ກອງປະຊຸມສ້າງຕັ້ງສະມາຄົມນັກສຶກສາລາວຮຽນຈາກ ສປ ຈີນ (ສນລຈ) ເພື່ອພັດທະນາເສດຖະກິດ-ສັງຄົມຈັດຂຶ້ນວັນທີ 16 ສິງຫາ 2025 ທີ່ໂຮງແຮມແລນມາກ ນະຄອນຫຼວງວຽງຈັນ ໂດຍເປັນປະທານ ຂອງທ່ານ ກູຢ່າງ ຈືບໍ່ ຮອງຫົວໜ້າກົມພັດທະນາບໍລິຫານລັດຄະນະຈັດຕັ້ງສູນກາງພັກ ແລະ ທ່ານ ໄຊຊະນະ ສິດທິພອນ ຫົວໜ້າຄະນະຂົນຂວາຍການສ້າງຕັ້ງສະມາຄົມນັກສຶກສາລາວຈາກຈີນ ມີບັນດາອະດີດນັກສຶກສາລາວທີ່ຮຽນຈົບຈາກຈີນ ນັກສຶກສາລາວທີ່ກຳລັງຮຽນຢູ່ຈີນ ແລະ ແຂກຖືກເຊີນເຂົ້າຮ່ວມ.

ກອງປະຊຸມຄັ້ງນີ້ໄດ້ເປັນເອກະສັນກັນຮັບຮອງເອົາແຜນການເຄື່ອນໄຫວຂອງສະມາຄົມແຕ່ປີ 2025-2030 ພ້ອມປະຊາມະຕິຮັບຮອງເອົາຄະນະບໍລິຫານຂອງສະມາຄົມນັກສຶກສາລາວຈາກຈີນເພື່ອພັດທະນາເສດຖະກິດ-ສັງຄົມ 5 ທ່ານ ແລະ ຄະນະກວດກາ 3 ທ່ານຄື:ທ່ານ ໄຊຊະນະ ສິດທິພອນ ເປັນປະທານຄະນະບໍລິຫານງານ ທ່ານ ວາລະໄຊ ເລັ່ງສະຫວັດ ແລະ ທ່ານ ນາງ ວິໄລວອນ ຈັນທະລາຕີ ເປັນຮອງປະທານ ທ່ານ ບຸນເພັງ ສີບຸນເຮືອງ ແລະ ທ່ານ ນາງ ອໍລະໄທ ສັນຕິຄົງຄາ ເປັນຄະນະ ພ້ອມນີ້ໄດ້ຮັບຮອງເອົາຄະນະກວດກາ 3 ທ່ານຄື:ທ່ານ ສົມບູນ ສຸກທະວີ ເປັນປະທານກວດກາ ທ່ານ ສີສຸລາດ ລາດ ສະສີສິນ ແລະ ທ່ານ ນາງ ສົມພາວັນ ທຳມະສັກ ເປັນຄະນະກວດກາ.

ໃນຕອນທ້າຍກອງປະຊຸມຍັງໄດ້ຮັບຟັງຄໍາເຫັນໂອ້ລົມຈາກທ່ານ ກູຢ່າງ ຈືບໍ່ ໂດຍໄດ້ເນັ້ນບາງບັນຫາສໍາຄັນເພື່ອໃຫ້ຄະນະສະມາຄົມນັກສຶກສາລາວ ຈາກຈີນນໍາໄປຈັດຕັ້ງຜັນຂະຫຍາຍເປັນແຜນງານລະອຽດ ເປັນເຂັມທິດເຍືອງທາງໃນການກຳນົດທິດທາງດໍາເນີນງານໃນຕໍ່ໜ້າ ເພື່ອຮັບປະກັນການປະຕິບັດໜ້າທີ່ພາລະບົດບາດຂອງສະມາຄົມ ໃຫ້ມີຜົນງານປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງປະເທດລາວຢ່າງບໍ່ຢຸດຢັ້ງ.

ສະແດງຄຳຄິດເຫັນ