ຊຸດເຝິກອົບຮົມພະນັກງານແນວລາວສ້າງຊາດ ໄດ້ເປີດຂຶ້ນ ໃນວັນທີ 16 ສິງຫາ 2025 ເຊິ່ງຫົວໜ້າຄະນະຝ່າຍລາວ ນຳໂດຍທ່ານ ວັນນາ ແກ້ວສັນຕິ ກຳມະການສູນກາງແນວລາວສ້າງຊາດ (ສນຊ) ຄະນະປະຈຳພັກແຂວງ ປະທານແນວລາວສ້າງຊາດ ແຂວງອຸດົມໄຊ ພ້ອມດ້ວຍພະນັກງານແນວລາວສ້າງຊາດ ຂັ້ນສູນກາງ ແລະ ທ້ອງຖິ່ນ ຈຳນວນ 30 ທ່ານ ຍິງ 13 ທ່ານ ເປັນກຽດເຂົ້າຮ່ວມພິທີເປີດ ໂດຍທ່ານ Zeng Yu Gang ຫົວໜ້າພະແນກສູນຮ່ວມມືສາກົນ ຄະນະກຳມະການພັດທະນາ ແລະ ປະຕິຮູບ ແຫ່ງ ສປ ຈີນ ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ ທີ່ໂຮງແຮມ Fenghui ນະຄອນຫຼວງປັກກິ່ງ ສປ ຈີນ.

ເນື້ອໃນການເຝິກອົບຮົມຄັ້ງນີ້ ໂດຍໄດ້ຮັບການມອບໝາຍຈາກກະຊວງການຄ້າ ສປ ຈີນ ເຊິ່ງປະກອບມີຫົວຂໍ້ທົ່ວໄປ ແລະ ຫົວຂໍ້ສະເພາະ ເຊັ່ນ: ການແນະນຳສະພາບຂອງ ສປ ຈີນ ແນວຄວາມຄິດເສດຖະກິດ ຂອງສີຈິ້ນຜິງ ຄວາມທັນສະໄໝແບບຈີນ ປະສົບການ ແລະ ຄວາມຮູ້ໃນໄລຍະສີ່ສິບປີ ຂອງການປະຕິຮູບ ແລະ ເປີດປະຕູສູ່ໂລກ ຂອງຈີນ ສະພາບລວມ ຂອງສະພາທີ່ປຶກສາການເມືອງທົ່ວປະເທດຈີນ ການປັບປຸງລະບົບການຄຸ້ມຄອງຂອງພັກ ແລະ ລັດ ຕຳແໜ່ງຍຸດທະສາດ ວິທີການຂັ້ນຕອນ ແລະ ເນື້ອໃນຫຼັກແຜນການພັດທະນາ ຂອງຈີນ ວຽກງານຄົ້ນຄວ້າພິເສດ ແລະ ວຽກງານສະເໜີ ຂອງສະພາທີ່ປຶກສາການເມືອງທົ່ວປະເທດຈີນ ພ້ອມນີ້ ສຳມະນາກອນ ຈະໄດ້ໄປທັດສະນະສຶກສາຢ້ຽມຢາມເຂດປະຫວັດສາດ ວັດທະນະທຳ ຢ້ຽມຢາມກຸ່ມບໍລິສັດອຸດສາຫະກຳເຄື່ອງຈັກ ແລະ ການພັດທະນາ ເຄື່ອງຈັກ ກະສິກຳ ພາຍໃນນະຄອນຫຼວງປັກກິ່ງ ເມືອງເຊີນເຈິ້ນ ແຂວງກວາງຕູ້ງ ແລະ ເມືອງເຊຍເມີນ ແຂວງຟູຈ້ຽນ ເຊິ່ງໄລຍະການເຝິກອົບຮົມ ລະຫວ່າງ ວັນທີ 16-29 ສິງຫາ 2025.

ການເຝິກອົບຮົມຄັ້ງນີ້ ເປັນການເພີ່ມທະວີການຮ່ວມມື ໃນຂົງເຂດການພັດທະນາຊັບພະຍາກອນມະນຸດ ລະຫວ່າງ ສປປ ລາວ ແລະ ສປ ຈີນ ກໍ່ຄືການເສີມສ້າງສາຍພົວພັນມິດຕະພາບ ລະຫວ່າງ ສອງຊາດ ລາວ-ຈີນ ໃຫ້ມີຄວາມແໜ້ນແຟນຍິ່ງຂຶ້ນ ເວົ້າລວມ ເວົ້າສະເພາະ ເປັນການຈັດຕັ້ງຜັນຂະຫຍາຍຕາມບົດບັນທຶກຊ່ວຍຈຳ ລະຫວ່າງ ຄະນະກຳມະການ ສນຊ ແລະ ຄະນະກຳມະການ ສະພາທີ່ປຶກສາການເມືອງທົ່ວປະເທດຈີນ ສະບັບລົງ ວັນທີ 22 ມັງກອນ 2024 ໃຫ້ໄດ້ຮັບໝາກຜົນສຳເລັດ.

ຂ່າວ,ພາບ: ສນຊ

ສະແດງຄຳຄິດເຫັນ