​ວຽກງານຮັກສາສຸຂະພາບ ຂອງພໍ່ແມ່ປະຊາຊົນບັນດາເຜົ່າ ແລະ ການພັດທະນາບຸກຄະລາກອນສາທາລະນະສຸກ ມີ​ການ​ເຕີບ​ໃຫຍ່​ຂະ​ຫຍາຍ​ຕົວຢູ່ ​​ແຂວງ​ຈຳ​ປ​າ​ສັກ

ທ່ານ​ ດຣ.​ ຄິດສະແຫວງ​ ສີສຸລາດ​ ຮອງຜູ້ອໍານວຍການໂຮງໝໍແຂວງຈໍາປາສັກ ຕາງໜ້າ​ ຄະນະນໍາ ແລະ​ ພະນັກງານ ແລະ ຊ່ຽວຊານແພດໝໍ​ ສະແດງທັດສະນະ ເນື່ອງໃນໂອກາດວັນສາທາລະນະສຸກລາວ​ (ວັນແພດລາວ)​ ທີ່ໝູນວຽນມາບັນຈົບຄອບຮອບ 60​ ປີ​ (18/6/1965 -​ 18/6/2025)

ທ່ານ ກ່າ​ວ​ວ່າ: ວັນແພດລາວ ແມ່ນວັນທີ່ມີຄວາມໝາຍ ເພື່ອລະນຶກເຖິງການກຳເນີດ, ການເຕີບໃຫຍ່ຂະຫຍາຍຕົວ ຂອງວຽກງານຮັກສາສຸຂະພາບ ແລະ ການພັດທະນາບຸກຄະລາກອນສາທາລະນະສຸກ ໂດຍສະເພາະ ເພື່ອຈາລຶກບຸນຄຸນ​ຕໍ່ແພດໝໍ ແລະ ພະນັກງານ ສາທາລະນະສຸກລາວ ໄດ້ເສຍສະຫຼະຊີວິດ,​ ອຸທິດສະຕິປັນຍາ ແລະ ເຫື່ອແຮງ ເປັນເຈົ້າການ ໃນການປະຕິບັດໜ້າທີ່ໃນແຕ່ລະໄລຍະ

ນອກນີ້,​ ວັນ​ດັ່ງ​ກ່າວ ແມ່ນເພື່ອປູກຈິດສໍານຶກ ໃຫ້ແກ່ແພດໝໍ ແລະ ພະນັກງານສາທາລະນະສຸກ ຮຸ່ນສືບທອດ​ ຮໍ່າຮຽນເອົາແບບ ຢ່າງອັນດີງາມຂອງແພດໝໍ ແລະ  ພະນັກງານສາທາລະນະສຸກຮຸ່ນກ່ອນ, ອອກແຮງຝຶກຝົນຫຼ່ໍຫຼອມສ້າງຕົນເອງ ໃຫ້ກາຍເປັນແພດໝໍ ທີ່ພຽບພ້ອມໄປດ້ວຍຄຸນສົມບັດ, ຈັນຍາທໍາວິຊາຊີບ ແລະ ຄວາມຊຳນານງານດ້ານວິຊາສະເພາະ,​ ສົມກຽດສັກສີທີ່ວ່າ​ ເປັນນັກຮົບເສື້ອຂາວປະຕິວັດຂອງພັກ; ວັນແພດລາວກຳເນີດເກີດຂຶ້ນ​ຜ່ານຂະບວນການວິວັດແຫ່ງການເຕີບໃຫ່ຍຂະຫຍາຍຕົວ ຂອງການແພດລາວ ໃນແຕ່ລະສະໄໝ ແຕ່ດຶກດຳບັນ ແລະ ຕິດພັນກັບຂະບວນການຕໍ່ສູ້ກູ້ຊາດ ຂອງລາວເຮົາແຕ່ລະໄລຍະ

ວັນແພດລາວ ແມ່ນວັນໜຶ່ງ ທີ່ເປັນປະຫວັດສາດອັນລໍ້າຄ່າ ຂອງຂະແໜງການສາທາລະນະສຸກ, ເປັນວັນສ້າງຂະບວນການ, ກິດຈະກຳຕ່າງໆ ເພື່ອລະນຶກເຖິງຜົນງານ ແລະ ສັນລະເສີນຄຸນງາມຄວາມດີຂອງແພດລາວ ໃນສະໄໝຕໍ່ສູ້ກູ້ຊາດ ກໍຄືໄລຍະປົກປັກຮັກສາ ແລະ ພັດທະນາປະເທດຊາດ ເພື່ອປຸກລະດົມມວນຊົນໄດ້ເຂົ້າໃຈ,​ ໃຫ້ເຫັນຄວາມສໍາຄັນ​ ແລະ ເປັນເຈົ້າການໃນການກັນພະຍາດ, ສົ່ງເສີມ ແລະ ຮັກສາສຸຂະພາບຂອງຕົນເອງ, ຄອບຄົວ ແລະ ສັງຄົມ

ທ່ານ​ ດຣ. ​ຄິດສະແຫວງ ສີສຸລາດ ກ່າວຕື່ມວ່າ: ຕະຫຼອດໄລຍະຜ່ານມາ,​ ໂຮງໝໍໄດ້ສຸມໃສ່ການພັດທະນາ​ 3​ ດ້ານຕົ້ນຕໍ​ ຄື: ການຍົກລະດັບຄຸນນະພາບ ການບໍລິການ​ ໂດຍສະເພາະ ການປິ່ນປົວພະຍາດ, ການພັດທະນາລະບົບດິຈິຕອນ​ ເພື່ອເພີ່ມປະສິດທິພາບ ການບໍລິການ ແລະ ການເສີມສ້າງຂີດຄວາມສາມາດ ຂອງບຸກຄະລາກອນການແພດ. ພ້ອມນັ້ນ, ໂຮງໝໍແຂວງ​ ຍັງໄດ້ສຸມໃສ່ ປະຕິບັດພາລະບົດບາດການເປັນໂຮງໝໍສູນກາງດ້ານການປິ່ນປົວ, ໂຮງໝໍສິດສອນ ແລະ ໂຮງໝໍຮັບສົ່ງຕໍ່ຄົນເຈັບສໍາລັບພາກໃຕ້.​ ການເຄື່ອນໄຫວວຽກງານ​ ກໍ່ໄດ້ປະຕິບັດຕາມນະໂຍບາຍຂອງກອງທຶນປະກັນສຸຂະພາບແຫ່ງຊາດ ແລະ ລະບຽບການ ຂອງກະຊວງສາທາລະນະສຸກ​ ຢ່າງເຂັ້ມງວດ. ເຖິງແມ່ນວ່າຈະມີຂໍ້ຈຳກັດດ້ານງົບປະມານ ແລະ ​ຊັບພະຍາກອນ​ ແຕ່ໂຮງໝໍ ແຂວງ​ ສາມາດຮັກສາມາດຕະຖານການບໍລິການ ແລະ ສ້າງຄວາມເຊື່ອໝັ້ນໃຫ້ແກ່ສັງຄົມໄດ້ຢ່າງ ຕໍ່ເນື່ອງ

ນອກນີ້,​ ການເຄື່ອນໄຫວແຕ່ລະດ້ານ​ ຍັງປະຕິບັດຕາມ 5 ໜ້າທີ່ຫຼັກຂອງໂຮງໝໍ​ ຕົ້ນຕໍແມ່ນວຽກງານກັນພະຍາດ ແລະ ສົ່ງເສີມສຸຂະພາບ,​ ວຽກງານສັກວັກຊີນກັນພະຍາດ,​ ວຽກງານສົ່ງເສີມສຸຂະພາບ,​ ວຽກງານສົ່ງເສີມສຸຂະພາບແມ່ (ແມ່ຍິງຖືພາ ແລະ ຫຼັງເກີດ),​ ວຽກງານສຸຂະພາບຈະເລີນພັນ ແລະ ວາງແຜນຄອບຄົວ,​ ວຽກງານສົ່ງເສີມສຸຂະພາບເດັກລຸ່ມ 5 ປີ,​ ວຽກງານກັນພະຍາດ ແລະ ຄວບຄຸມພະຍາດຕິດຕໍ່,​ ວຽກງານປິ່ນປົວ ແລະ ຟື້ນຟູໜ້າທີ່ການ,​ ວຽກງານຊີ້ນໍາໂຮງໝໍຂັ້ນລຸ່ມ,​ ວຽກງານຄຸ້ມຄອງ​ – ພັດທະນາພະນັກງານ,​ ວຽກງານການຮຽນການສອນ ແລະ ຄົ້ນຄວ້າວິທະຍາສາດ

ສະແດງຄຳຄິດເຫັນ