ມາດຣິດ 29 ເມສາ – ຫຼາຍພື້ນທີ່ຂອງສະເປນ ແລະ ໂປຕຸເກສ ປະເຊີນກັບບັນຫາໄຟຟ້າດັບຄັ້ງໃຫຍ່ ກະທົບຕໍ່ຫຼາຍພາກສ່ວນໃນປະເທດ ຈົນລັດຖະບານສະເປນຕ້ອງປະກາດພາວະສຸກເສີນ

ຫຼາຍພື້ນທີ່ຂະໜາດໃຫຍ່ຂອງສະເປນ ແລະ ໂປຕຸເກສ ເຊິ່ງຕັ້ງຢູ່ເທິງຄາບສະໝຸດໄອບີເຣຍ ລວມເຖິງບາງສ່ວນຂອງຝຣັ່ງ ປະເຊີນບັນຫາໄຟຟ້າດັບຄັ້ງໃຫຍ່ຕັ້ງແຕ່ຊ່ວງສວາຍຂອງມື້ວານນີ້ຕາມເວລາທ້ອງຖິ່ນ ກໍ່ໃຫ້ເກີດຄວາມໂກລາຫົນໄປທົ່ວປະເທດ.

ການຂົນສົ່ງສາທາລະນະ ທັງລົດໄຟໂດຍສານ, ລົດໄຟໃຕ້ດິນ ແລະເຄື່ອງບິນໂດຍສານເປັນອຳພາດ, ການຈະລາຈອນຕິດຂັດຢ່າງໜັກ ເນື່ອງຈາກສັນຍານໄຟຈະລາຈອນຕາມແຍກຕ່າງໆ ໃຊ້ການບໍ່ໄດ້, ຖ້ຽວບິນໂດຍສານຊັກຊ້າແລະຍົກເລີກຈຳນວນຫຼາຍ, ໂຮງໝໍແລະໂຮງຮຽນບໍ່ມີໄຟຟ້າໃຊ້, ຜູ້ຄົນຈຳນວນຫຼາຍຕິດຢູ່ໃນລົດໄຟໃຕ້ດິນ, ລົດໄຟໂດຍສານ ແລະໃນລິບ.

ສະເພາະໃນກຸງມາດຣິດ ເມືອງຫຼວງສະເປນ, ປະຊາຊົນນັບພັນຄົນ ອອກມາຢືນຢູ່ຕາມຖະໜົນນອກອາຄານສຳນັກງານ, ມີເຈົ້າໜ້າທີ່ຄອຍຄວບຄຸມການຈະລາຈອນ, ຂະນະທີ່ທະຫານຖືກສົ່ງໄປຊ່ວຍເຫຼືອຜູ້ໂດຍສານທີ່ຕິດຄ້າງຢູ່ໃນລົດໄຟໂດຍສານຫຼາຍຂະບວນ.