ໃນວັນທີ 22 ສິງຫາ 2025 ທີ່ນະຄອນຫຼວງວຽງຈັນ ກະຊວງສາທາລະນະສຸກ ສປປ ລາວ ແລະ ອົງການຮ່ວມມືສາກົນ ສ. ເກົາຫຼີ (ອົງການ KOICA ປະຈໍາ ສປປ ລາວ) ໄດ້ຈັດ ພິທີ ເຊັນບົດບັນທຶກ ການຮ່ວມມືວຽກງານການແພດຟື້ນຟູໜ້າທີ່ການ, ໂຄງການປັບປຸງການເຂົ້າເຖິງ ແລະ ເສີມສ້າງຄວາມອາດສາມາດ ບຸກຄະລາກອນໃນການບໍລິການດ້ານການແພດຟື້ນຟູໜ້າທີ່ການ ໃນ ສປປ ລາວ ເຊິ່ງໂຄງການດັ່ງກ່າວ ແມ່ນຈັດຕັ້ງປະຕິບັດທີ່ສູນການແພດຟື້ນຟູໜ້າທີ່ການ, ກະຊວງສາທາລະນະສຸກ ແລະ ສາຂາສູນການແພດຟື້ນຟູໜ້າທີ່ການ ແຂວງອຸດົມໄຊ ເພື່ອບໍລິການຮັບໃຊ້ ຄົນພິການ-ເສຍອົງຄະ ແລະ ຜູ້ອາຍຸສູງ ຢູ່ 04 ແຂວງພາກເໜືອຂອງລາວ ໄດ້ເຂົ້າເຖິງການບໍລິການທີ່ມີຄຸນນະພາບ ໂດຍບໍ່ໄດ້ເສຍຄ່າ.

ໂຄງການນີ້ ແມ່ນມີຄວາມໝາຍຄວາມສໍາຄັນ ທີ່ຈະໄດ້ຊ່ວຍເຫຼືອຄົນພິການ-ເສຍອົງຄະ ແລະ ຜູ້ອາຍຸສູງ ໃນ ສປປ ລາວ, ຈະສ້າງໃຫ້ວຽກງານການແພດຟື້ນຟູໜ້າທີ່ການ ມີຄວາມເຂັ້ມແຂງ, ມີຄຸນນະພາບ ພ້ອມທັງຍົກລະດັບຄວາມຮູ້ ຄວາມສາມາດ ຂອງບຸກຄະລາກອນ ທາງດ້ານການແພດຟື້ນຟູໜ້າທີ່ການ, ກໍ່ສ້າງໂຄງລ່າງພື້ນຖານ ຢູ່ສູນການແພດຟື້ນຟູໜ້າທີ່ການ ແລະ ສາຂາສູນການແພດຟື້ນຟູໜ້າທີ່ການແຂວງອຸດົມໄຊ ໃຫ້ໄດ້ມາດຕະຖານຮັບປະກັນຄວາມປອດໄພ ແລະ ໄດ້ສະໜອງອຸປະກອນການແພດ, ອຸປະກອນການຜະລິດ ໃຫ້ຄົບຊຸດ ແລະ ທັນສະໄໝ.

ໂຄງການດັ່ງກ່າວ ຈະສ້າງໃຫ້ວຽກງານການແພດຟື້ນຟູໜ້າທີ່ການ ໄດ້ສະໜອງອຸປະກອນ ດ້ານອົງຄະທຽມ ເຄື່ອງຄໍ້າຊູ, ເຄື່ອງຊ່ວຍຊູ ຢູ່ສາຂາສູນການແພດຟື້ນຟູໜ້າທີ່ການ ແຂວງອຸດົມໄຊ ເພື່ອຮັບຜິດຊອບ 04 ແຂວງພາກເໜືອ.

ພິທີດັ່ງກ່າວໄດ້ລົງນາມ ໂດຍ ທ່ານ ດຣ ຄຳໃສ ເດດລືໄຊ ຫົວໜ້າກົມປິ່ນປົວ ແລະ ຟື້ນຟູໜ້າທີ່ການ ແລະ ທ່ານ ຊອງຊູ ໂອ ຫົວໜ້າອົງການຮ່ວມມືສາກົນ ສ. ເກົາຫຼີ (ກອຍກາ) ພ້ອມນັ້ນຍັງໄດ້ຮັບກຽດເຂົ້າຮ່ວມເປັນສັກຂີພິຍານໂດຍ ທ່ານ ນາງ ອາພອນ ວິຊາເທບ ຮອງຖະມົນຕີກະຊວງສາທາລະນະສຸກ, ທ່ານ ຈອງຢອງ ຊູ ເອກອັກຄະລັດຖະທູດ ສ.ເກົາຫຼີ ປະຈຳ ສປປ ລາວ, ມີບັນດາ ທ່ານຫົວໜ້າຫ້ອງການ, ກົມ, ຫົວໜ້າສູນການແພດຟື້ນຟູໜ້າທີ່ການ ພ້ອມດ້ວຍຄະນະ, ຫົວໜ້າພະແນກສາທາລະນະສຸກ, ອໍານວຍການໂຮງໝໍແຂວງ ແຂວງ ແລະ ພາກສ່ວນທີ່ກ່ຽວຂ້ອງກໍ່ໄດ້ເຂົ້າຮ່ວມ.

ທີ່ມາ: ສຸນຂ່າວສານການແພດສຸຂະສຶກສາ

ສະແດງຄຳຄິດເຫັນ