ໂບໂລນຢາສິ້ນສຸດການລໍຖ້າມາຍາວນານກວ່າເຄິ່ງສັດຕະວັດ ຫຼັງຈາກເປັນຝ່າຍເຊືອດເອຊີ ມິລານ ໃນຮອບຊິງຊະນະເລີດໂກປປາ ອິຕາເລຍ ຜະງາດຄວ້າແຊມປ໌ທຳອິດຂອງສະໂມສອນໃນຮອບ 51 ປີ

ການແຂ່ງຂັນຟຸດບອນໂກປປາ ອິຕາເລຍ ອິຕາລີ ນັດຊິງຊະນະເລີດ ທີ່ສະໜາມສະຕາດິໂອ ໂອລິມປິໂກ ກຸງໂຣມ ເມື່ອວັນທີ 14 ພຶດສະພາ ເປັນແມັດລະຫວ່າງ 2 ທີມຈາກເຊເຣຍ ອາ “ປີສາດແດງດຳ” ເອຊີ ມິລານ ພົບກັບ “ຣອສໂຊບລູ” ໂບໂລນຢາ

ເກມນີ້ມີພຽງປະຕູດຽວເກີດຂຶ້ນໃນນາທີ 53 ຣິກຄາໂດ ອໍໂຊລິນີ ຫຼຸດເຂົ້າເຂດໂທດແລ້ວຖືກກອງຫຼັງມິລານສະກັດບອນໄວ້, ລູກໄຫຼມາເຂົ້າເທົ້າ ແດນ ເອັນດອຍ ແຕ່ງຫາຊ່ອງແລ້ວຊັດຕຸງຕາຂ່າຍ ໂບໂລນຢາຊະນະໄປ 1-0 ຄວ້າແຊມປ໌ລາຍການນີ້ເປັນສະໄໝທີ 3

ນອກຈາກນີ້, ໂບໂລນຢາຍັງຄວ້າແຊມປ໌ທົວນາເມັນເມເຈີຄັ້ງທຳອິດໃນຮອບ 51 ປີ ນັບຕັ້ງແຕ່ຄັ້ງສຸດທ້າຍທີ່ເຄີຍໄດ້ແຊມປ໌ລາຍການນີ້ເມື່ອລະດູການ 1973-74 ພ້ອມການັນຕີໂຄວຕ້າໄປເຕະຢູຟ່າ ຢູໂຣປາ ລີກ ລະດູການໜ້າອີກດ້ວຍ

ສະແດງຄຳຄິດເຫັນ