ນັກສຶກສາລາວ ຈຳ​ນວນ 53 ຄົນ (ຍິງ 34 ຄົນ) ໄດ້ສຳເລັດ​ການ​ສຶກ​ສາ ສາຂາ ຄູພາສາຈີນ ໃນຫຼັກສູດ 2+2 ຮຸ່ນທໍາອິດ ຂອງມະຫາວິທະຍາໄລ ຊົນເຜົ່າກວາງຊີ ສປ ຈີນ ແລະ ມະຫາວິທະຍາໄລແຫ່ງຊາດ.

ມະຫາວິທະຍາໄລ ຊົນເຜົ່າກວາງຊີ ສປ ຈີນ ໄດ້ຈັດພິທີມອບຮັບໃບປະກາດສະນີຍະບັດໃຫ້ແກ່ນັກສຶກ ດັ່ງ​ກ່າວ ເມື່ອມໍ່ໆມານີ້

ສຈ.ປອ. ເດຊານຸລາດ ແສນດວງເດດ ອະທິການບໍດີມະຫາວິທະຍາໄລແຫ່ງຊາດ ໄດ້ຊົມເຊີຍ ນັກສຶກສາຮຸ່ນທໍາອິດ ທີ່ສາມາດອົດທົນ ຜ່ານຜ່າອຸປະສັກ ຈົນສາມາດຈົບ ແລະ ໄດ້ຮັບປະກາດສະນີຍະບັດໝົດທຸກຄົນ ພ້ອມທັງຮຽກຮ້ອງໃຫ້ນັກສຶກສາ ຈົ່ງສືບຕໍ່ມານະຈິດ ໃນການສືບຕໍ່ຊອກຮູ້ຮໍ່າຮຽນ, ຮູ້ບຸນຄຸນ,​ ເປັນຄົນດີຂອງສັງຄົມ ກຽມພ້ອມຮັບໃຊ້ຊາດ ຮັບໃຊ້ປະຊາຊົນ.

ສຈ.ປອ. ເດຊານຸລາດ ແສນດວງເດດ ຍັງ​ໄດ້​ກ່າວຂອບໃຈມາຍັງ ຝ່າຍຈີນທຸກພາກສ່ວນ ທີ່ໄດ້ຊ່ວຍມະຫາວິທະຍາໄລແຫ່ງຊາດ ໃນການສ້າງບຸກຄະລາກອນ.

ນອກຈາກນັ້ນ  ທ່ານ ວົງປາໂນ ສີປະເສີດ ກົງສຸນໃຫຍ່ ແຫ່ງ ສປປ ລາວ ປະຈໍານະຄອນໜານໜິງ, ທ່ານ ສຈ. ປອ. ປ້ຽນເສິນຫຼິນ ເລຂາຄະນະພັກມະຫາວິທະຍາໄລຊົນເຜົ່າກວາງຊີ, ທ່ານ ສຈ.ປອ. ເຫວີຍຊືເຈີນ ອະທິການບໍດີມະຫາວິທະຍາໄລຊົນເຜົ່າກວາງຊີ, ທ່ານ ຫູຈືຜິງ ຮອງຫົວໜ້າສູນຮ່ວມມືພາສາຈີນ-ພາສາຕ່າງປະເທດ ກະຊວງສຶກສາທິການຈີນ ກໍ່ໄດ້ຜັດ​ປ່ຽນ​ກັນຂຶ້ນກ່າວຊົມເຊີຍ ແລະ ຕີລາຄາສູງຕໍ່ ຜົນງານການຮ່ວມມື ລະຫວ່າງ ມະຫາວິທະຍາໄລແຫ່ງຊາດ ແລະ ມະຫາວິທະຍາໄລ ຊົນເຜົ່າກວາງຊີ ໃນການສ້າງບຸກຄະລາກອນ ດ້ານຄູພາສາຈີນ ເຊິ່ງເປັນສາຂາທີ່ ສປປ ລາວ ພວກເຮົາຍັງຂາດແຄນ.

ໃນພິທີດັ່ງກ່າວ ສຈ. ປອ. ເດຊານຸລາດ ແສນດວງເດດ ແລະ ທ່ານ ສຈ. ປອ. ນ. ເຫວີຍຊືເຈີນ ໄດ້ຂຶ້ນມອບປະກາດສະນີຍະບັດ ຮ່ວມກັນໃຫ້ແກ່ນັກສຶກສາສາຂາຄູພາສາຈີນຈໍານວນ 53 ຄົນ.ໃນຕອນທ້າຍຕາງໜ້ານັກສຶກສາໄດ້ຂຶ້ນກ່າວສະແດງຄວາມຂອບໃຈ ແລະ ຂຶ້ນຮ້ອງເພງມະຫາວິທະຍາໄລຊົນເຜົ່າກວາງຊີ ແລະ ເພງລາກ່ອນ ເຊິ່ງໄດ້ສ້າງບັນຍາກາດ ແລະ ຄວາມປະທັບໃຈໃນພິທີດັ່ງກ່າວ.

ນອກ​ຈາກ ຄະ​ນ​ະ​ນຳ ຂ​ອງ ສອງ​ມະ​ຫາ​ວິ​ທະ​ຍາ​ໄລ ແລະ ສູນຮ່ວມມືພາສາຈີນ-ພາສາຕ່າງປະເທດ ກະຊວງສຶກສາທິການຈີນ ເຂົ້າ​ຮ່ວມ​ໃນພິ​ທີນີ້ ຍັງ​ມີ ທ່ານ ຫຼົວຢ້າວກວາງ ຫົວໜ້າຫ້ອງການ ພົວພັນສາກົນ ພະແນກສຶກສາ ແຂວງກວາງຊີ ກໍ່ໄດ້ເຂົ້າຮ່ວມ ເຊັ່ນ​ກັນ.

ສະແດງຄຳຄິດເຫັນ