ເພື່ອເປັນການສ້າງຂະບວນການຂໍ່ານັບຮັບຕ້ອນ 3 ວັນປະກວັດສາດ ໂດຍສະເພາະ ແມ່ນສ້າງກິດຈະກໍາ, ຂະບວນການ ຕ້ອນຮັບກອງປະຊຸມໃຫຍ່ ຄັ້ງທີ 6 ຂອງອົງຄະນະພັກ ກະຊວງປ້ອງກັນຄວາມສະຫງົບ ທີ່ຈະໄຂຂຶ້ນໃນມໍ່ໆນີ້ ແລະ ສຸມໃສ່ຈັດຕັ້ງຜັນຂະຫຍາຍ 6 ວຽກງານຈຸດສຸມ ໃນວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ປີ 2024-2025 ໃຫ້ເປັນວຽກງານທົ່ວປວງຊົນ, ຄະນະກໍາມະການແກ້ໄຂບັນຫາຢາເສບຕິດລະດັບຊາດ ໄດ້ຈັດການແຂ່ງຂັນ ເພງຮ້ອງ, ກອນຂັບ-ລໍາ ແລະ ລະຄອນສັ້ນ ທົ່ວປະເທດ ຄັ້ງທີ 1 ໃນຫົວຂໍ້ “ພິດໄພຜົນຮ້າຍຂອງຢາເສບຕິດ ” ໃນວັນທີ 2 ສິງຫາ 2025 ທີ່ຫໍວັດທະນະທໍາແຫ່ງຊາດ, ເປັນກຽດເຂົ້າຮ່ວມໂດຍ ພົທ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີກະຊວງປ້ອງກັນຄວາມສະຫງົບ ຮອງປະທານຄະນະກໍາມະການແກ້ໄຂບັນຫາຢາເສບຕິດລະດັບຊາດ, ມີບັນດາແຂກຖືກເຊີນ, ຄະນະກໍາມະການ, ນັກປະພັນ ປະດິດຄິດແຕ່ງ, ສິນລະປິນ, ນັກຮ້ອງ, ໝໍລໍາ ແລະ ບັນດາມວນຊົນເຂົ້າຮ່ວມ.

ຜົນການແຂ່ງຂັນສໍາລັບເພງຮ້ອງ ອັນດັບທີ 1 ແມ່ນເພງ ສິ່ງເສບຕິດຢ່າຄິດຢາກລອງ ຂອງນັກປະພັນ ຄໍາແຜ່ວ ຫອມຣັດສະໝີ ຮ້ອງໂດຍ ທ້າວ ຄໍາຕາ ລໍທິເດດ ໄດ້ຮັບລາງວັນເງິນສົດ 20.000.000 ກີບ; ອັນດັບທີ 2 ມີ 2 ລາງວັນຄື: ຜົນງານເພງເດັດດ່ຽວປາບປາມຢາເສບຕິດ ປະພັນໂດຍ ຄໍາສະແຫວງ ວາດສະໜາສົ່ງ, ຮ້ອງໂດຍ ທ້າວ ວຽງທອງ ລົດຫາລາດ ແລະ ຜົນງານເພງຮ່ວມໃຈຕ້ານໄພຢາເສບຕິດ ຂອງນັກປະພັນ ສຸກສາຄອນ ພົມມະວິຫານ ຮອງໝູ່ຍິງ-ຊາຍ ໄດ້ຮັບລາງວັນເງິນສົດ ລາງວັນລະ 18.000.000 ກີບ ແລະ ອັນດັບທີ 3 ມີທັງໝົດ 9 ລາງວັນ ໄດ້ຮັບເງິນສົດ ລາງວັນລະ 15.000.000 ກີບ.

ປະເພດກອນຂັບ-ລໍາ ອັນດັບທີ 1 ແມ່ນລໍາແລ່ ຢ່າຄິດຢາກລອງ ປະພັນໂດຍ ພັຕ ສຸລິຍາ ຈັນທະວິໄຊ, ຂັບ-ລໍາໂດຍ ທ້າວ ບຸນນໍາ ໄຊຍະລາດ ໄດ້ຮັບລາງວັນເງິນສົດ 20.000.000 ກີບ; ອັນດັບທີ 2 ມີ 2 ລາງວັນຄືຶ: ລໍາຜູ້ໄທ ຈົ່ງຫ່າງໄກຢາເສບຕິດ ຂອງນັກປະພັນ ຄໍາພຸດ ເທບພະນົມ, ຂັບ-ລໍາໂດຍ ທ້າວ ແນັກ ໂພທິ່ມາດ ແລະ ລໍາຜູ້ໄທ ຮ່ວມໃຈຕ້ານຢາເສບຕິດ ຂອງນັກປະພັນ ບ່າວແມນ ອິນເຕີ ຂັບ-ລໍາໂດຍ ນາງ ການ້ອຍ ຫຼ້າພາວັນ ໄດ້ຮັບເງິນສົດ ລາງວັນລະ 18.000.000 ກີບ ແລະ ອັນດັບທີ 3 ມີທັງໝົດ 7 ລາງວັນ ໄດ້ຮັບເງິນສົດ ລາງວັນລະ 15.000.000 ກີບ.

ປະເພດລະຄອນສັ້ນ ອັນດັບທີ 1 ຕົກເປັນຂອງ ເລື່ອງເສຍໂອກາດ ໄດ້ຮັບເງິນລາງວັນ 30.000.000 ກີບ, ອັນດັບທີ 2 ມີ 2 ລາງວັນຄື: ເລື່ອງເງົາໃນເຮືອນ ແລະ ເລື່ອງສຸດຫົວໃຈ ໄດ້ຮັບເງິນສົດ ລາງວັນລະ 25.000.000 ກີບ ແລະ ລາງວັນທີ 3 ມີ 2 ລາງວັນຄື: ເລື່ອງໂອກາດ ແລະ ເລື່ອງເສບ ໄດ້ຮັບເງິນສົດລາງວັນລະ 20.000.000 ກີບ.

ຂ່າວ: ຄອນສະຫວັນ, ພາບ: ສິລິພອນ

ສະແດງຄຳຄິດເຫັນ