ໃນວັນທີ 14-15 ກໍລະກົດ 2025, ຢູ່ທີ່ຫ້ອງປະຊຸມພະແນກການເງິນ ແຂວງວຽງຈັນ, ຄະນະຮັບຜິດຊອບປະເມີນການຈັດຕັ້ງປະຕິບັດບັນດາຫົວໜ່ວຍ ຜູ້ພັດທະນາລະບົບໂປຣມແກຣມບັນຊີທີ່ພົວພັນກັບການເຊື່ອມຕໍ່ໃບເກັບເງິນກັບລະບົບ Taxrisຂອງຂະແໜ່ງສວຍສາອາກອນ ໄດ້ລົງຕິດຕາມ, ກວດກາ ແລະ ການຈັດຕັ້ງປະຕິບັດກ່ຽວກັບວຽກງານຄຸ້ມຄອງ ແລະ ນຳໃຊ້ໃບເກັບເງິນ, ເຄື່ອງບັນທຶກການຂາຍສິນຄ້າ ແລະ ບໍລິການ (POS) ຢູ່ແຂວງວຽງຈັນ ນຳພາໂດຍ ທ່ານ ສຸພັນ ວິລາວົງ ຮອງຫົວໜ້າກົມສ່ວຍສາອາກອນ ກະຊວງການເງິນ, ພ້ອມດ້ວຍຄະນະ, ມີທ່ານ ສັງທອງ ມິດດາວົງ ຮອງຫົວໜ້າພະແນກການເງິນແຂວງວຽງຈັນ, ພ້ອມດ້ວຍຜູ້ປະກອບການເຂົ້າຮ່ວມ.

ທ່ານ ສຸພັນ ວິລາວົງ ກ່າວວ່າ: ການລົງມາຄັ້ງນີ້ ຈະໄດ້ສົມທົບກັບສ່ວຍສາອາກອນປະຈຳແຂວງວຽງຈັນ ປະເມີນຄືນກ່ຽວກັບວຽກງານຄຸ້ມຄອງ ແລະ ນຳໃຊ້ໃບເກັບເງິນ, ເຄື່ອງບັນທຶກການຂາຍສິນຄ້າ ແລະ ບໍລິການ (POS) ຢູ່ແຂວງວຽງຈັນ; ພ້ອມນີ້ຈະໄດ້ມີການເຜີຍແຜ່ແນະນຳບັນດານິຕິກຳຕ່າງໆ ທີ່ກ່ຽວຂ້ອງ ໃຫ້ບັນດາຫົວໜ່ວຍວິສາຫະກິດ, ພະນັກງານ, ລັດຖະກອນ ແລະ ຂະແໜງການທີ່ກ່ຽວຂ້ອງຂອງລັດ ໄດ້ນຳໄປຈັດຕັ້ງຜັນຂະຫຍາຍ; ພ້ອມທັງລົງກວດກາໃບເກັບເງິນຂອງບັນດາຫົວໜ່ວຍວິສາຫະກິດ; ເກັບກຳຂໍ້ມູນຂໍ້ມູນການອອກອະນຸຍາດ ແລະ ກວດກາບັນດາຫົວໜ່ວຍວິສາຫະກິດພາຍໃນແຂວງ ຕາມເປົ້າໝາຍທີ່ກຳນົດໄວ້ ສ່ວນທີ່ເຫຼືອແມ່ນມອບໃຫ້ສ່ວຍສາອາກອນປະຈຳແຂວງ, ເມືອງ ເປັນຜູ້ສືບຕໍ່ລົງຕິດຕາມ, ກວດກາ ປະເມີນຄືນ ແລະ ລາຍງານການປະຕິບັດງານເປັນແຕ່ລະໄລຍະ ແລະ ພາຍຫຼັງສຳເລັດຈະໄດ້ສ້າງບົດບັນທຶກຮ່ວມກັນ.

ທ່ານ ພູເຂົາທອງ ທອງສະຫວັນ ຮອງຫົວໜ້າສ່ວຍສາອາກອນປະຈຳແຂວງວຽງຈັນ ກ່າວວ່າ: ສະພາບການຈັດຕັ້ງປະຕິບັດ, ຄຸ້ມຄອງການນຳໃຊໃບເກັບເງິນ (ແບບເຈ້ຍ ແລະ POS) ຫົວໜ່ວຍວິສາຫະກິດເຂົ້າໃນລະບົບອາກອນມູນເພີ່ມຢູ່ແຂວງວຽງຈັນ (ລວມທັງແຂວງ ແລະ ເມືອງ) ຄຸ້ມຄອງມີ ຫົວໜ່ວຍອາກອນມູນຄ່າເພີ່ມ ທັງໝົດ 1,584 ຫົວໜ່ວຍ. ໃນນີ້,ແຂວງຄຸ້ມຄອງ 933 ຫົວໜ່ວຍ, ນຳໃຊ້ໃບເກັບເງິນແບບເຈ້ຍ ຈຳນວນ 808 ຫົວໜ່ວຍ, ແຂວງຄຸ້ມຄອງ 510 ຫົວໜ່ວຍ, ນໍາໃຊ້ເຄື່ອງ POS ຈຳນວນ 153 ຫົວໜ່ວຍ, ແຂວງຄຸ້ມຄອງ 52 ຫົວໜ່ວຍ ແລະ ຍັງບໍ່ນຳໃຊ້ ຈຳນວນ 623 ຫົວໜ່ວຍ, ແຂວງຄຸ້ມຄອງ 371 ຫົວໜ່ວຍ. ພ້ອມນີ້ ສ່ວຍອາກອນປະຈຳແຂວງວຽງຈັນ ໄດ້ເປີດກອງປະຊຸມໂຄສະນາເຜີຍແຜ່ດຳລັດວ່າດ້ວຍໃບເກັບເງິນ ສະບັບເລກທີ 297/ກງ, ລົງວັນທີ 29 ສິງຫາ 2022 ຈຳນວນ 2 ຄັ້ງ, ໄດ້ສົມທົບກັບພາກສ່ວນທີ່ກ່ຽວໄດ້ລົງການເຄື່ອນໄຫວ, ຊຸກຍູ້ເອົາຫົວໜ່ວຍວິສາຫະກິດເຂົ້າໃນລະບົບອາກອນມູນຄ່າເພີ່ມ ແລະ ຕິດຕັ້ງໂປຼແກຼມບັນຊີ, ເຄື່ອງບັນທຶກການຂາຍສິນຄ້າ ແລະ ບໍລິການ ສຳເລັດໄດ້ຈຳນວນໜຶ່ງ.

ໃນກອງປະຊຸມຄັ້ງນີ້ທີມງານທີ່ມາຈາກສູນກາງ ຍັງໄດ້ແນະນໍາການສ້າງບົດບັນທຶກຮ່ວມ ລະຫວ່າງ ຄະນະທີມງານສູນກາງ ກັບທ້ອງຖິ່ນ; ສ້າງແຜນການເຄື່ອນໄຫວ ໃນການຕິດຕາມຄຸ້ມຄອງ, ການນໍາໃຊ້ໃບເກັບເງິນ ແລະ ສິ່ງພິມຕ່າງໆ, ຄັດເລືອກເປົ້າໝາຍຫົວໜ່ວຍວິສາຫະກິດ ທີ່ນໍາໃຊ້ໃບເກັບເງິນ ອາກອນມູນຄ່າເພີ່ມ (ເປັນເຈ້ຍ); ໂປຼແກຣມເຄື່ອງບັນທຶກການຂາຍ-ບໍລິການ (POS) ພ້ອມນີ້ ກໍຍັງໄດ້ລົງກວດກາຕົວຈິງ ຕາມເປົ້າໝາຍຢູ່ເມືອງພາຍໃນເທດສະບານແຂວງຕື່ມອີກ.

(ແຫຼ່ງຂ່າວ: ແຂວງວຽງຈັນ)

ສະແດງຄຳຄິດເຫັນ