ວໍຊິງຕັນ 9 ພຶດສະພາ – ຜູ້ບໍລິຫານບໍລິສັດດ້ານເທັກໂນໂລຢີປັນຍາປະດິດຫຼືເອໄອ (AI) ຊັ້ນນຳໃນສະຫະລັດລະບຸວ່າ ເຖິງແມ່ນວ່າສະຫະລັດຍັງຄົງເປັນຜູ້ນຳໃນການແຂ່ງຂັນເອໄອ ແຕ່ສະຫະລັດຈະຕ້ອງປັບປຸງໂຄງສ້າງພື້ນຖານ ແລະ ເພີ່ມການສົ່ງອອກຊິບເອໄອ ຈຶ່ງຈະສາມາດຮັກສາການນຳໜ້າຈີນໄດ້ຕໍ່ໄປ

ປະທານເຈົ້າໜ້າທີ່ບໍລິຫານຫຼືຊີອີໂອຂອງບໍລິສັດເອໄອລາຍໃຫຍ່ ເຊັ່ນ: ທ່ານແຊມ ອັລຕ໌ແມນ ຊີອີໂອໂອເພັນເອໄອ (OpenAI) ຜູ້ພັດທະນາແຊັດຈີພີທີ (ChatGPT) ທ່ານນາງລິຊາ ຊູ ຊີອີໂອເອເອັມດີ (AMD) ຜູ້ຜະລິດຊິບເອໄອ ໃຫ້ການຕໍ່ຄະນະກຳມາທິການການພານິດໃນວຸດທິສະພາສະຫະລັດເມື່ອວານນີ້ ຊຶ່ງມີ ສວ.ເທັດ ຄຣູຊ ລັດເທັກຊັສຈາກພັກລີພັບລິກັນເປັນປະທານຄະນະກຳມາທິການຯ.

ທ່ານອັລຕ໌ແມນກ່າວວ່າ ເພິ່ນເຊື່ອວ່ານະວັດຕະກຳຂອງສະຫະລັດຈະເຮັດໃຫ້ຄວາມກ້າວໜ້າທາງສັງຄົມທີ່ເກີດຈາກເອໄອມີການພັດທະນາຢ່າງວ່ອງໄວພາຍໃນບໍ່ເທົ່າໃດປີ ແຕ່ການລົງທຶນດ້ານໂຄງສ້າງພື້ນຖານຍັງຄົງເປັນເລື່ອງຈຳເປັນ ຄອບຄຸມຕັ້ງແຕ່ເລື່ອງສູນຂໍ້ມູນຫຼືດາຕ້າເຊັນເຕີທີ່ສາມາດເກັບເຊີບເວີໄດ້ຫຼາຍຂຶ້ນ ໄປຈົນເຖິງສະຖານີໄຟຟ້າທີ່ປ້ອນໄຟຟ້າໃຫ້ແກ່ເຄື່ອງຄຳນວນໃຊ້ພະລັງງານສູງທີ່ຈຳເປັນຕໍ່ການເຮັດວຽກຂອງເອໄອ.

 

ຄະນະກຳມາທິການຯ ກຳລັງຫາທາງຕັດຫຼຸດອຸປະສັກດ້ານກົດລະບຽບທີ່ມີຕໍ່ເອໄອຂອງສະຫະລັດ ຫຼັງຈາກເມື່ອປີທີ່ແລ້ວດີບຊີກ (DeepSeek) ບໍລິສັດເອໄອຂອງຈີນສ້າງແຮງສັ່ນສະເທືອນໃຫ້ແກ່ວົງການເອໄອທົ່ວໂລກ ດ້ວຍການເປີດຕົວແອັບພລິເຄຊັນຜູ້ຊ່ວຍເອໄອຄຸນນະພາບສູງລາຄາຈັບຕ້ອງໄດ້.

 

ເຮັດໃຫ້ອຸດສາຫະກຳເທັກໂນໂລຢີສະຫະລັດໃຊ້ໂອກາດນີ້ຮຽກຮ້ອງໃຫ້ລັດຖະບານປະທານາທິບໍດີໂດນັລ ທຣຳອອກນະໂຍບາຍທີ່ເກື້ອໜູນທຸລະກິດໃຫ້ຫຼາຍຂຶ້ນ ເຊັ່ນ ຜ່ອນຄາຍມາດຕະການຈຳກັດການສົ່ງອອກຊິບເອໄອ ໂດຍໃຫ້ເຫດຜົນວ່າ ການສົ່ງເສີມໃຫ້ເອໄອທີ່ສະທ້ອນເຖິງຄຸນຄ່າທາງປະຊາທິປະໄຕໄດ້ຮັບການໃຊ້ງານຢ່າງກວ້າງຂວາງທົ່ວໂລກ ຖືເປັນຜົນປະໂຫຍດແຫ່ງຊາດຂອງສະຫະລັດ.

 

ລັດຖະບານສະຫະລັດສະໄໝອະດີດປະທານາທິບໍດີໂຈ ໄບເດັນໄດ້ອອກມາດຕະການຊຸດໃໝ່ ຫວັງປິດກັ້ນຈີນບໍ່ໃຫ້ເຂົ້າເຖິງຊິບແລະສັກຍະພາບເອໄອຂອງສະຫະລັດ ເນື່ອງຈາກເກງວ່າຈີນຈະນຳໄປໃຊ້ເສີມສ້າງສັກຍະພາບທາງທະຫານ. 

ລັດຖະບານທຣຳສານຕໍ່ແນວທາງນີ້ ດ້ວຍການອອກຂໍ້ກຳນົດໃໝ່ເລື່ອງການອອກໃບອະນຸຍາດໃຫ້ແກ່ການສົ່ງອອກຊິບເອໄອທີ່ຜະລິດໂດຍເອັນວິເດຍ (Nvidia) ແລະ ເອເອັມດີ ໄປຍັງຈີນ ເນື່ອງຈາກມີບໍລິສັດຫາທາງຫຼົບຫຼີກມາດຕະການຈຳກັດການສົ່ງອອກທີ່ບັງຄັບໃຊ້ກ່ອນໜ້ານີ້.

 

ເຖິງຢ່າງໃດກໍ່ດີ ລັດຖະບານທຣຳມີແຜນຈະຍົກເລີກແລະແທນທີ່ມາດຕະການຈຳກັດການສົ່ງອອກຊິບເອໄອທີ່ລັດຖະບານໄບເດັນປະກາດໃຊ້ໃນຊ່ວງໃກ້ໝົດວາລະ ຊຶ່ງຈະມີຜົນບັງຄັບໃຊ້ຕັ້ງແຕ່ວັນທີ 15 ພຶດສະພາທີ່ຈະເຖິງນີ້.

ສະແດງຄຳຄິດເຫັນ