ນະຄອນຫຼວງວຽງຈັນ (ນວ) ຈັດກິດຈະກຳເຕັ້ນແອໂຣບິກ ເພື່ອສ້າງຂະບວນການສະຫຼອງວັນສ້າງຕັ້ງກິລາ-ກາຍະກຳແຫ່ງຊາດລາວ ຄົບຮອບ 59 ປີ (13 ກໍລະກົດ 1966 – 13 ກໍລະກົດ 2025 ) ຢ່າງຄຶກຄື້ນເບີກບານ ແລະ ມ່ວນຊື່ນ.

ກິດຈະກຳ ເຕັ້ນແອໂຣບິກ ເພື່ອສຸຂະພາບ ແນໃສ່ສ້າງຂະບວນການສະເຫຼີມຫຼອງວັນສ້າງຕັ້ງກິລາ-ກາຍະກຳແຫ່ງຊາດລາວ ຄົບຮອບ 59 ປີ ຄັ້ງນີ້ໄດ້ຈັດຂຶ້ນໃນຕອນເຊົ້າວັນທີ 12 ກໍລະກົດ ຜ່ານມາ ທີ່ເດີ່ນພະທາດຫຼວງ ເມືອງໄຊເຊດຖາ ໂດຍມີ ທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫຼວງວຽງຈັນ, ທ່ານ ວິລະວັນ ບຸນສຸກໄທ ຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ ທັງເປັນຮອງປະທານ-ເລຂາທິການ ຄະນະກຳມະການພາຣາແລັມປິກແຫ່ງຊາດລາວ (ຄພລ), ທ່ານ ແສງພອນ ພົນອາມາດ ຮອງປະທານ-ເລຂາທິການຄະນະກຳມະການໂອແລັມປິກແຫ່ງຊາດ ຫຼື ຄອລ ແລະ ທ່ານ ບຸນທັນ ແສງມະນີ ຮອງຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ ຕະຫຼອດຮອດບັນດາປະຊາຊົນຊາວນະຄອນຫຼວງວຽງຈັນເຂົ້າຮ່ວມຫຼາຍຮ້ອຍຄົນ.

ໂອກາດນີ້, ທ່ານ ບຸນທັນ ແສງມະນີ ກໍໄດ້ໃຫ້ຮູ້ວ່າ: ບັນດາທ່ານຮູ້ນຳກັນແລ້ວວ່າ ກິລາ-ກາຍຍະກຳ ເປັນພະລັງແຮງ, ເປັນຢາວິເສດ ສະແດງເຖິງຄວາມເຂັ້ມແຂງທາງດ້ານຮ່າງກາຍ, ຈິດໃຈ ແລະ ທາງດ້ານມັນສະໝອງ ຊຶ່ງສະແດງອອກໃນສະໄໝຕໍ່ສູ້ກູ້ຊາດ ອັນຍືດເຍື້ອຍາວນານຂອງບັນພະບູລຸດ ກໍຄື ບັນດາທ່ານຜູ້ນຳທີ່ໄດ້ນຳພາການປະຕິວັດຕໍ່ສູ້ກູ້ຊາດ ຕ້ານຈັກກະພັດຜູ້ຮຸກຮານ ຢ່າງດຸເດືອດພາຍໃຕ້ຫ່າກະສູນ, ລະເບີດ, ລູກແຕກຂອງສັດຕູ ບໍ່ມີເວັ້ນແຕ່ລະວັນ ແຕ່ກໍໄດ້ຮັບໄຊຊະເປັນກ້າວໆມາ ກໍຍ້ອນມີການຝຶກຍຸດທະວິທີ ທາງດ້ານກິລາ-ກາຍຍະກຳ ເຮັດໃຫ້ຮ່າງກາຍ, ຈິດໃຈ ມີຄວາມເຂັ້ມແຂງ, ມີຄວາມອົດທົນ ສາມາດຍາດໄດ້ໄຊຊະນະຕະຫຼອດມາ.

ທ່ານ ບຸນທັນ ແສງມະນີ ໃຫ້ຮູ້ຕື່ມອີກວ່າ: ກິລາ-ກາຍຍະກຳ ນອກຈາກທີ່ເຮັດໃຫ້ສຸຂະພາບແຂງແຮງແລ້ວຍັງເປັນໄມ້ຫຼາວັດແທກ ໃນການສ້າງບັນຍາກາດໃຫ້ມີຄວາມເບີກບານມ່ວນຊື່ນ, ມີຄວາມສາມັກຄີຢ່າງສະໜິດແໜ້ນຢູ່ໃນກົມກອງ, ຂະແໜງການເຂດແນວໜ້າ-ແນວຫຼັງ, ຖັນແຖວພະນັກງານ, ທະຫານ-ຕຳຫຼວດ, ໂຮງຮຽນ ແລະ ຄຸ້ມບ້ານຕ່າງໆ ໃນທີ່ສຸດກອງກິລາ ກອງທັບປົດປ່ອຍປະຊາຊົນລາວກໍໄດ້ປະກາດສ້າງຕັ້ງຂຶ້ນ ໃນວັນທີ 13 ກໍລະກົດ 1966 ໂດຍແມ່ນທ່ານພົນເອກ ສີສະຫວາດ ແກ້ວບຸນພັນ ຫົວໜ້າເສນາທິການສູງສຸດ ກອງທັບປົດປ່ອຍປະຊາຊົນລາວ ໃນໄລຍະນັ້ນ ເປັນຜູ້ປະກາດສ້າງຕັ້ງຂຶ້ນ ອັນເປັນຂີດໝາຍແຫ່ງການກຳເນີດຂອງຂະບວນກິລາລາວ ຈົນເຖິງປັດຈຸບັນນີ້.

ທ່ານ ພູວົງ ວົງຄຳຊາວ ກ່າວວ່າ: ກິດຈະກຳສະເຫຼີມສະຫຼອງວັນກິລາ-ກາຍຍະກຳແຫ່ງຊາດ ຄົບຮອບ 59 ປີ. ນອກນັ້ນ, ກໍຍັງມີວັນສ້າງຕັ້ງສະຫະພັນແມ່ຍິງລາວ ຄົບຮອບ 70 ປີ (20 ກໍລະກົດ 1955 – 20 ກໍລະກົດ 2025) ແລະ ວັນເກີດຂອງປະທານ ສຸພານຸວົງ ຄົບຮອບ 116 ປີ ສະນັ້ນ, ໃນນາມຕາງໜ້າຄະນະນຳນະຄອນຫຼວງວຽງຈັນ ຂໍສະແດງຄວາມຊົມເຊີຍຄະນະຮັບຜິດຊອບ ຕະຫຼອດຮອດປະຊາຊົນຊາວ ນະຄອນຫຼວງວຽງຈັນ ທີ່ເສຍສະຫຼະເວລາທີ່ມີຄຸນຄ່າ ເຂົ້າຮ່ວມກິດຈະກຳຄັ້ງນີ້ ເພື່ອພ້ອມກັນຈາລຶກວັນສຳຄັນປະຫວັດສາດ ແນໃສ່ໃຫ້ຄົນຮຸ່ນຫຼັງໄດ້ສືບທອດຕໍ່ກັນຢ່າງມີຄວາມໝາຍເລິກເຊິ່ງ.

ໃນການຈັດກິດຈະກຳຄັ້ງນີ້ ໄດ້ຮັບການສະໜັບສະໜູນຫຼັກຈາກທ່ານ ບົວສະຫວ່າງ ຈຳປາພັນ ຜູ້ບໍລິຫານສັງວຽນໄກ່ຕີ ບ້ານບອນຂາຊ້າຍ, ນໍ້າດື່ມຜະລິດຕະພັນ ຣີໄວ ຈາກບໍລິສັດ ເບຍລາວ ຈຳກັດ ແລະ ທ່ານ ນາງ ວົງຈັນ ບົວແພງ ປະທານ ກອງປະກວດ Miss earth Laos ອີກດ້ວຍ.

(ຂ່າວ: ຕຸໄລເພັດ)

ສະແດງຄຳຄິດເຫັນ