ການດັດແກ້ໃບຕາດິນຂອງໂຄງການທາງລົດໄຟ ລາວ-ໄທ ມີຄວາມຊັກຊ້າເປັນອີກບັນຫາໜຶ່ງທີ່ ສະມາຊິກສະພາປະຊາຊົນນະຄອນຫຼວງ ໃຫ້ຄວາມສົນໃຈ ແລະ ໄດ້ຊັກຖາມໃນກອງປະຊຸມສະໄໝາສາມັນ ເທື່ອ 9 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ II ໃນວັນທີ 9 ກໍລະກົດ 2025.

ຕໍ່ກັບບັນຫາດັ່ງກ່າວ ທ່ານ ອະໂນໄທ ຈັນທະລາສີ ຫົວໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ນະຄອນຫຼວງວຽງຈັນ ໄດ້ຊີ້ແຈງວ່າ ໂຄງການທາງລົດໄຟ ລາວ-ໄທ ແບ່ງອອກເປັນ 2 ໄລຍະຄື ໄລຍະທີ 1 ໄດ້ດໍາເນີນຊົດເຊີຍ ແລະ ດັດແກ້ໃບຕາດິນສໍາເລັດແລ້ວ ສ່ວນໄລຍະທີ 2 ທາງລົດໄຟມີຄວາມ 7,5 ກິໂລແມັດ ແລ່ນຜ່ານ 5 ບ້ານຄື ບ້ານນາຄວາຍໃຕ້ ບ້ານເມືອງນ້ອຍ ບ້ານສົມສະຫງ່າ ບ້ານໂນນຫວາຍ ແລະ ບ້ານຄໍາສະຫວາດ ໃນເບື້ອງຕົ້ນມີການກໍານົດເຂດສະຫງວນເບື້ອງລະ 40 ແມັດ ມີຈຳນວນຕອນດິນທີ່ຖືກຜົນກະທົບທັງໝົດ 288 ຕອນດິນ ກວມເອົາເນື້ອທີ່ທັງໝົດ 682,031 ຕາແມັດ ລວມມູນຄ່າທົດແທນຄ່າເສຍຫາຍປະມານ 170 ຕື້ກວ່າກີບ ແຕ່ໄດ້ມີການດັດແກ້ຍັບເຂດສະຫງວນເຂົ້າເປັນເບື້ອງລະ 20 ແມັດ ຕາມແຈ້ງການເລກທີ 409/ຫສນຍ ລົງວັນທີ 25 ມີນາ 2020 ໃນນັ້ນມີດິນທີ່ຖືກຜົນກະທົບທັງໝົດ 250 ຕອນດິນ ມີເນື້ອທີ່ດິນ 507.168 ຕາແມັດ ລວມມູນຄ່າທົດແທນຄ່າເສຍຫາຍທັງໝົດ 130 ຕື້ກວ່າກີບ ໃນນີ້ ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ນວ ໄດ້ຮັບໃບຕາດິນຈາກຫ້ອງການໂຍທາທິການ ແລະ ຂົນສົ່ງ ເມືອງໄຊເສດຖາ (ຍທຂ) ມາດັດແກ້ທັງ 56 ຕອນ ດັດແກ້ສໍາເລັດແລ້ວ 41 ຕອນ ຍັງຄ້າງ 15 ຕອນ.

ສຳລັບຕອນດິນທີ່ຍັງຄ້າງຕອນໜຶ່ງແມ່ນນອນຢູ່ໃນເຂດໂລກິສຕິກ ສ່ວນອີກ 14 ຕອນແມ່ນຍັງຄາທາງດ້ານເຕັກນິກການວັດແທກ ເຊິ່ງຍັງຄ້າງທັງໝົດ 15 ຕອນນີ້ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມຈະສຸມໃສ່ແກ້ໄຂໃຫ້ສໍາເລັດພາຍໃນເດືອນ ສິງຫາ 2025 ນີ້ ພ້ອມນີ້ກໍຈະໄດ້ສົມທົບນໍາຄະນະຮັບຜິດຊອບທົດແທນຄ່າເສຍຂອງໂຄງການເລັ່ງດຳເນີນການທົດແທນຄ່າເສຍຫາຍ ໃຫ້ຜູ້ໄດ້ຮັບຜົນກະທົບຈາກໂຄງການເພື່ອນໍາເອົາໃບຕາດິນຈໍານວນທີ່ຍັງເຫຼືອອີກ 194 ຕອນ ມາດັດແກ້ຕາມລະບຽບກົດໝາຍ.

ທີ່ມາ: ວຽງຈັນໃໝ່

ສະແດງຄຳຄິດເຫັນ