ລົງນາມໂດຍ ທ່ານ ນາງ ຍອດແກ້ວ ພາວະດີ ເລຂາທິການ ສະຫະພັນບານເຕະແຫ່ງຊາດລາວ ແລະ ທ່ານ ນາງ ເລວູຮົງງອກ ຜູ້ອໍານວຍການ ຝ່າຍການຕະຫຼາດ ກຸ່ມບໍລິສັດ ດົງລຶກ ໂດຍມີ ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ນາງ ຫງວຽນທິຕວນ ທີ່ປຶກສາປະຈຳສະມາຄົມຫວຽດນາມປະຈໍາລາວ, ທ່ານ ວີເພັດ ສີຫາຈັກຣ ປະທານສະຫະພັນບານເຕະແຫ່ງຊາດລາວ ພ້ອມດ້ວຍຄະນະ, ຄູຝຶກ, ນັກກີລາທີມຊາດລາວ ທັງຊຸດຍິງ ແລະ ຊາຍ ຕະຫຼອດຮອດສື່ມວນຊົນ ເຂົ້າຮ່ວມເປັນສັກຂີພະຍານ.

ໂອກາດນີ້, ທ່ານ ວີເພັດ ສີຫາຈັກຣ ປະທານສະຫະພັນບານເຕະແຫ່ງຊາດລາວ ກ່າວວ່າ: ຈຸດປະສົງ ການເຊັນສັນຍາຮ່ວມມືຄັ້ງນີ້,” ທັງສອງຝ່າຍໄດ້ມີເປົ້າໝາຍ ແລະ ຄວາມມຸ້ງມາດປາດຖະໜາທີ່ຈະພັດທະນາກິລາບານເຕະຮ່ວມກັນ, ເຊິ່ງ ກຸ່ມບໍລິສັດ ດົງລຶກ ຈະເປັນຜູ້ອຸປະຖຳດັ່ງນີ້:

1. ຊຸດແຂ່ງຂັນສໍາລັບທີມຊາດ ຍິງ – ຊາຍ ທຸກຮຸ່ນອາຍຸ

2. ໝາກບານສໍາລັບການແຂ່ງຂັນ

ການແຂ່ງຂັນເຕະບານ ລາວລີກ 1

ການແຂ່ງຂັນເຕະບານ ຊີງຂັນ ພະນະທ່ານ ນາຍົກລັດຖະມົນຕີ ແຫ່ງ ສປປ ລາວ

ການແຂ່ງຂັນເຕະບານ ລາວລີກ ຍິງ

ການແຂ່ງຂັນເຕະບານເຍົາວະຊົນ ຊາຍ ຮຸ່ນອາຍຸບໍ່ເກີນ 16 ປີ ຊີງຂັນ ສຕລ

ການແຂ່ງຂັນບານເຕະເຍົາວະຊົນ ຊາຍ ຮຸ່ນອາຍຸບໍ່ເກີນ 19 ປີ ຊີງຂັນ ສຕລ

ການແຂ່ງຂັນ ລາວ ຟຸດຊໍ ລີກ

3. ຈະມີກິດຈະກຳກິລາບານເຕະ ຮ່ວມກັນໃນຂອບເຂດທົ່ວປະເທດ

ໂອກາດດຽວກັນ, ທ່ານ ນາງ ເລວູຮົງງອກ ຜູ້ອໍານວຍການ ຝ່າຍການຕະຫຼາດ ກຸ່ມບໍລິສັດ ດົງລຶກ ກ່າວວ່າ: ເປັນເວລາຫຼາຍກວ່າ 35 ປີ, ກຸ່ມບໍລິສັດ ດົງລຶກ ໄດ້ທຸ້ມເທເຂົ້າໃນການສະໜັບສະໜູນ ແລະ ພັດທະນາວົງການກີລາທົ່ວຫວຽດນາມ ແລະ ຕ່າງປະເທດ ເລີ່ມຈາກກິລາບານເຕະ, ບານສົ່ງ, ດອກປີກໄກ່, ເທັນນິສ ແລະ ກິລາປະເພດອື່ນໆ, ມື້ນີ້ຖືເປັນຂີດໝາຍພິເສດໃນການສະໜັບສະໜູນທີມຊາດລາວຢ່າງເປັນທາງການ.

ເຄື່ອງກິລາຍີ່ຫໍ້ JOGARBOLA ພັດທະນາຄຸນນະພາບການຜະລິດລະດັບສາກົນ ດ້ວຍແຜ່ນແພທີ່ນຸ້ມນວນ, ທົນທານ, ລະບາຍເຫື່ອໄດ້ດີ ແລະ ອອກແບບຢ່າງລຽບງ່າຍ ມີເອກະລັກ.

ຂໍ້ມູນຂ່າວຈາກ : ຂ່າວກິລາ Lao National TV

Photo: LaoFF