ບໍລິສັດ ທາງລົດໄຟລາວ-ຈີນ ຈຳກັດ ໄດ້ອອກ​ ຖະ​ແຫຼງ​ການ ຊີ້​ແຈງ ແລະ ເຕືອນ ປະ​ຊາ​ຊົນ ພາຍຫຼັງ ມີກຸ່ມມິດສາຊີບແອບອ້າງ ເປັນພະນັກງານ ທາງລົດໄຟລາວ-ຈີນ.

ເມື່ອບໍ່ດົນມານີ້,  ບໍລິສັດ ທາງລົດໄຟລາວ-ຈີນ ຈຳກັດ ໄດ້ຮັບຂ່າວວ່າ ມີມິດສາຊີບແອບອ້າງ ເປັນພະນັກງານລົດໄຟ ແລະ ໂທຊັກຊວນໃຫ້ປະຊາຊົນ ດາວໂຫຼດແອັບພິເຄຊັນຊື້ປີ້ລົດໄຟ ຫຼື ໃຫ້ກົດລິ້ງຂຽນຂໍ້ມູນສ່ວນຕົວ ເຊິ່ງອ້າງວ່າຈະມີສ່ວນຫຼຸດພິເສດ ຫຼື ມີລາງວັນໃຫ້  ເຊິ່ງມີເຈດຕະນາຕົວະຍົວະຫຼອກລວງສໍ້ໂກງ.  ຕໍ່ກັບເຫດການດັ່ງກ່າວນີ້,  ບໍລິສັດ ທາງລົດໄຟລາວ-ຈີນ ຈຳກັດ ຂໍປະກາດ ແລະ ຊີ້ແຈງ ດັ່ງລຸ່ມນີ້:

ບໍລິສັດ ທາງລົດໄຟລາວ-ຈີນ ຈໍາກັດ  ແມ່ນບໍ່ເຄີຍໄດ້ມອບສິດ ໃຫ້ບຸກຄົນ ຫຼື ຝ່າຍທີສາມໃດໆ ເພື່ອເຮັດການຕະຫຼາດ ກ່ຽວກັບການຊື້ປີ້ລົດໄຟ ຫຼື ການບໍລິການອື່ນໆທີ່ອ້າງວ່າ “ມີສ່ວນຫຼຸດພິເສດ” ຫຼື “ມີລາງວັນ”.  ໃນປະຈຸບັນ,  ຊ່ອງທາງການຊື້ປີ້ລົດໄຟທີ່ເປັນທາງການ ຂອງທາງລົດໄຟລາວ-ຈີນ ແມ່ນມີພຽງແຕ່ແອັບພິເຄຊັນຂາຍປີ້ອອນລາຍ LCR Ticket ແລະ ແອັບພິເຄຊັນ 12306 ຂອງລົດໄຟແຫ່ງຊາດຈີນ (ໃຊ້ສະເພາະລົດໄຟຂ້າມແດນລາວ-ຈີນ) ເທົ່ານັ້ນ.

ບໍລິສັດ ທາງລົດໄຟລາວ-ຈີນ ຈໍາກັດ   ຂໍໃຫ້ພໍ່ແມ່ປະຊາຊົນ ຈົ່ງຊື້ປີ້ຜ່ານຊ່ອງທາງທີ່ເປັນທາງການດັ່ງຂ້າງເທິງ,  ຈົ່ງຢ່າຫຼົງເຊື່ອໃນຂໍ້ມູນ ແລະ ລິ້ງເຊື່ອມຕໍ່ທີ່ບໍ່ຮູ້ແຫຼ່ງທີ່ມາ ຫຼື ສາຍໂທລະສັບທີ່ແອບອ້າງຊື່ພະນັກງານ ທາງລົດໄຟຢ່າງເດັດຂາດ ເພື່ອປ້ອງກັນ ບໍ່ໃຫ້ເກີດຄວາມເສຍຫາຍ ດ້ານຊັບສິນ.  ຖ້າຫາກທ່ານພົບເຫັນພຶດຕິກຳທີ່ໜ້າສົງໃສ,  ກະລຸນາແຈ້ງເຈົ້າໜ້າທີ່ຕຳຫຼວດໃຫ້ທັນການ.

ບໍລິສັດພວກເຮົາ ຈະດໍາເນີນການຕາມກົດໝາຍ ຕໍ່ກັບການແອບອ້າງເປັນພະນັກງານທາງລົດໄຟ ຫຼື ນຳຊື່ທາງລົດໄຟລາວ-ຈີນ ໄປໃຊ້ໃນທາງທີ່ຜິດ ອັນເປັນການລະເມີດ ສິດທິຜົນປະໂຫຍດ ຂອງຜູ້ຊົມໃຊ້ ບໍລິການທາງລົດໄຟ ແລະ ສ້າງຄວາມວຸ້ນວາຍໃຫ້ແກ່ສັງຄົມ  ໂດຍຈະໄດ້ແຈ້ງພາກສ່ວນກ່ຽວຂ້ອງຕາມກົດໝາຍ ພ້ອມສະຫງວນສິດໃນການຮ້ອງຟ້ອງ.

ທາງລົດໄຟແມ່ນຮູບແບບການຂົນສົ່ງສາທາລະນະ ທີ່ຕິດພັນກັບສິດຜົນປະໂຫຍດຂອງມາຫາຊົນ.  ບໍ​ລິ​ສັດ ຈະສືບຕໍ່ໃຫ້ບໍລິການທີ່ສະດວກສະບາຍ, ປອດໄພ ແລະ ໜ້າໄວ້ເນື້ອເຊື່ອໃຈ  ໃຫ້ແກ່ຜູ້ໂດຍສານທຸກໆທ່ານ.

ສະແດງຄຳຄິດເຫັນ