ໃນວັນທີ 6 ກໍລະກົດຜ່ານມານີ້, ຄະນະຮັບຜິດຊອບກຸ່ມກອກຫວານ ນະຄອນຫຼວງພະບາງ ແຂວງຫຼວງພະບາງ ໄດ້ລົງກວດກາຕົວຈິງ ຜົນກະທົບໄພພິບັດນ້ຳຖ້ວມ ຢູ່ບ້ານນາດອນຄູນ ທີ່ຖືກກະທົບຈາກໄພນ້ຳຖ້ວມ ນຳໂດຍ ທ່ານ ພັນໂທ ບຸນຄົງ ອຳພອນ ຮອງຫົວໜ້າກອງບັນຊາການປ້ອງກັນຄວາມສະຫງົບ ນະຄອນຫຼວງພະບາງ ຮອງຫົວໜ້າກຸ່ມພັດທະນາກອກຫວານ.

ບ້ານ ນາດອນຄູນ ຕັ້ງຢູ່ຫ່າງຈາກເທສະບານນະຄອນ 24 ກິໂລແມັດ, ປະກອບມີ 42 ຫຼັງຄາເຮືອນ, ມີ 40 ຄອບຄົວ, ມີ214 ຄົນຍິງ 94 ຄົນ, ການປະກອບອາຊີບສ່ວນໃຫຍ່ຂອງປະຊາຊົນ ແມ່ນທໍາການຜະລິດກະສິກຳເຊັ່ນ: ເຮັດນາ, ລ້ຽງສັດ, ບໍລິການຄ້າຂາຍ ແລະກຳມະກອນ ເປັນອາຊີບຕົ້ນຕໍ.

ໃນຄ່ຳຄືນຂອງວັນທີ 5 ກໍລະກົດ ຜ່ານມາເກີດມີຝົນຕົກໜັກ ເຮັດໃຫ້ນ້ຳຫ້ວຍງູນ ແລະນ້ຳຫ້ວຍພູໝາກຫີນ ເກີດມີນ້ຳນອງໄຫຼຊຸກະທັນຫັນ ເຂົ້າຖ້ວມເຮືອນຂອງປະຊາຊົນພາຍໃນບ້ານຈຳນວນໜຶ່ງ ແລະຖ້ວມທົ່ງນາ. ຜ່ານການລົງກວດກາຕົວຈິງເຫັນວ່າ ເຮືອນຂອງປະຊາຊົນ ຖືກນ້ຳຖ້ວມ ຈຳນວນ 13 ຄອບຄົວ, ທົ່ງນາ 10ກວ່າເຮັກຕາ ຖືກນ້ຳໄຫຼຊຸເອົາຂີ້ດິນ, ໝາກຫີນ, ຂອນໄມ້ ຖົມນາເຂົ້າທີ່ປູກກຳລັງຂຽວງາມ, ທັງໄດ້ຍື່ງຖ້ວມທົ່ງນາເປັນວົງກວ້າງ ແລະຜົນລະປູກຈຳນວນໜຶ່ງ ແມ່ນຖືກນ້ຳຖ້ວມ. ປັດຈຸບັນປະຊາຊົນ ຂາດນ້ຳສະອາດຊົມໃຊ້, ຂາດສະບຽງອາຫານ ແລະເຄື່ອງໃຊ້ພາຍໃນຄອບຄົວຈຳນວນໜຶ່ງແມ່ນຖືກນ້ຳຖ້ວມ, ສ່ວນການແກ້ໄຂເບື້ອງຕົ້ນ ປະຊາຊົນໄດ້ຍ້າຍເຄື່ອງຂອງ ແລະສັດລ້ຽງຂຶ້ນໄປໄວ້ທີ່ສູງ ທັງໄດ້ເລັ່ງອະນາໄມເຮືອນທີ່ຖືກນ້ຳຖ້ວມ ພາຍຫຼັງລະດັບນ້ຳຫລຸດລົງ.

ພາບ-ຂ່າວ: ຫ້ອງການ ຖວທ ນະຄອນຫຼວງພະບາງ.

ສະແດງຄຳຄິດເຫັນ