Meta ເຂົ້າຊື້ບໍລິສັດ Play AI ສ້າງສຽງເວົ້າຄືມະນຸດ ເສີມແຮງທຸລະກິດ

Meta ກ້າວໄປຂ້າງໜ້າລົງທຶນຄັ້ງໃຫຍ່ໃນສະຕາດອັບ Play AI ຜູ້ຊ່ຽວຊານດ້ານເທັກໂນໂລຢີສ້າງສຽງດ້ວຍ AI ທີ່ຄືກັບມະນຸດຈິງ ເພື່ອເສີມແຮງທຸລະກິດ AI ໂດຍສະເພາະດ້ານສຽງແລະຕົວລະຄອນສົມຈິງ

ການເຂົ້າຊື້ກິດຈະການຄັ້ງນີ້ໄດ້ຮັບການຢືນຢັນແລ້ວຈາກໂຄສົກຂອງ Meta ຕາມລາຍງານຂອງ Bloomberg ໂດຍເອກະສານພາຍໃນລະບຸວ່າ ທີມງານທັງໝົດຂອງ Play AI ຈະເຂົ້າຮ່ວມງານກັບ Meta ໃນອາທິດໜ້າ ໂດຍໄປມີສ່ວນຮ່ວມໃນໂຄງການຕ່າງໆ ທີ່ບໍລິສັດກຳລັງພັດທະນາຢູ່ໃນຕອນນີ້

ບໍລິສັດ Play AI ເປັນສະຕາດອັບທີ່ມີຊື່ສຽງຈາກການສ້າງສຽງເວົ້າທີ່ເປັນທຳມະຊາດ ລວມເຖິງການພັດທະນາແພລດຟອມທີ່ຜູ້ໃຊ້ງານສາມາດສ້າງສຽງໄດ້ງ່າຍແລະໄວ ຊຶ່ງສອດຄ່ອງຢ່າງຫຼາຍກັບແຜນການພັດທະນາຂອງ Meta ໃນກຸ່ມຜະລິດຕະພັນທີ່ກ່ຽວຂ້ອງ ເຊັ່ນ AI Characters, Meta AI, ອຸປະກອນ Wearables ແລະການຜະລິດເນື້ອຫາສຽງຕ່າງໆ

ປະກອບກັບໃນຊ່ວງທີ່ຜ່ານມາ Meta ມີການລົງທຶນເຊີງຮຸກໃນດ້ານ AI ມາຢ່າງຕໍ່ເນື່ອງ ທັງການດຶງຕົວບຸກຄະລາກອນລະດັບສູງຈາກ OpenAI ແລະດີລສຳຄັນກັບ Scale AI ທີ່ໄດ້ອາເລັກຊານເດີ ຫວັງ (Alexandr Wang) ຊີອີໂອ Scale AI ເຂົ້າມານຳທີມໃໝ່ທີ່ເນັ້ນການຄົ້ນຄ້ວາແລະພັດທະນາ Superintelligence ປັນຍາປະດິດຂັ້ນສູງໂດຍສະເພາະ

ຢ່າງໃດກໍຕາມ Meta ຍັງບໍ່ໄດ້ເປີດເຜີຍລາຍລະອຽດກ່ຽວກັບມູນຄ່າການຊື້ກິດຈະການຄັ້ງນີ້ ແຕ່ສຳນັກຂ່າວ Bloomberg ເຄີຍລາຍງານໄປກ່ອນໜ້ານີ້ວ່າທັງສອງບໍລິສັດໄດ້ເຈລະຈາກັນກ່ຽວກັບການລວມກິດຈະການນີ້ມາສັກລະຍະແລ້ວ

ດີລນີ້ສະແດງໃຫ້ເຫັນຢ່າງຊັດເຈນເຖິງທິດທາງແລະຄວາມທະເຍີທະຍານຂອງ Meta ໃນການກ້າວເປັນຜູ້ນຳເທັກໂນໂລຢີ AI ລະດັບໂລກໃນອະນາຄົດ ໂດຍສະເພາະການສ້າງສານປະສົບການສຽງທີ່ໃກ້ຄຽງກັບມະນຸດໃຫ້ກັບຜູ້ໃຊ້ງານແພລດຟອມຕ່າງໆ ຂອງບໍລິສັດ

ຂ່າວຈາກ: ກົດເພື່ອອ່ານ

ສະແດງຄຳຄິດເຫັນ