ຄະນະກຳມະການພາລາແລມປິກ ລາວ-ໄທ ຮ່ວມມືກັນສົ່ງເສີມພັດທະນານັກກິລາຄົນພິການສອງຊາດກ້າວສູ່ເວທີສາກົນ

ຮຽບຮຽງໂດຍ:kaling

ເຜີຍແຜ່: 15 May, 2025

…………………………..

ພິທີເຊັນສັນຍາບົດບັນທຶກຄວາມເຂົ້າໃຈ ຫຼື MOU ຈັດຂຶ້ນເມື່ອວັນທີ 13 ພຶດສະພາ ຜ່ານມາ, ທີ່ສະໜາມກິລາຄົນພິການແຫ່ງປະເທດໄທ, ລະຫວ່າງ ທ່ານ ນາງ ຂັນທະລີ ສີຣິພົງພັນ ປະທານ ຄະນະກຳມະການພາລາແລມປິກແຫ່ງຊາດລາວ ແລະ ທ່ານ ໄມຕຣີ ຄົງເລືອງ ນາຍົກສະມາຄົມກິລາຄົນພິການແຫ່ງຊາດໄທ ໃນພຣະຣາຊະຊູປະຖຳ, ມີ ທ່ານ ອັດສະວິນ ຈິ້ວນາຣາຍ ຜູ້ອຳນວຍການສຳນັກງານການກິລາແຫ່ງປະເທດໄທ ພາກ 2 ແລະ ທ່ານ ວິລະວັນ ບຸນສຸກໄທ ຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ ທັງເປັນຮອງປະທານ-ເລຂາທິການ ຄະນະກຳມະການພາລາແລມປິກແຫ່ງຊາດລາວ ພ້ອມດ້ວຍບັນດາພະນັກງານທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

ສຳລັບບົດບັນທຶກຄວາມເຂົ້າໃຈໃນການເຊັນສັນຍາຮ່ວມກັນໃນຄັ້ງນີ້ ແມ່ນເນັ້ນໃສ່ການສ້າງຄວາມຮ່ວມມື ແລະ ເຊື່ອມໂຍ່ງລະຫວ່າງກິລາດ້ວຍກັນ ໂດຍໃຊ້ພື້ນຖານຂອງຄວາມສຳພັນທະໄມຕີອັນດີງາມທີ່ມາຢ່າງຍາວນານ ແລະ ຄວາມຕັ້ງໃຈຮ່ວມກັນໃນການຍົກລະດັບສັກກະຍະພາບນັກກິລາຄົນພິການໃຫ້ສາມາດແຂ່ງຂັນໃນລະດັບສາກົນ. ທາງສະມາຄົມກິລາແຫ່ງປະເທດໄທ ແລະ ຄະນະກຳມະການພາລາແລມປິກແຫ່ງຊາດລາວ ແມ່ນມີວິໄສທັດ ແລະ ຄວາມມຸ້ງໝັ້ນທີ່ຈະພັດທະນາຄູຝຶກສອນ, ນັກກິລາ ແລະ ບຸກຄະລາກອນທີ່ກ່ຽວຂ້ອງ ເພື່ອໃຫ້ສາມາດພັດທະນາສັກກະຍະພາບ ແລະ ສ້າງໂອກາດໃຫ້ກັບນັກກິລາຄົນພິການ ລາວ-ໄທ ໄດ້ກ້າວສູ່ເວທີການແຂ່ງຂັນລະດັບສູງຕໍ່ໄປ.

#ຂ່າວໂດຍ ສົງການ ພັນແພງດີ

#ໂທລະພາບເເຫ່ງຊາດລາວ ທຊລ 1

#ຂ່າວກິລາLaoNationalTV