ວັນທີ 30 ກໍລະກົດທີ່ຜ່ານມາ, ມາກ ຊັກເກີເບີກ (Mark Zuckerberg) ໄດ້ໂພສວິດີໂອສັ້ນໃນຊ່ອງທາງເຟສບຸກ ແລະ ຕາມມາດ້ວຍຂໍ້ຄວາມສໍາຄັນທີ່ລະບຸວ່າ Meta ກໍາລັງຈະເປີດຕົວ ‘Superintelligence’ ຊຶ່ງເປັນ AI ທີ່ຈະເຂົ້າມາຊ່ວຍໃຫ້ມະນຸດເຮັດວຽກໄດ້ຢ່າງສະຫລາດຂຶ້ນ.

Meta ໄດ້ຈັດຕັ້ງ Meta Superintelligence Labs ທີ່ລວບລວມທີມງານ AI ລະດັບໂລກ ແລະ ກໍາລັງພັດທະນາໂມເດວ AI ຮຸ່ນໃໝ່ໆ ເຊັ່ນ Llama 4.1 ແລະ 4.2 ພ້ອມກັບການລົງທຶນອັນມະຫາສານໃນການສ້າງສູນປະມວນຜົນຂໍ້ມູນຂະໜາດໃຫຍ່ ເຊັ່ນ Prometheus ແລະ Hyperion ເພື່ອຮອງຮັບການພັດທະນາ AI ນີ້. ນອກຈາກນັ້ນຍັງມີການເວົ້າເຖິງແວ່ນຕາອັດສະລິຍະ (AI Smart Glasses) ຊຶ່ງຈະເປັນໜຶ່ງໃນເຄື່ອງມືຫຼັກຂອງມະນຸດໃນອະນາຄົດ. BT ໄດ້ສະຫຼຸບປະເດັນສໍາຄັນມາໃຫ້ ດັ່ງນີ້:

ເປົ້າໝາຍຫຼັກ: Meta ຕ້ອງການສ້າງ AI ສໍາຫຼັບທຸກຄົນ ພາຍໃຕ້ແນວຄິດ ‘We’re building personal superintelligence for everyone’ ເພື່ອມອບພະລັງງານແລະໂອກາດໃໝ່ໆ ໃນການນໍາໃຊ້ຊີວິດຢ່າງເຕັມທີ່. ແຕກຕ່າງຈາກ AI ອື່ນໆ ໃນຕະຫຼາດທີ່ເນັ້ນການຊ່ວຍງານສໍາຄັນພຽງຢ່າງດຽວ.

Superintelligence ຈະເຂົ້າມາເປັນທັງຄູ່ຫູແລະໝູ່, ທີ່ຈະຊ່ວຍໃຫ້ສິ່ງທີ່ພວກເຮົາມອງວ່າ ‘ມີຄຸນຄ່າ’ ກາຍເປັນຮູບທຳ ແລະ ມີຂະແໜງສ່ວນໂຕຫຼາຍຂຶ້ນ. ໂດຍເນັ້ນການເຊື່ອມໂຍງເຖິງກັນໃນເຊິງມະນຸດ, ຫຼາຍກວ່າການເປັນພຽງສິ່ງອໍານວຍຄວາມສະດວກທີ່ຊ່ວຍໃຫ້ເຮັດວຽກງ່າຍຂຶ້ນ.

ຈຸດເດັ່ນຂອງ Superintelligence:

• ສະຫລາດກວ່າຄົນ: AI ນີ້ຖືກອອກແບບມາໃຫ້ມີຄວາມສາມາດທີ່ເໜືອກວ່າສະຕິປັນຍາຂອງມະນຸດ
• AI ສ່ວນຕົວສໍາຫຼັບທຸກຄົນ: Meta ຕ້ອງການໃຫ້ທຸກຄົນເຂົ້າເຖິງແລະນໍາໃຊ້ Superintelligence ເພື່ອຕອບໂຈດຄວາມຕ້ອງການສ່ວນບຸກຄົນເປັນຫຼັກ

ແລ້ວພວກເຮົາຈະໄດ້ປະໂຫຍດຫຍັງຈາກ Superintelligence?

• ການໂຄສະນາທີ່ມີປະສິດທິຜົນຍິ່ງຂຶ້ນ: AI ຊ່ວຍເພີ່ມປະສິດທິຜົນແລະຜົນລັບຈາກການໂຄສະນາ, ໂດຍສະເພາະກັບຜູ້ປະກອບການລາຍຍ່ອຍທີ່ສາມາດສ້າງສັນໂຄສະນາໄດ້ງ່າຍຂຶ້ນ
• ປະສົບການທີ່ນ່າສົນໃຈ: AI ພັດທະນາລະບົບແນະນໍາເນື້ອຫາໃນ Facebook ແລະ Instagram ໃຫ້ມີຄວາມສະຫລາດຫຼາຍຂຶ້ນ, ເຮັດໃຫ້ຜູ້ໃຊ້ງານຄົ້ນພົບເນື້ອຫາທີ່ກົງກັບຄວາມສົນໃຈ ແລະ ໃຊ້ເວລາໃນແພລຕຟອມນານຂຶ້ນ
• ການສື່ສານທາງທຸລະກິດ: ໃນອະນາຄົດ, ທຸກທຸລະກິດຈະມີ AI ເປັນຂອງຕົນເອງ, ຊຶ່ງຈະຊ່ວຍໃຫ້ການສື່ສານກັບລູກຄ້າມີປະສິດທິຜົນແລະລຽບງ່າຍຫຼາຍຂຶ້ນ
• Meta AI ຜູ້ຊ່ວຍສ່ວນໂຕຊັ້ນນໍາ: Meta AI ກໍາລັງກ້າວຂຶ້ນເປັນ AI ສ່ວນໂຕທີ່ເຂົ້າເຖິງຜູ້ໃຊ້ງານກວ່າພັນລ້ານຄົນຕໍ່ເດືອນ ແລະ ພ້ອມຍົກລະດັບປະສົບການການນໍາໃຊ້ໃຫ້ດີຍິ່ງຂຶ້ນ
• ອຸປະກອນ AI ໃນຊີວິດປະຈໍາວັນ: ແວ່ນຕາ Ray-Ban Meta ແລະ Oakley Meta HSTN ຈະເປັນອຸປະກອນສໍາຄັນທີ່ຜະນວກ Superintelligence ເຂົ້າມາໃນຊີວິດປະຈໍາວັນຂອງພວກເຮົາໄດ້ຢ່າງລົງຕົວ

ນອກຈາກນີ້ Meta ຍັງສືບຕໍ່ເດີນໜ້າລົງທຶນໃນ Quest Ecosystem ເພື່ອພັດທະນາໂລກເສົມືອນຈິງ, ຊຶ່ງໄດ້ຮັບຄວາມນິຍົມເພີ່ມຂຶ້ນຢ່າງຕໍ່ເນື່ອງ, ບໍ່ວ່າຈະເປັນການຫຼິ້ນເກມ, ການເບິ່ງສື່, ຫຼື ການທ່ອງເວັບ.

ເປັນໄປໄດ້ບໍ່ວ່າ, ພວກເຮົາກໍາລັງຈະໄດ້ນໍາໃຊ້ຊີວິດແບບຕົວລະຄອນຫຼັກຈາກໜັງໃນຕໍານານເຊັ່ນເລື່ອງ ‘Her’?

ສໍາຫຼັບຜູ້ທີ່ຢາກທົດລອງນໍາໃຊ້ງານ, Meta ຈະເປີດເຜີຍລາຍລະອຽດເພີ່ມເຕີມໃນງານ Reality Labs ທີ່ຈະນໍາສະເໜີໃນງານ Connect ວັນທີ 17 ກັນຍາຍົນນີ້. ຕ້ອງລໍຖ້າຕິດຕາມຄວາມຄືບໜ້າກັນຕໍ່ໄປ.

ສະແດງຄຳຄິດເຫັນ