ພິທີຈັດສົ່ງຄະນະຜູ້ແທນ ແລະ ຄະນະນັກແຂ່ງຂັນສີມືແຮງງານເຂົ້າຮ່ວມການແຂ່ງຂັນສີມືແຮງງານອາຊຽນຄັ້ງທີ 14 ທີ່ປະເທດ ຟີລິບປິນ ໃນລະຫວ່າງວັນທີ 21-31 ສິງຫາ. ໄດ້ຈັດຂຶ້ນໃນວັນທີ 15 ສິງຫາຜ່ານມານີ້ ທີ່ກະຊວງແຮງງານ ແລະ ສະຫວັດດີການສັງຄົມ. ໂດຍມີ ທ່ານ ພົງໄຊສັກ ອິນຖາລາດ ຮອງລັດຖະມົນຕີ ກະຊວງ ແຮງງານ ແລະ ສະຫວັດດີການສັງຄົມ (ຮສສ) ມີບັນດາແຂກທີ່ຖືກເຊີນ, ຄະນະຮັບຜິດຊອບ ແລະ ນັກແຂ່ງຂັນສີມືແຮງງານເຂົ້າຮ່ວມ.

ທ່ານ ບຸນມາ ສິດທິໂສມ ຫົວໜ້າສະຖາບັນພັດທະນາສີມືແຮງງານ ໄດ້ຂຶ້ນລາຍງານກ່ຽວກັບການກະກຽມຄວາມພ້ອມເຂົ້າຮ່ວມແຂ່ງຂັນ ວ່າ: ເຫດຜົນ ແລະ ຄວາມຈໍາເປັນຂອງການແຂ່ງຂັນສີມືແຮງງານ ແມ່ນເພື່ອປະຕິບັດຕາມກົດໝາຍວ່າດ້ວຍການພັດທະນາສີມືແຮງງານ ເພື່ອສ້າງແຮງງານຕາມທິດຫັນເປັນອຸດສາຫະກກຳ ແລະ ທັນສະໃໝ ການແຂ່ງຂັນສີມືແຮງງານອາຊຽນແມ່ນກິດຈະກຳໜຶ່ງຂອງປະເທດສະມາຊິກອາຊຽນທີ່ຕ້ອງການຄວາມຮ່ວມມືກັນພັດທະນາສີມືແຮງງານໃນລະດັບພາກພື້ນນີ້ໃຫ້ເທົ່າທຽມກັບລະດັບສີມືແຮງງານຂອງສາກົນ. ຈຸດປະສົງ ແມ່ນເພື່ອສົ່ງເສີມໃຫ້ປະເທດສະມາຊິກອາຊຽນຮ່ວມມືກັນທາງດ້ານການສຶກສາ ແລະ ການພັດທະນາສີມືແຮງງານ, ເພື່ອກະຕຸກຊຸກຍູ້ໃຫ້ເກີດຄວາມຮ່ວມມືກັນຢ່າງໃກ້ຊິດລະຫວ່າງວຽກງານການສຶກສາກໍຄືວຽກງານການພັດທະນາ ສີມືແຮງງານທັງພາກລັດ ແລະ ເອກະຊົນ ໃຫ້ຫຼາຍຂຶ້ນ, ສ້າງເງື່ອນໄຂ ແລະ ເວທີໃຫ້ນັກແຂ່ງຂັນສີມືແຮງງານທັງພາກລັດ ແລະ ພາກເອກະຊົນໄດ້ສະແດງຄວາມຮູ້ ຄວາມສາມາດ, ສີມືກ້າວໄປເຖິງການຮັບຮູ້ສີມືແຮງງານ ຊຶ່ງກັນ ແລະ ກັນ. ພ້ອມນີ້ຍັງເປັນການສ້າງຄ່ານິຍົມທີ່ດີຂອງການເຮັດວຽກ ຂອງຊາວໜຸ່ມ-ໄວໜຸ່ມ ພ້ອມທັງຊ່ວຍພັດທະນາແຮງງານຄົນຮຸ່ນໃໝ່ໃຫ້ມີສີມືໃນລະດັບທີ່ສູງຂຶ້ນ. ເພື່ອສົ່ງເສີມວຽກງານການພັດທະນາສີມືແຮງງານລາວໃຫ້ສາມາດເຊື່ອມໂຍງກັບມາດຕະຖານສີມືແຮງງານພາກພື້ນ ແລະ ສາກົນ. ສຳລັບການແຂ່ງຂັນປະກອບມີ 5 ສາຂາວິຊາຊີບຊ່າງຄື: ສາຂາກຣາບຟີກດີຊາຍ, ສາຂາເວັບເທັກໂນໂລ​ຊີ, ສາຂາຊ່າງໄມ້, ສາຂາຕິດຕັ້ງໄຟຟ້າອາຄານ ແລະ ສາຂາປຸງແຕ່ງອາຫານ. ມີຄະນະຮັບຜີຊອບ ແລະ ນັກແຂ່ງຂັນ ລວມທັງໝົດ 32 ຄົນ.

ທ່ານ ພົງໄຊສັກ ອິນຖາລາດ ໄດ້ກ່າວວ່າ: ເພື່ອເຮັດໃຫ້ງານແຂ່ງຂັນສີມືແຮງງານ ໃນຄັ້ງນີ້ ມີຜົນສຳເລັດຕາມລະດັບຄາດໝາຍນັ້ນ, ຮຽກຮ້ອງໃຫ້ຄະນະຮັບຜິດຊອບແຕ່ລະສາຂາວິຊາຊ່າງລວມທັງນັກແຂ່ງຂັນ, ໃຫ້ມີການມອບໝາຍຄວາມຮັບຜິດຊອບແຕ່ລະໜ້າວຽກ ແລະ ກໍານົດແຜນການເຄື່ອນໄຫວຢ່າງລະອຽດ ເພື່ອເຮັດແນວໃດໃຫ້ການແຂ່ງຂັນສີມືແຮງງານມີຄວາມຍຸຕິທຳ, ຄວາມສາມັກຄີ, ມີບັນຍາກາດຟົດຟື້ນ, ມີຄວາມສະຫງົບປອດໄພ ແລະ ມີຜົນສຳເລັດຕາມລະດັບຄາດ ໝາຍທີ່ກຳນົດໄວ້. ເຊື່ອໝັ້ນວ່າ ດ້ວຍຄວາມຮູ້, ຄວາມສາມາດ, ປະສົບການ ບວກກັບຄວາມຮັບຜິດຊອບຮ່ວມກັນ ຈະເຮັດໃຫ້ການຈັດຕັ້ງແຂ່ງຂັນສີມືແຮງງານ ຄັ້ງນີ້ ປະສົບຜົນສໍາເລັດ. ສະແດງຄວາມຂອບໃຈມາຍັງຄະນະກຳມະການຮັບຜິດຊອບທຸກພາກສ່ວນທີ່ມີສ່ວນຮ່ວມທີ່ໄດ້ເອົາໃຈໃສ່, ທຸ່ມເທສະຕິປັນຍາດ້ວຍຄວາມເປັນເຈົ້າການ, ບັນດາຫົວໜ່ວຍທຸລະກິດທີ່ໃຫ້ການສະໜັບສະໜູນ ຈຶ່ງເຮັດການກະກຽມເຂົ້າແຂ່ງຂັນສີມືແຮງງານອາຊຽນຄັ້ງທີ 14 ນີ້ ມີຄວາມພ້ອມເຕັມທີ່, ຂໍອວຍພອນໃຫ້ບັນດາທ່ານ ຈົ່ງມີແຕ່ສຸຂະພາບເຂັ້ມແຂງຕະຫຼອດໄປ, ຂໍເປັນກຳລັງໃຈໃຫ້ຜູ້ເຂົ້າຮ່ວມການແຂ່ງຂັນທຸກທ່ານຈົ່ງບັນລຸຜົນສຳເລັດຢ່າງຈົບງາມ.

ຂ່າວ-ພາບ: ບຸນຕອມ-ບຸນອຸ້ມ.

ສະແດງຄຳຄິດເຫັນ