ດູໄບກະກຽມເປີດໂຕຮ້ານອາຫານແນວໃໝ່ຊື່ວ່າ “WOOHOO” ໃນເດືອນກັນຍານີ້ ໂດຍຕັ້ງຢູ່ໃຈກາງເມືອງ ໃກ້ກັບຕຶກເບີດຈະຄາລິຟາ ຈຸດເດັ່ນຂອງຮ້ານແມ່ນການໃຊ້ AI ພໍ່ຄົວທີ່ມີຊື່ວ່າ “Chef Aiman” ໃນການອອກແບບປະສົບການທຸກຢ່າງ ຕັ້ງແຕ່ເມນູອາຫານ ບັນຍາກາດ ໄປຈົນເຖິງການບໍລິການ

ຮ້ານອາຫານທຳອິດຂອງໂລກທີ່ໃຊ້ພໍ່ຄົວ AI

Chef Aiman ແມ່ນໂມເດລ AI ຂະໜາດໃຫຍ່ທີ່ຖືກຝຶກມາຈາກຂໍ້ມູນດ້ານວິທະຍາສາດອາຫານ ງານຄົ້ນຄວ້າກ່ຽວກັບອົງປະກອບເຊິງໂມເລກຸນຂອງວັດຖຸດິບ ແລະສູດອາຫານກວ່າພັນລາຍການຈາກຫຼາຍຫຼາກວັດທະນະທຳທົ່ວໂລກ ເຖິງແມ່ນວ່າ Aiman ຈະບໍ່ສາມາດລິ້ມລົດຊາດ ຫຼືດົມກິ່ນໄດ້ເໝືອນກັບພໍ່ຄົວມະນຸດ ແຕ່ລະບົບສາມາດວິເຄາະອາຫານໂດຍແຍກອອກເປັນອົງປະກອບຢ່າງລົດຊາດ ເນື້ອສຳຜັດ ຄວາມສົ້ມ ຫຼືຄວາມເຢັນ ກ່ອນຈະປະກອບຮ່າງເປັນສູດໃໝ່ທີ່ຄາດບໍ່ເຖິງ

ສູດຕົ້ນແບບເຫຼົ່ານີ້ຈະຖືກນຳມາທົດສອບໂດຍທີມພໍ່ຄົວຈິງພາຍໃຕ້ການດູແລຂອງພໍ່ຄົວຊື່ດັງປະຈຳດູໄບ “Reif Othman” ຊຶ່ງຈະຊ່ວຍໃຫ້ AI ເຂົ້າໃຈຄວາມມັກຂອງມະນຸດໃນເຊິງປະຕິບັດຫຼາຍຂຶ້ນ

ໃຊ້ AI ບໍ່ແມ່ນເພື່ອມາແທນທີ່ມະນຸດ

ຜູ້ຮ່ວມກໍ່ຕັ້ງຮ້ານ ແລະ CEO ຂອງບໍລິສັດ Gastronaut ຄືນາຍ Ahmet Oytun Cakir ຢືນຢັນວ່າ ເປົ້າໝາຍຂອງການໃຊ້ AI ບໍ່ແມ່ນເພື່ອມາແທນທີ່ມະນຸດ ແຕ່ເພື່ອຂະຫຍາຍຂອບເຂດຄວາມຄິດສ້າງສັນຂອງພໍ່ຄົວ ແລະເພີ່ມສັກກະຍະພາບການໃຊ້ວັດຖຸດິບຢ່າງຄຸ້ມຄ່າ

Chef Aiman ຍັງຖືກອອກແບບໃຫ້ສາມາດສ້າງສູດຈາກວັດຖຸດິບທີ່ມັກຖືກທິ້ງ ເຊັ່ນ ເສດເນື້ອ ຫຼືໄຂມັນ ເພື່ອຊ່ວຍຫຼຸດຜ່ອນຂີ້ເຫຍື້ອອາຫານ ແລະສົ່ງເສີມຄວາມຍືນຍົງໃນທຸລະກິດຮ້ານອາຫານ

ໃນໄລຍະຍາວ ຜູ້ພັດທະນາວາງແຜນທີ່ຈະເປີດໃຫ້ຮ້ານອາຫານອື່ນໆ ທົ່ວໂລກສາມາດນຳໃຊ້ Chef Aiman ໄດ້ໃນຮູບແບບລິຂະສິດ ຊຶ່ງອາດຈະກາຍເປັນກ້າວໃໝ່ໃນການປັບປຸງການຈັດການຫ້ອງຄົວ ຫຼຸດຜ່ອນຂອງເສຍ ແລະສ້າງປະສົບການການກິນທີ່ແປກໃໝ່ບໍ່ເໝືອນໃຜ

ສະແດງຄຳຄິດເຫັນ