ສັດຕູພືດ ຈຳນວນ 20 ຊະນິດ ກຳລັງຢູ່ໃນເປົ້າໝາຍການຕິດຕາມເຝົ້າລະວັງ ແລະ ປ້ອງກັນການແຜ່ລະບາດ ຂອງ ເຈົ້າໜ້າທີ່ ຂະແໜງປູກຝັງ ຢູ່ ແຂວງຈຳປາສັກ.
ສັດຕູພືດທີ່ສໍາຄັນຄື: ບົ້ງຝູງ ສາລີ, ບົ້ງເຈາະຝ່າຍ, ບົ້ງກັດຄໍຮວງເຂົ້າ, ບົ້ງຝູງຢາສູບ, ບົ້ງຮໍາໃບ, ບົ້ງເຈາະໝາກຖົ່ວລຽນ, ເພ້ຍຈັກຈັ່ນສີນໍ້າຕານ, ຕັກແຕນຝູງໄມ້ປ່ອງ ແລະ ອື່ນໆ.
ວັນທີ 20 ມິຖຸນາ 2025, ກົມປູກຝັງ ກະສິກຳ ແລະ ປ່າໄມ້ ສົມທົບກັບຂະແໜງປູກຝັງ ພະແນກ ກະສິກໍາ ແລະ ປ່າໄມ້ ແຂວງຈໍາປາສັກ, ຫ້ອງການ ກະສິກຳ ແລະ ປ່າໄມ້ ເມືອງ ໂພນທອງ ໄດ້ຕິດຕັ້ງກັບດັກແສງໄຟ (Light trap) ຢູ່ບ້ານອຸປະຫຼາດ ເມືອງໂພນທອງ ຊຶ່ງເປັນແຂວງທີ 8 ໃນ ປະເທດລາວ ແລະ ເປັນຈຸດທໍາອິດ ຂອງ ແຂວງຈໍາປາສັກ ເພື່ອຕິດຕາມເຝົ້າລະວັງແມງໄມ້ສັດຕູພືດ.
ການຕິດຕັ້ງກັບດັບແສງໄຟ ດັ່ງກ່າວ ນອນຢູ່ໃນແຜນການຈັດຕັ້ງປະຕິບັດ ຂອງໂຄງການຮ່ວມມືຫ້ອງແລບລາວ – ຈີນ (Lao – China, IPPCAAS) ໂດຍໄດ້ຮັບການສະໜັບສະໜູນ ທາງດ້ານວິຊາການ ແລະ ງົບປະມານ ຈາກສະຖາບັນຄົ້ນຄ້ວາວິທະຍາສາດປ້ອງກັນພືດ ສປ ຈີນ (IPPCAAS).
ທ່ານ ບຸນຊູ ສຸດມາລີ ຮອງຫົວໜ້າກົມ ປູກຝັງ ກ່າວວ່າ: ກັບດັກແສງໄຟ ເປັນເຄື່ອງມືຊະນິດໜຶ່ງທີ່ມີຄວາມສໍາຄັນ ແລະ ມີບົດບາດ ໃນການຕິດຕາມເຝົ້າ ລະວັງ, ພະຍາກອນ ການເຄື່ອນຍ້າຍ, ອົບພະຍົບຂອງແມງໄມ້ບາງຊະນິດໄດ້ດີ ແລະ ເປັນທາງເລືອກໜຶ່ງທີ່ຊາວກະສິກອນ ມັກໃຊ້ໃນການເຝົ້າລະວັງການລະບາດຂອງສັດຕູພືດ ເຊິ່ງສາມາດຄໍານວນຈໍານວນປະຊາກອນຂອງແມງໄມ້ຊະນິດຕ່າງໆ ທີ່ມີຄວາມສ່ຽງທີ່ຈະເຂົ້າມາທໍາລາຍພືດ ໃນສະພາບການປ່ຽນແປງ ຂອງດິນຟ້າອາກາດ. ສູນປ້ອງກັນພືດ ເປັນສູນໜຶ່ງທີ່ມີພາລະບົດບາດໃນການຕິດຕາມເຝົ້າລະວັງ ສັດຕູພືດຕ່າງແດນ ແລະ ສັດຕູພືດ ພາຍໃນທີ່ເຂົ້າມາທໍາລາຍພືດ ແລະ ແຜ່ລະບາດ ໃນ ສປປ ລາວ ເພື່ອຊອກຫາວິທີທາງໃນການປ້ອງກັນກຳຈັດໃຫ້ທ່ວງທັນກັບສະພາບການ. ການຕິດຕັ້ງກັບດັກແສງໄຟ ກໍ່ເປັນອີກວິທີໜຶ່ງທີ່ຊ່ວຍໃນການຕິດຕາມເຝົ້າລະວັງສັດຕູພືດຂອງເຂົ້າ, ສາລີ, ມັນຕົ້ນ, ພືດຜັກ ແລະ ໄມ້ໃຫ້ໝາກ ໂດຍໄດ້ເນັ້ນໃສ່ 20 ຊະນິດ, ສັດຕູພືດທີ່ສໍາຄັນຄື: ບົ້ງຝູງ ສາລີ, ບົ້ງເຈາະຝ່າຍ, ບົ້ງກັດຄໍຮວງເຂົ້າ, ບົ້ງຝູງຢາສູບ, ບົ້ງຮໍາໃບ, ບົ້ງເຈາະໝາກຖົ່ວລຽນ, ເພ້ຍຈັກຈັ່ນສີນໍ້າຕານ, ຕັກແຕນຝູງໄມ້ປ່ອງ ແລະ ອື່ນໆ ໂດຍການຕິດຕັ້ງກັບດັກແມງໄມ້ ເພື່ອຕິດຕາມເກັບກຳຂໍ້ມູນຊ່ວຍເຝົ້າລະວັງສັດຕູພືດ ທີ່ສໍາຄັນດັ່ງກ່າວເພາະຈະໄດ້ຮູ້ຊະນິດ ແລະ ຈຳນວນປະຊາກອນຂອງແມງໄມ້ທີ່ເຂົ້າມາຕິດກັບດັກແສງໄຟ ພ້ອມທັງຈຳແນກຫາຊະນິດທີ່ເປັນສັດຕູພືດສໍາຄັນຂອງພືດ ເຊັ່ນ: ເຂົ້າ, ສາລີ, ມັນຕົ້ນ, ພືດຜັກ ແລະ ໄມ້ໃຫ້ໝາກ ເຫຼົ່ານີ້ເປັນຕົ້ນ.
ທ່ານ ຮອງຫົວໜ້າ ກົມປູກຝັງ ກ່າວຕື່ມວ່າ: ຈຸດປະສົງ ໃນການຕິດຕັ້ງກັບດັກແສງໄຟ ເຂົ້າໃນການຕິດຕາມເຝົ້າລະວັງສັດຕູພືດທີ່ສໍາຄັນຂອງເຂົ້າ, ສາລີ, ມັນຕົ້ນ, ພືດຜັກ ແລະ ໝາກໄມ້ ກໍ່ເພື່ອເກັບກຳຂໍ້ມູນ, ເກັບຕົວຢ່າງມາວິໄຈ ຫາຊະນິດສັດຕູພືດທີ່ສໍາຄັນ ຂອງ ເຂົ້າ, ສາລີ, ມັນຕົ້ນ, ພືດຜັກ ແລະ ໝາກໄມ້ ທັງຊອກຫາວິທີທາງໃນການປ້ອງກັນ ແລະ ກຳຈັດໃຫ້ທ່ວງທັນກັບສະພາບການ.
ພາຍຫຼັງຕິດຕັ້ງ ກັບດັກແສງໄຟສໍາເລັດ ກໍ່ໄດ້ມອບ ແລະ ແນະນໍາວິທີການນໍາໃຊ້ ກັບດັກແສງໄຟ ໃຫ້ວິຊາການຜູ້ຮັບຜິດຊອບ ເພື່ອໃຫ້ມີຄວາມພ້ອມໃນການຈັດຕັ້ງປະຕິບັດວຽກງານໃນຕໍ່ໜ້າ.
