການຍິງປະຕູໃນລະດູການທໍາອິດກັບ ສະປອຕິ້ງ ໄດ້ຢ່າງໜ້າຕື່ນເຕັ້ນ ໂດຍລາວສາມາດຍິງໄດ້ 43 ປະຕູຈາກ 50 ນັດ ແລະ ສືບຕໍ່ຜົນງານການຍິງປະຕູໃນລະດູການນີ້ໄດ້ 43 ປະຕູຈາກ 43 ນັດ.

ສະແດງຄຳຄິດເຫັນ