'ທຣຳ' ຈະຫຼຸດຜົນກະທົບພາສີລົດຍົນ

"ທຣຳ" ຈະຫຼຸດຜົນກະທົບພາສີລົດຍົນ

ເຜີຍແຜ່: 30 April, 2025

ສະຫະລັດອາເມລິກາ 29 ເມສາ – ລັດຖະບານສະຫະລັດຈະຫຼຸດຜ່ອນຜົນກະທົບຈາກການເພີ່ມພາສີນຳເຂົ້າລົດຍົນ ໂດຍການຜ່ອນຜັນການເກັບພາສີບາງສ່ວນສຳລັບອະໄຫຼ່ຈາກຕ່າງປະເທດທີ່ໃຊ້ໃນການຜະລິດລົດຍົນໃນສະຫະລັດ ແລະ ຈະປ້ອງກັນບໍ່ໃຫ້ມີການເກັບພາສີຊໍ້າຊ້ອນກັບພາສີອື່ນໆ ສຳລັບລົດຍົນນຳເຂົ້າ.

ທຳນຽບຂາວສະຫະລັດໄດ້ເຜີຍແຜ່ຖ້ອຍແຖລງຂອງທ່ານ Howard Lutnick ລັດຖະມົນຕີການຄ້າໃນມື້ນີ້ວ່າ ປະທານາທິບໍດີ Donald Trump ກຳລັງສ້າງຄວາມເປັນຫຸ້ນສ່ວນທີ່ສຳຄັນກັບທັງຜູ້ຜະລິດລົດຍົນພາຍໃນປະເທດ ແລະ ຄົນເຮັດວຽກຊາວອາເມລິກາ.

ຂໍ້ຕົກລົງນີ້ເປັນໄຊຊະນະຄັ້ງໃຫຍ່ໃນການດຳເນີນນະໂຍບາຍການຄ້າຂອງປະທານາທິບໍດີ Trump, ເປັນການຕອບແທນບໍລິສັດທີ່ຜະລິດລົດໃນສະຫະລັດ ແລະ ໃຫ້ໂອກາດແກ່ຜູ້ຜະລິດທີ່ສະແດງຄວາມມຸ່ງໝັ້ນທີ່ຈະລົງທຶນ ແລະ ຂະຫຍາຍການຜະລິດໃນສະຫະລັດ.

ກ່ອນໜ້ານີ້ ໜັງສືພິມ Wall Street Journal ໄດ້ລາຍງານຂ່າວນີ້ເປັນແຫ່ງທຳອິດວ່າ ບໍລິສັດລົດຍົນທີ່ຈ່າຍພາສີແລ້ວ ຈະບໍ່ຕ້ອງເສຍພາສີຊໍ້າຊ້ອນຈາກການທີ່ສະຫະລັດເພີ່ມພາສີສິນຄ້ານຳເຂົ້າອື່ນ ເຊັ່ນ: ເຫຼັກ ແລະ ອາລູມິນຽມ ແລະ ຈະມີການຄືນພາສີຊໍ້າຊ້ອນທີ່ຈ່າຍໄປແລ້ວ.

ກ່ຽວກັບຜູ້ຜະລິດລົດຍົນໄດ້ສະແດງຄວາມຄາດຫວັງເມື່ອວານນີ້ວ່າ ຜູ້ນຳສະຫະລັດຈະປະກາດມາດຕະການຫຼຸດຜ່ອນຜົນກະທົບຂອງພາສີລົດຍົນກ່ອນເດີນທາງໄປລັດມິຊິແກນໃນມື້ນີ້ ເພື່ອສະຫຼອງການດຳລົງຕຳແໜ່ງຄົບ 100 ວັນທຳອິດ. ລັດນີ້ມີຄວາມສຳຄັນໃນແງ່ຂອງການເປັນທີ່ຕັ້ງຂອງບໍລິສັດລົດຍົນຍັກໃຫຍ່ 3 ແຫ່ງຂອງສະຫະລັດ ແລະ ເປັນທີ່ຕັ້ງຂອງບໍລິສັດຊັບພລາຍເອີລາຍໃຫຍ່ທີ່ກ່ຽວຂ້ອງກັບລົດຍົນຫຼາຍກວ່າ 1,000 ແຫ່ງ.

ປະທານາທິບໍດີທຣຳໄດ້ປະກາດເມື່ອວັນທີ 26 ມີນາຕາມເວລາສະຫະລັດວ່າ ຈະເພີ່ມພາສີລົດຍົນນຳເຂົ້າທັງໝົດໃນອັດຕາຮ້ອຍລະ 25 ມີຜົນຕັ້ງແຕ່ວັນທີ 3 ເມສາ. ສ່ວນພາສີອະໄຫຼ່ລົດຍົນຮ້ອຍລະ 25 ຈະເພີ່ມພາຍໃນວັນທີ 3 ພຶດສະພາ.