ຣູເບນ ອາໂມຣິມ ຜູ້ຈັດການທີມ ແມນຢູ ສ້າງຄວາມປະທັບໃຈໃຫ້ແກ່ທີມງານພະນັກງານຂອງຕົນ 30 ຄົນ ແລະ ຄອບຄົວໄດ້ເດີນທາງໄປຊົມເກມຊິງຊະນະເລີດ ຢູໂຣປາ ລີກ ກົງກັນຂ້າມກັບນະໂຍບາຍຂອງສະໂມສອນທີ່ພະຍາຍາມປະຢັດລາຍຈ່າຍທຸກດ້ານ.

ແມນຯ ຢູໄນເຕັດ ພາຍໃຕ້ການບໍລິຫານງານຂອງ ເຊີ ຈິມ ແຣັດຄລິຟ ມະຫາເສດຖີອັງກິດຖືກສື່ເປີດເຜີຍວ່າຍົກເລີກນະໂຍບາຍການມອບປີ້ຟຣີໃນເກມຊິງຊະນະເລີດໃຫ້ກັບພະນັກງານທຸກຄົນເພື່ອເກັບໄວ້ຂາຍຕໍ່ໃຫ້ແຟນບານເຊິ່ງເປັນມາດຕະການຮັດແອວຂອງລາວຂໍ້ໜຶ່ງ ຫຼັງຈາກເຄີຍປົດພະນັກງານໃນຕຳແໜ່ງທີ່ຊ້ຳຊ້ອນ ແລະ ບໍ່ມີຄວາມສຳຄັນມາແລ້ວສອງຮອບ

ຈາກການຕັດສິນໃຈດັ່ງກ່າວຂອງ ເຊີ ແຣັດຄລິຟ, ແມນຯ ຢູໄນເຕັດ ຈະໃຊ້ວິທີການຈັດງານໃນເມືອງໂດຍແຈກເຄື່ອງດື່ມຟຣີໃຫ້ພະນັກງານສອງຈອກ, ແຕ່ໝູ່ທີ່ເຂົ້າມາຮ່ວມງານເຊຍ ປີສາດແດງ ປະທະກັບ ສະເປີສ ໃນວັນທີ 21 ພ.ຄ. ຈະຕ້ອງຊື້ເຄື່ອງດື່ມເອງ.

ນອກຈາກນີ້, ຜູ້ບໍລິຫານຜີແດງ ປະກາດຫຼຸດການແຈກປີ້ຟຣີໃຫ້ກັບນັກເຕະເຫຼືອຄົນລະສອງໃບເທົ່ານັ້ນ ແລະ ກຳນົດໃຫ້ນັກເຕະຊື້ປີ້ແຈກຈ່າຍໃຫ້ກັບຄອບຄົວໄດ້ບໍ່ເກີນ 10 ໃບ, ພ້ອມລະບຸວ່າຈະບໍ່ມີການແຫ່ແຊມປ໌ຖ້າຫາກທີມເອົາຊະນະ ໄກ່ດຽວທອງ ໄດ້ ໂດຍຈະມີງານປາຕີ້ບາບີຄິວໃນສະໜາມຊ້ອມແທນ ເນື່ອງຈາກສະໂມສອນຕ້ອງບິນໄປເຕະນັດພິເສດທີ່ອາຊີສອງເກມເພື່ອຫາເງິນຫຼັງຈາກປິດລະດູການໄດ້ບໍ່ດົນ.

ຈົນຮອດລ່າສຸດເມື່ອວັນທີ 13 ພ.ຄ., ອີເອສພີເອັນ ເປີດເຜີຍວ່າ ອາໂມຣິມ ແຈ້ງກັບສະໂມສອນແລ້ວວ່າຍິນດີຮັບຜິດຊອບຈ່າຍຄ່າປີ້ ແລະ ຄ່າເດີນທາງໃຫ້ກັບພະນັກງານ 30 ຄົນຂອງລາວທັງໂຄ້ຊ, ນັກກາຍະພາບ ແລະ ຄອບຄົວເດີນທາງໄປເບິ່ງເກມທີ່ສະໜາມ ຊານ ມາເມສ ຂອງທີມ ແອດເລຕິກ ບິນເບົາ, ໂດຍພະນັກງານແຕ່ລະຄົນສາມາດເຊີນແຂກຮ່ວມເດີນທາງໄດ້ສອງຄົນ.

ສຳລັບນັດຊິງຊະນະເລີດ ຢູໂຣປາ ລີກ, ຢູຟ່າ ມອບປີ້ເຂົ້າຊົມເກມໃຫ້ສອງທີມຄູ່ຊິງຊະນະເລີດຈຳນວນ 15,000 ໃບເທົ່າກັນ, ແຕ່ ສະເປີສ ເດີນນະໂຍບາຍຕ່າງຈາກ ແມນຯ ຢູໄນເຕັດ ໂດຍສະໂມສອນແຫ່ງກຸງລອນດອນຈະມອບປີ້ຟຣີໃຫ້ພະນັກງານ 700 ຄົນຄົນລະໜຶ່ງໃບ.

ສະແດງຄຳຄິດເຫັນ