ໃນວັນທີ 26 ສິງຫາຜ່ານມາ, ທ່ານ ສົມສະອາດ ອຸ່ນສີດາ ຮອງເຈົ້າແຂວງຄໍາມ່ວນ, ທ່ານ ສົມປະດິດ ວໍລະຈິດ ວ່າການແທນຫົວໜ້າ ທະນາຄານແຫ່ງ ສປປ ລາວ ພາກກາງແຂວງສະຫວັນນະເຂດ (ທຫລ.ສຂ) ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມ, ກວດກາ ບັນດາຫົວໜ່ວຍທຸລະກິດ ທີ່ໄດ້ຮັບແຫຼ່ງທຶນ ນະໂຍບາຍສິນເຊື່ອ ເພື່ອກະຈາຍແຫຼ່ງທຶນສູ່ທ້ອງຖິ່ນ ຂອງແຂວງຄໍາມ່ວນ.

ນະໂຍບາຍສິນເຊື່ອເພື່ອກະຈາຍແຫຼ່ງທຶນສູ່ທ້ອງຖິ່ນ ແມ່ນນະໂຍບາຍປ່ອຍແຫຼ່ງທຶນທີ່ມີດອກເບ້ຍຕໍ່າ ໃຫ້ແກ່ທະນາຄານທຸລະກິດ ເພື່ອປ່ອຍຕໍ່ໃຫ້ແກ່ຫົວໜ່ວຍທຸລະກິດ, ແຫຼ່ງທຶນດັ່ງກ່າວໄດ້ເລີ່ມຈັດຕັ້ງປະຕິບັດມາແຕ່ທ້າຍປີ 2023, ຊຶ່ງໃນປີ 2024 ໄດ້ອະນຸມັດແຫຼ່ງທຶນທັງໝົດ 17 ຫົວໜ່ວຍທຸລະກິດ ມູນຄ່າ 19.54 ຕື້ກີບ ກວມເອົາ 24.43% ຂອງແຫຼ່ງທຶນທີ່ໄດ້ຮັບທັງໝົດ (80 ຕື້ກີບ), ມາຮອດປັດຈຸບັນ ສະເພາະແຂວງຄຳມ່ວນ ສາມາດອະນຸມັດແຫຼ່ງທຶນໃຫ້ແກ່ 37 ຫົວໜ່ວຍທຸລະກິດ ລວມມູນຄ່າ 40.35 ຕື້ກີບ, ກວມເອົາ 50.44%. ໃນການປ່ອຍສິນເຊື່ອຄັ້ງນີ້, ສ່ວນຫຼາຍແມ່ນປ່ອຍໃຫ້ແກ່ຂະແໜງກະສິກຳ, ຂະແໜງບໍລິການ, ທ່ອງທ່ຽວ, ຂະແໜງການຄ້າ, ອຸດສາຫະກຳປຸງແຕ່ງ ແລະ ອື່ນໆ.

ການລົງເຄື່ອນໄຫວຂອງຄະນະຮັບຜິດຊອບຄັ້ງນີ້, ໄດ້ຕິດຕາມ, ກວດກາ ຫົວໜ່ວຍ ບໍລິສັດ ດົງບູນ ສົ່ງເສີມການລ້ຽງສັດ ຈຳກັດຜູ້ດຽວ ຂອງທ່ານ ສຳລານ ໄຊນາມວົງສາ ບ້ານດົງບູນ ເມືອງໜອງບົກ, ບໍລິສັດ ເກສອນຟາມ ແລະ ຂາເຂົ້າ-ຂາອອກ ຈຳກັດຜູ້ດຽວ ຂອງທ່ານ ນາງ ເກສອນ ຈັນທະວົງຈິດ ບ້ານໜອງບົກ ເມືອງໜອງບົກ. ເພື່ອປະເມີນເຖິງປະສິດທິພາບ, ຄວາມເຂັ້ມແຂງ ແລະ ການຂະຫຍາຍຕົວຂອງຫົວໜ່ວຍທຸລະກິດ ແນໃສ່ຊຸກຍູ້ ແລະ ສົ່ງເສີມຫົວໜ່ວຍທຸລະກິດໃຫ້ເຂົ້າເຖິງແຫຼ່ງທຶນດັ່ງກ່າວ ໃຫ້ຫຼາຍຂຶ້ນໃນຕໍ່ໜ້າ ເພື່ອກະຕຸ້ນເສດຖະກິດໃຫ້ມີການຂະຫຍາຍຕົວ ທັງເປັນການສົ່ງເສີມການຜະລິດພາຍໃນໃຫ້ສູງຂຶ້ນ ທົດແທນການນໍາເຂົ້າ, ການເປັນແຂວງທີ່ສາມາດກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງຫຼາຍຂຶ້ນ.

(ຂ່າວ-ພາບ: ກອງຄໍາ)

ສະແດງຄຳຄິດເຫັນ